Fiisi Pool kaɓɗoh Tit
Rangsohaani
Pool ɓaahee ŋ Israayel ci, ŋ cuuɓiŋ Benyaamin. A nikee Farisen. Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci. Waaye wa raakka mbeh, a cohha na Yeesu, a kossa po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Tiikiŋ Tit nikɗi ŋ teerndiŋ Tum ci, waaye Pool woyiɗ tiik ce ŋ in laayiɗ ŋ fiis ci a kaɓɗoh. Ini Pool fiis ŋ Tit ngaŋ teerndiŋ Ɓi Galaat 2:1-3, wa miniɗ teel ngaŋ pangkiŋ Pool, wa miniɗ nik ne wa nikee bala ɓaaɓaŋ ɗe yakka koc, ŋ kaɗaŋ ɗe ŋ Yudee ngaŋ teerndiŋ Tum ci 11:27-30, wala ŋ finho ɓaaɓaŋ ɗe yakka koc ŋ kaɗaŋ ɗe ndaam ngaŋ teerndiŋ Tum ci 15. Ŋ finho ineem, Pool woyiɗ tiikiŋ Tit ŋ Fiisi a kanakɗoh kaɓɗoh ɓi Korenta, wa a fiis ŋ ɓaaɓaŋ ɗe yakka kaahayɗoh. Wa ñiiniɗ ndeem ne Tit nikee ɓaatɗoh keeh-keeh ngaŋ Pool.
Ŋ finho taƴuukaŋ Pool koc ŋ Rom, Pool faɗsuusa. Ŋ jamanoonaam, weɗ a kaɗoh na Tit Keret. Wa Pool pul Keret, a faɗ Tit ndaam. Waam weɗ a fiisoh kaɓɗohii. Ŋ reehɗohaaniŋ kaɓɗohi, a woosa ne a hey woose ƴaar wiiriis ŋ Keret, a woosa Tit ne a hayaat ɗe marke ne yi na hee ɗe namsiɗe ree ɗah. Ini mirndoh kerhu ŋ Tit weɗ Pool fiis ŋ teerndiŋ 2 Timoote 4:10. Ŋ ndeem, Pool taƴissuusa ŋ kaso, te a inahha ne a hey apse. Ini a woo rohƴiɗ, waaye wa teeɓoh ne ɓa risee kerhoh.
Janguuniŋ Keret nikee haneeɗa camb, te nakoh ci na jangɗoh ciŋ Pool raakiɗ etoh ŋ mboolo mand ɗaa.
Fiisi Pool kaɓɗoh Tit kaɗtiɗoh an :
- Pool kañɗiɗ Tit, a woosa ƴissuut ŋ pangkiŋ ɗe 1:1-5
- Mandohaaɗ ciŋ ɓooɓi adgohan Janguuni 1:6-9
- Miskiɗ ci raak ŋ Keret 1:11-16
- Findi ɓo' joy tumoh na ɓooɓi jen2:1-10
- Njirñiŋ yegɗohiŋ baahohi 2:11-15
- Nakoh ci wuu findi kosiɗ ci joy nikoh 3:1-11
- Kooɗkiŋ ɓaaɓ ci, na kañɗoh ci mirndoh 3:12-15
1
Kañɗohi
1 Mi yii kañiɗ ɗa Tit, mi yi Pool, ñaamiŋ Kooh na Apootariŋ Yeesu Kiristaa, ñam kooɗu ne ŋ woo ɓi Kooh tan, ɓa hay ŋ kosi, ŋ inhiɗ ɓa baahiɗ keeh ki, keeh ki hun na nup Kooh.
2 Ŋ ineem, ɓa hey oolke ne ɓa hey raake kipes ki heyɗi reehe. Kooh yi na leyeeɗi, a yi gapoh kipes keem bala Adina fersan.
