5
Kerhiɗoh na Kooh
1 Kon, ɓoo onuuɗ kiyurah taamboh ŋ kosi ɓoo kos, weɗ tah ɓoo raakiɗ jam na Kooh taamboh ŋ Heɗ ɓoo Yeesu Kiristaa.
2 A yi nam tah po, taamboh ŋ kos, ɓoo minnda rahas baahohi ɓoo na pesohe, wi on ɓoo po ɓoo minnda tufuk ndengiɗ ŋ kosi ɓoo kos, te ɓoo oolkiɗ ne, ɓoo hey raake ɓak ŋ yaki Kooh yak, te weɗ ɓoo na ndamkohe.
3 Ɓaatta nga, ɓoo na ndamkohe miskiɗ ci na rahse ɓoo, laam ɓoo inhiɗ ne miskiɗ na rime muñ.
4 Muñ na rime raak ngor te raak ngor na rime ooluk in ci na haye.
5 Te oolkeem na kaci'ɗoheeɗi, laam Kooh tumiɗ waaɗohiŋ ɗe ŋ keeñ ciŋ ɓoo po ca riifiɗ tem, taamboh ŋ Fuuɗsi Hoolohngaani ɓoo eɗu.
6 Laam, wa ɓoo raakohɗi moocohaaɗ, Kiristaani kaaniɗ wuu sangiɗ ciŋ Kooh ŋ jamanooniŋ wa.
7 Wa yooɓɗi ne ɓo' teyɗuk kaan sagu ɓo' yurhiɗ ; heeƴ na wa miniɗ nik ne ɓo' teyɗukiɗ kaan wuu ɓo' baahiɗ.
8 Waaye Kooh teeɓohiɗ waaɗi a waaɗ ɓoo ŋ ini Kiristaani kaan wuu ɓoo wa ɓoo nik bakaaɗoh.
9 Te ɗiski wa nik, ɓoo nikisɗi bakaaɗoh, ɓoo onuuɗ kiyurah taamboh ŋ ñif miŋ ɗe aamu, kon wa wooriɗ ne ɓoo hey mucɗasse ŋ ayrukiŋ Kooh !
10 Laam, wa ɓoo nik sangiɗ ciŋ ɗe, ɓoo kerhiɗohɗuuɗ na Kooh taamboh ŋ kakaan kiŋ Kuɓkiŋ ɗe, mbaa ɓoo kerhiɗohɗuuɗ ɗah, wa wooriɗ ne ɓoo hey mucɗasse taamboh ŋ kipes kiŋ ɗe.
11 Te wa topɗi ndeem, ɓoo na name ndamkoh Kooh taamboh ŋ Heɗ ɓoo Yeesu Kiristaa, yi kerhiɗohiɗ ɓoo na ɗe kotii.
Aadama na Yeesu
12 E ɓo' yino ɓek bakaaɗ ŋ Adina, kakaan taambohha ŋ bakaaɗ, hayya, po wa reyiɗ ŋ ɓooɓi jen, laam ɓooɓi jen ɓeɗ bakaaɗ.
13 Bala waasiŋMusaa hayan ɗah, bakaaɗ nikee ŋ Adina, waaye Kooh na ambeeɗi bakaaɗ ne waas raakɗi ɗah.
14 Moona, ini kooɗoh ŋ Aadama po ŋ Musaa, kakaan nguurkee ŋ Adina, ali nik ne ɓooɓaŋ jamanoonaam bakaaɗeeɗi sah findi Aadama yi tum ini Kooh sangohee ɗe. Aadama nikee ñaamaariŋ Yi hayee ŋ in laayiɗ.
15 Waaye, ali nik ne Aadama na Yeesu, yi joyee hay, ɓeɗ mand, in ci ɓa tum ɗalohiɗ keeh-keeh. Ini tah po ɓo' laayiɗ kaannda, wa nikee ini ɓo' yino tum, a nikka Aadama, a ɗal waas, waas yino rek, wa ɓayya kakaan. Waaye wa wooriɗ ne, Kooh waaɗ tos ɓooɓi ɗah, onohi a na hee onohe hey uupe yak fuuf yahi Aadama yah. Te Kooh tumiɗ ineem. Ini tah po ɓo' laayiɗ tosuusa, wa nam nik ini ɓo' yino tum, a nikka Yeesu Kiristaa. Wa nikka onohi Kooh baahoh ɓooɓi.
16 Ee, ini tumohaaɗ ciŋ ɓa rim, ɗalohiɗ keeh-keeh. Aadama, a tum bakaaɗ yino dong, atteeniŋ wa mirndohha nik kakaan kiŋ ɓooɓi jen. Waaye ini kaɗ ŋ Yeesu, ali nik ne ɗal-waas ci laayiɗ, a tum in yurhiɗ yino dong, wa onnda ɓooɓi kiyurah.
17 Ee di' ! E ