2
Nare nə̂ mare gədə bəra managə Jesu gəndəwə̂
1 Tanga pii da anə̂ i ya nare nə̂ mare de dara anə̂ gən̰ Mãr̰ĩ bəw bam me anə̂ al acn̰a me ca.
2 Te ɓag da anə̂ pam i nare nə̂ sən̰a dədə̂ ka mani day nə̂ ala me anə̂ pam i dole gənə̂ dundi də acn̰e day gə dam managə sən̰a bulə̂ day gə siyayalə̂, tandi dundi də ta di al giyə̂ lə̂ nare woni gən̰ə̂ Mãr̰ĩ bəw bam dusərə̂gələ̂.
3 Tanga pii da neyendə kaw də̂ wunə̂ng i ya nare nə̂ ta də de me ca. Pii da də̂ alang i mani nə̂ acn̰e nə̂ də ꞌwacn̰arang nəm nə̂ doni gə sədə̂ndə me dusərə̂ndə me ur cendi, de neyendə kaw də̂ ꞌyang i nare nə̂ sariya dənə̂ Mãr̰ĩ duwa ha yəbə̂ndə ya ba də yibə nəm gə cendi nə̂ ɗang də de me ca.
4-5 Ɗəm da Mãr̰ĩ da i aba yara nare n̰agəni day nan̰e me, dwani də an̰ji al ganandə di i də geche nan̰e me ca, wala gə də̂ wunə̂ng ya nare nə̂ mare de dara acn̰a ənda da an̰ji urə̂ gə an̰ji urəndə nan̰ di cor ꞌyandə bələ dara də ɓamarang daa gə Kris, i dara dusi də lade duwa di me anə̂ bəl nəm.
6 I dara ɓamara gə də̂ ɓamarang daa mən də me an̰ji dəmdə nəm daa munə-lə̂ gandəw mən me ha chə̂ndə daa dara ba də̂ lamnang dwãr̰ĩ gə Jesus Kris mən me.
7 An̰ji al ganandə ladni yande gə Jesu Kris suməw, i dara ba gəlgə nare nə̂ wara pii ba yarna ala gə ladni duwa də nan̰ di.
8 I dara dusi də lade dənə̂ Mãr̰ĩ duwa də me an̰ji bələ̂ng nəm daa me, i dara dusərə̂ng də anə̂ kal managə Jesu dəwə̂, an̰ji ꞌyang gə bələ̂ di i dara mani dan nə̂ ala nə̂ lade bə̂də̂, an̰ji ꞌyang bələ̂ ta di ta di i pə̂gin̰.
9 Bələ̂ gə ta di, anə̂ ꞌyow i dara giyə̂ dan gə ala bə̂də̂, yande da kal gun ꞌwagəna gə səw bə̂də̂ me ca.
10 Dara an̰ji me i aba awandə an̰ju me, an̰ji bwandə də̂ kədə̂ng nare nə̂ dərway dara ɓamara gə də̂ ɓamarang gə Jesu Kris daa mən di, dara ba də̂ alnang mani nə̂ lade. Mani nə̂ lade nə̂ ta di Mãr̰ĩ ɗangərəgə pii ɓəg dara ba də̂ alnang gandagə le.
Ɓamara gənə̂ nare nə̂ gəndə̂gə jiga jiga sər day daa mən gə Jesu Kris
11 Ina yande da ꞌyə̂ni anə̂ i Juwib bə̂də̂ dara anə̂ wun i mənang jiga, nare woni saba ban̰a ꞌwagang ba anə̂ i woni saba ban̰a bə̂də̂, ban̰a də ta di cendi sabədə i doni day gə icheyə̂ pə̂gin̰ gə əsəragə day dara i mani day nə̂ gəndə̂gə ɓag. Yande da kalna dusərə̂ng gunə̂ng managə dama dan-ə̂ wala gə anə̂ wor ꞌwacn̰a gə Mãr̰ĩ bə̂də̂ sən̰ di dəwə̂.
12 Me gun gə Mãr̰ĩ biyəw də bə̂də̂ sən̰ me, anə̂ i nare nə̂ Israyel bə̂də̂ me anə̂ ꞌya i məje managə nare nə̂nə̂ Mãr̰ĩ duwa nə̂ an̰ji ma gandagə gwale managə bəw gə an̰ji biyəw di dəwə̂. ꞌYeni anə̂ dam dəban ərmə̂ gə mani dədə̂gələ̂ me dəban Mãr̰ĩ me ca.
