3
Pol bi mani nə̂ budə̂lə̂ nə̂nə̂ Kris duwa di gəndə̂gə daa
1 Yande da, nə̂ amsə Mãr̰ĩ: əndi gə Pol gə yən dange dara giyə̂ gənə̂ aləw Jesu dara darang ꞌyə̂ni nə̂ anə̂ i Juwib bə̂də̂ di.
2 ꞌYang ꞌyə̂ni da anə̂ doy gwale gə gə way dara dusi də lade də Mãr̰ĩ al gan me ꞌyan giyə̂ əsənə̂ dara, ba nə̂ wanang nəm lə̂ di.
3 Mãr̰ĩ gələ̂n mani duwa nə̂ an̰ji budə̂gə ɓəg di dərə̂nə̂ daa ya chine de dara ba nə̂ ꞌwacn̰anagə, me nə̂ jangagə nəm dodə ɓani caga ka me ca.
4 Mani nə̂ nə̂ jangəgə ta di anə̂ asnagə da anə̂ ha ꞌwacn̰a dara əndi da ba nə̂ ꞌocn̰ mani nə̂ budə̂lə̂ nə̂ Mãr̰ĩ algə ilə̂ dara Kris di gəndə̂gə ladə nan̰e.
5 Mani nə̂ budələ̂ nə̂ ta di Mãr̰ĩ gələ̂gə gandagə nare nə̂ pii di daa bə̂də̂, ɗəm da caga da dundi gələgə gandagə nare nə̂ Mãr̰ĩ kəjəgə me woni waya Mãr̰ĩ bəw, i cendi ca day-ə̂ me Mãr̰ĩ chəgə jiga dara giyə̂ duwa di.
6 Mani nə̂ budələ̂ nə̂ gə gəlgə daa di: I dara ɓamara gə daa mən gə Jesu Kris də me, caga da nare nə̂ i Juwib bə̂də̂ kaw Mãr̰ĩ ha əsə̂gə mani duwa nə̂ ꞌywa nə̂ lade nə̂ ta di ya nare nə̂ gəndə̂gə Juwib de me ca. Mani nə̂ lade ɗang nə̂ Mãr̰ĩ ꞌyagə da i dayara gə cendi dayar gandagə daa ya gun mən səw de. Mani nə̂ Mãr̰ĩ bi gə bi gə ba ꞌyagə nare duwa di kaw cendi ꞌywagə le me ca, mani nə̂ ta di pad cendi ꞌyogə i gə bərmə̂ gənə̂ nõ də lade dəra.
7 I dara dusi də lade də Mãr̰ĩ al gan managə dwana duwa də al giyə̂ sənə̂ də me mwom da, an̰ji gədən nəm aba giyə̂ duwa gaba waya nõ də lade gwale dəra.
8 Əndi gənə̂ wor targin̰ gech nare nə̂nə̂ Mãr̰ĩ duwa taragələ̂ kaw, Mãr̰ĩ al gan dusi də lade dara ba nə̂ waynagə nare nə̂ i Juwib bə̂də̂, gwale gə lade gənə̂ Kris duwa. An̰ji i gun gə geche nan̰e, gun neyem ꞌwacn̰a gəndəw pad bə̂də̂.
9 Me ɗang da ba nə̂ binə̂gə nare pad gəndəw daa pədə̂n̰-yə̂, ba i man me mani nə̂ an̰ju gə Mãr̰ĩ ba budəgə dodə̂ pii ɓəg di. An̰ju gaba bwa mani pad di ba budə̂gə dodə ɓəgəden̰ wala gə ba asə gə sən̰a ba.
10 Ər̰ə caga da Paja nə̂ daa me dolgə̂ day me, yarna me ꞌwacn̰ana dərin̰ naa nə̂nə̂ Mãr̰ĩ duwa nə̂ ꞌyarbare nan̰ ta di dara nare nə̂nə̂ Mãr̰ĩ duwa nə̂ dayar dam mana mən ɗanin̰.
11 Mani nə̂ Mãr̰ĩ algə ta di pad, an̰ji algə ya ba ərəm nəm ɓəg wala gə an̰ji wor asa sən̰a sən̰ di, mani nə̂ ta di alal yande dara ɓamara gə də̂ ɓamarang daa gə Aba ciri ənda gə Jesu Kris mən di.
12 Ɓamara gə də̂ ɓamarang daa mən gə Kris də me dusərə̂ndə də də̂ kalang dəwə̂ me di də̂ ꞌywang bərmə̂ gaba chidə̂ daa Mãr̰ĩ səwə̂ dəban lan̰a.
13 I na yande da nə̂ amsang kalna dusərə̂ng sawna nimi wamani gə ꞌyon dara darang də bə̂də̂, dara wamani ni gə ta di ha wangə̂ me ca.
Dwani dənə̂ Jesu duwa də al ganandə
14 I dara yande me nə̂ piy gubərə̂n dodə Mãr̰ĩ gə i abrandə di dərə̂wə̂, amsəw dara darang.
15 I Mãr̰ĩ də me nare nə̂ dam daa gə gəndə̂gə day me nə̂ dam dodə̂ sən̰a lə̂ ka gə gəndə̂gə day me da an̰ji bogə an̰ju.
16 Mãr̰ĩ da i geche, gasnani duwa da ꞌyan̰a dəra ilə̂ bə̂də̂, nə̂ amsəw dara kal dwana dənə̂ dundi duwa ꞌyanang dwana managə dusərə̂ngə̂.
17 Nə̂ amsəw ɗang bi dara Kris damna dusərə̂ngə̂ dara ꞌyə̂ni da anə̂ kal dusərə̂ng dəwə̂ me nə̂ amsəw dara anə̂ bwana sabərang hana dodə cog managə dwaniyə̂ me damna yinə̂ sədəng lə̂ waynale me ca.
18 Ina yande da, ꞌyə̂ni me nare nə̂nə̂ Mãr̰ĩ duwa nə̂ ɗang me di anə̂ ha ꞌywa dwana dədə ꞌwacn̰a dwani dənə̂ Kris duwa di ɓəlnani dəra me, charni dəra me, hwa dəra me ɗungə̂ dəra me ca.
19 ꞌYeni kaw anə̂ ha ꞌwacn̰a dwani dənə̂ Kris duwa də geche nan̰ də də̂ neyamang ꞌwacn̰a gəndədə pad bə̂də̂ di, kal Mãr̰ĩ ꞌwanbanang dusərə̂ng daa telele telele an̰ju gang.
20 An̰ji Mãr̰ĩ da neyem ala mani pad nan̰ ɗwaya nə̂ də̂ urə̂ng gandagə me ərmə̂ng gandagə dusərə̂ndə lə̂ di bam, dara dwana duwa di al giyə̂ lə̂ sədəndələ̂.
21 Kal nare pad ꞌwagənaw gə jilay managə nare nə̂nə̂ Mãr̰ĩ duwa nə̂ dayar dam mana mən dwar̰agələ̂ dara ɓamara gə cendi ɓamar gə Jesu Kris daa mən di, cendi ꞌwagənaw gə jilay wala gə wala me gə dərin̰ bər̰in̰ me ca! Amen.