4
Pool nakohiɗ ne Woo ki yegɗohu
1 Ŋ fiki Kooh na fiki Kiristaani Yeesu, yi atte'an pesiɗ ci na kaaniɗ ci te a yii hayis findi buur, mi yii nak ɗa inii keeh-keeh :
2 Yegɗoha woo kiŋ Kooh te kinaa faɗ. Wa yooɓ, wa yooɓaaɗi, yegɗohaa. Dokna muuƴiɗ ci ŋ keeh ki, woytoha ɓi nikɗi ŋ waas, ñaaha ɓooɓi, fu jangɗee ɓa te wa hun na muñ ŋ in ci jen.
3 Laam jamano hey haye wi fu inah ne ɓooɓi waaɗissanɗi kerah jangɗohi wiriɗi. Waaye ŋ ini neɓ ɓa, ɓa hey nangɗohe ɓi jangɗohoh laayiɗ ɓi na hee ɓa woye ini ɓa waaɗ kerah.
4 Ɓa hey ɗikɗuke keeh ki, ɓa sikɗukee andiin.
5 Waaye fu, amba haf fu ŋ in nu wa min nik ɗah, teyɗuka miskiɗ ci, yegɗoha Muci, fu mitiɗ pangki Kooh nak ɗa.
6 Ini kaɗ nga so, mi yii Pool, ŋ seeƴkohuuɗ po ƴutiɗ ; te jamanooni ŋ joy kurkoh nga reyiɗ.
7 Ŋ leberiɗ leberi baahiɗi, ŋ nupiɗ po ɗiska nupaahi top, ŋ ris na kosiŋ ngo.
8 Ɗiski wa nik, aafiŋ ndamiŋ ngo sagu yurhi ŋ yurah wa ɗii sek ko. Heɗi, atte'ohi yurhiɗi, hey yo wa eɗe ŋ mbehaŋ atteena, te a eɗan ndo mi dong haa, waaye na ɓi waaɗ ɗe jen te ɓa sekee hayiŋ ɗe.
In ci Pool nak Timoote
9 Ndengɗuka po fu hay yo raake ndii findi wa uup gaawoh.
10 Demaas faɗiɗ to sagu waaɗ Adina, a cootiɗ Tessalonik ; Keresanse cootiɗ Galaat, Tit cootta Dalmati.
11 Luk dong a yi tas na so. Ɓaya Maarko, fu hay na ɗe, a raakɗiɗ to njiriñ lool ŋ pangkiŋ ngo.
12 Tisikos ŋ woos ɗe Efes.
13 Fu hayee ɗah, kom mbo paltooni ŋ faɗ ŋ Torowaas, ŋ kahan Karpos, na fiis ci ; ci fiisu ŋ und, caɗ ŋ uup etoh.
14 Aleksaandar tiɓohi tumiɗ to miskiɗ laayiɗ. Heɗi hey ɗe wirnde in hend na in ci a tum.
15 Fu yit, wortukaa ɗe baahiɗ. A hiñohiɗ laayiɗ ini ɓoo na jangɗohe.
16 Ali ɓo' ambohɗi so ŋ ngelaŋ ngo koc, ɓa jen ɓeɗ faɗ to. Kooh kinaat ɓa amboh ineem !
17 A Heɗi amboh ho, a eɗta so hatil po ŋ minnda yegɗoh woo kiŋ ɗe jen, cuuɓ ci kerahhaa. Te Heɗi mucɗiɗ to ŋ nguɓ gaynde.
18 Heɗi hey yo pulɗohe ŋ in moɗaaɗi nu nik te a hey yo niiɗe po a ɓek ko ŋ Nguuriŋ ɗe ŋ ɗafka. A yi yakɗaah po faw ! Amiin !
Askohi
19 Kañɗiɗ to Piriska na Akilaas na ɓi kahan Onesifoor.
20 Erasta tas ŋ Korenta. Te ŋ faɗiɗ Torofiim ŋ Mileet, a kosaayee kosaay.
21 Ndengɗuka fu hay bala soosi hayan ɗah. Obulos na Pudensa na Linus na Koloja na ɓaah ciŋ ɓoo kosiɗ ci jen ɓa ɗii kañiɗ ɗa.
22 Heɗi niiɗaat ɗa ! A baahoh ɗu jen !