13 ꞌYeni nə̂ tanga pii da anə̂ dam yə̂ə̂ gandəw, ɗəm da caga da anə̂ yala ɓamar daa gə Jesu Kris mən me, anə̂ chidə̂ yala Mãr̰ĩ səwə̂ ib di i dara Kris bare duwa gə bor dodə̂ ya sarga de di.
14 I dara an̰ju di ɗanin̰ me həlala jwam dam nəm managə dwar̰andələ̂, nare nə̂ Juwib me nə̂ Juwib bə̂də̂ me kaw, an̰ji ɓamgə daa mən gədəgə nare nə̂ gəndə̂gə mən tenene. I dara made duwa də an̰ji mardə də me an̰ji ichə gə̂r gə dwar̰agələ̂ gə cəgədəgə bam cogə mar̰ande bulə̂ day-ə̂.
15 An̰ji bi dwana dənə̂ bii gə ꞌwoo gənə̂ Juwib day me gwale duwa gə lə̂ dalawə̂ pad me mani day nə̂ gəndə̂gə me bam, an̰ji al yande dara ɓama nare nə̂ Juwib me nə̂ Juwib bə̂də̂ me daa mən ba gədənə̂ ya gun duwa gə dərway mən tenene de me ba damna gə həlala jwam me ca.
16 I dara made duwa də an̰ji mardə daa habda gə dagəla lə̂ də me, an̰ji day nəm gə nare nə̂ Juwib me nə̂ Juwib bə̂də̂ me daa mən, meyə̂ndə mar̰ande də dwar̰agələ̂ bam gədəgə gun mən ɓamgə daa gə Mãr̰ĩ me ba damna gə həlala jwam me ca.
17 Jesu Kris gəra sən̰a-lə̂ ka way gwale gənə̂ həlala jwam duwa ꞌyagə nare nə̂ Juwib bə̂də̂ nə̂ pii nə̂ dam yə̂ə̂ gə Mãr̰ĩ me ꞌyagə nare nə̂ Juwib nə̂ pii nə̂ damnin ib gə Mãr̰ĩ me ca.
18 I dara mani nə̂ Kris algə də me neyendə nə̂ də̂ ꞌyang Juwib me, Juwib bə̂də̂ me di də̂ ꞌywang bərmə̂ gaba chidə̂ Mãr̰ĩ gə abrandə di səwə̂ ib gə bərmə̂ gənə̂ dundi də wuse də mən tenene ta di dəra.
19 Yande da ꞌyə̂ni nə̂ Juwib bə̂də̂ nə̂ anə̂ bo bədə̂ng ꞌyaw Mãr̰ĩ da anə̂ i məje bə̂də̂ ɗəm me anə̂ i nare nə̂ cəmə̂ ciri də ɗangə̂ bə̂də̂ me ca. Caga da anə̂ bor i gə nare nə̂nə̂ Mãr̰ĩ duwa də mən me Mãr̰ĩ i wilang an̰ju ɗəm.
20 ꞌYeni da anə̂ ilə̂ mani nə̂ Mãr̰ĩ aw gə kulə dwar̰agələ̂ me nare nə̂ Jesu kəjəgə me woni waya gwale gənə̂ Mãr̰ĩ duwa me da cendi i kulə gəndəw də dodə̂ cendi me Kris da i ya kur̰a də gə chidə dugədiyə̂ pii pa dara yə̂ə̂ gə kulə di waya nəm daa məjak de.
21 I dara ɓamara gə daa gə Kris mən də me, mani nə̂ jiga jiga nə̂ gə aw gə kulə di yəw nəm daa woy me kulə gə ta di jwor nəm me gədə nəm gə kulə gənə̂ Aba ciri duwa gə i duwa an̰ju mən tenene di.
22 I dara ɓamara dan gə Kris di daa mən də me an̰ji ilə̂ dayang nəm daa mən gə nare nə̂ kal dusərə̂gə Aba ciri dəwə̂ nə̂ ɗang, dara ba nə̂ gədənə̂ ya kulə gənə̂ Mãr̰ĩ duwa gə an̰ji dam lə̂ gə bərmə̂ gənə̂ dundi duwa dəra di.