3
Findi ɓooɓi mandan ŋ jamanooci mirndohan
Inha inii baahiɗ, Timoote : Ŋ mbeh ci mirndohan, jamano hey miske. Ɓooɓi waaɗan haf ciŋ ɓa dong, ɓa waaɗ kopor, ɓa waaɗ teeɓohuk, ɓa waaɗ hotsiɗuk ; ɓa nikan ɗaloh Kooh, ɓa kerhiɗanɗi ɓi rim ɓa, ɓa inhanɗi corkiɗoh te ɓa eɗissanɗi cir in ciŋ Kooh. Ɓa hey suusse keeñ, ɓa waaɗanɗi jam, ɓa nikan yahoh tiik, ɓa minanɗi amb haf ɓa, ɓa nikan añaandiɗ te ɓa sang in baahiɗ. Ɓa nikan woroh, ɓa nik ɓo' yeeɓkaaɗi'iɗ, ɓa yaksiɗuk lool, e waaɗi ɓa waaɗ kiñin ciŋ ɓa ngisohɗan ɓa waaɗ Kooh.
Ɓa nikan ɓo' kosiɗ ŋ has ciŋ ɓooɓi, waaye raakan ɓa faɗiɗ hatili nik ŋ kosi. Ɓooɓeem, usaa ɓa !
Raakiɗ nga ɓa ɓi na kaɗe ŋ kahan ci, ɓa ñaañohee ɓitiɓ ci yooɓ ñaañohu, ɓi fu inah ne ɓa ɓitiɗ dis na bakaaɗ, ɓa minɗi saɓsukoh na waak in neɓiɗ nu nik te ɓa na gene jang waaye ɓa moosanɗi min inhisoh keeh ki.
Ñaañohoh ceem mand na Janes na Jamberes* ɓi hiñohee Musaa. Ɓooɓeem na hiñohe na keeh ki, liiɓohaaciŋ ɓa yahkiɗ te kosiŋ ɓa kos haa. Waaye ɓa kaɗanɗi usiɗ, naand kiŋ ɓa hey hotke ŋ fiki ɓooɓi jen findi wa raakohee ŋ Janes na Jamberes.
Pool dengiɗ Timoote ne yeem ris ŋ kosi a kos
10 Waaye fu nak, fu kerhiɗ jangɗohiŋ ngo baahiɗ, fu markiɗ baahiɗ findi maa pesohe, na ini tah ho kuruk, na kosiŋ ngo, na findi maa muñohe, na waaɗi ŋ waaɗ ɓooɓi, na maañi ŋ maañ ndengɗuk. 11 Fu hotiɗ tolfiɗ ci ŋ tolfiɗu na miskiɗ ci ŋ muñ ŋ Añcos-Pisidi na Ikoñum na Listar. Raakɗi tolfiɗi ŋ tolfiɗuuɗi. Te Heɗi pulɗohiɗ to nga ca jen.
12 Te sah ɓooɓi nik jen ŋ Kiristaani Yeesu, ɓo' nu waaɗ pes pes yurhiɗ na Kooh nga ɗah, a hey tolfiɗasse. 13 Waaye ɓo' ci baahaaɗiici, leyoh ci, uupan uup diig ŋ baahaaɗi, ɓa muuƴɗe ɓinooɓi te ɓa namee muuƴɗu.
Njirñiŋ Fiis ci Hooliɗ ci
14 Ini kaɗ nga ɗa, amba baahiɗ ini fu jang te fu teyɗukka ne wa in wooriɗ. Fu inhiɗ ɓi jangiɗ ɗa wa. 15 Ina fu nikoh komaaki po wi, fu inhiɗ Fiis ci Hooliɗ ci ; ca miniɗ ɗa on ki'inhi na ɓaye ɗa ŋ muc, taamboh ŋ kos Kiristaani Yeesu.
16 Fiis ci Hooliɗ ci jen a Kooh ɓek ca ŋ ɓi fiis ca. Ca raakiɗ njiriñ ŋ jangɗohi ca na jangɗohe keeh ki, ca teeɓohee ini nikɗi keeh, ca kuƴsee ɓoyi tumɗi baahiɗ, ca jangɗee ɓooɓi kipes yurhiɗ, 17 ne ɓoyiŋ Kooh min mit te a tufuk ne a haɓiɗ panguk baahiɗ nu nik.
* 3:8 Janes na Jamberes : wa nikee mbaah ŋ Yawuut ci, ɓa naandsukeesa ini naandsuku ŋ teerndiŋ Pula 7:11-12,22; 8:7,18,19 ɗah, ɓa na ɓeeɗkohe luhusoh ci nik ŋ naandsukeem Janes na Jamberes.