3 Kooh Mucɗohiŋ ɓoo, wi jamanooni a gapohee ineem hay, a inhiɗohiɗ woo kiŋ ɗe weem, a dengkohha so wa ne ŋ yegɗoha.
4 Mi yii fiis kaytii ne ŋ woo na ɗa Tit, fu yi ŋ amb findi kuɓuuso keeh-keeh ŋ kosi ɓoo ɓaah. Kooh Baabi na Yeesu Kiristaa Mucɗohi baahohaat ɗa, on ɗa jam !
Ɓi adgoh Janguuni
5 Ŋ faɗiɗ ɗa ŋ Keret ne fu ɗiindoh in ci tasee tufkiɗu ŋ ndeem, ne fu kooɗ ŋ kur-taah nu nik yakak ci adgohan Janguuna nik nga. Tuma findi ŋ woyoh ɗa wa.
6 Yaa nu nga ɓa joy nik ɓo' raakaaɗi woyɗaah moɗaaɗi, a top ŋ ɓitiice, komaakciŋ ɗe joyiɗ kos, ɓa joyɗi inhu ŋ tumohaaɗ mbalay wala kerhiɗaaɗi ɓo'.
7 Yi adgohan ɓi Janguuni, a taambkohan pangkiŋ Kooh, weɗ tah a joyɗi raak woyɗaah moɗaaɗi. A joyɗi yaksiɗuk, a joyɗi yooɓ ayruk, a joyɗi nik laaroh, a joyɗi nik ɓo' waaɗiɗ hiñoh, a joyɗi waak kopor ŋ ini lahɗi waas,
8 waaye a joy joy daliɗ baahiɗ ɓi na haye kahan ce, a waaɗ in baahiɗ, a hendoh pesohaaɗiŋ ɗe, a yurah, a hool wuu Kooh, a min amb haf ce.
9 A joy joy amb ndengiɗ woo ki wooriɗi, wi hun na ini jangɗohu. Ŋ ndeem a hey mine ñaah ɓinooɓi na jangɗohi wiriɗi te a teeɓ ɓi na ɗalee wa ne wa ɗaa haa.
Ɓi na tufkiɗe jangɗoh ci nikɗi keeh
10 Raakiɗ ɓo' laayiɗ nga ɗu ɓi kerhiɗɗi ali ɓo'. Ɓa na ñaañohe ɓooɓi na woo ciŋ ɓa mbalay ci ; ɓoo ɓeem uupoh ŋ Yawuut ci nik na ɗu.
11 Ranga nguɓ ciŋ ɓa, ɓa na yahrohe kos kahan limb, ɓa jangɗohee in ci ɓa joyɗi jangɗoh, sagu waaɗ raak kopor ŋ ini lahɗi waas.
12 Ɓo' Keret, ɓaah na ɓa, a woosuuɗ sah, ɓaah nga ɓa, a woyiɗ ne :
« Ɓi Keret moos nik leyoh ;
ɓa ɗoopaat saahiɗ,
ɓa waaɗ ñam te ɓa tiriɓpa ! »
13 Ini woyu nga ɓa weem, wa keeh, tahha po woytoha ɓa woytoh ndengiɗ ne ɓa min raak kos moɗoɗ,
14 weɗ ngisoh ɓa sikɗukee andiin ciŋ Yawuut ci na nakoh ci puloh ŋ ɓi suungɗuk keeh ki.
15 Ɓooɓi hooliɗ ci, in ci jen hooliɗ nga ɓa waaye ɓi hoolaaɗiici te ɓa sannga kos, ali in hoolɗi nga ɓa. Laam nga ɓa, liiɓ ciŋ ɓa hoolɗi, ca minɗi inhisoh baahiɗ na baahaaɗi.
16 Ɓa na woye ne ɓa inhiɗ Kooh, waaye tumohaaɗ ciŋ ɓa taasiɗ ɓa, ɓa siɓaah, ɓa kerhiɗɗi ali ɓo' te ɓa minɗi haɓiɗ ali in baahiɗ.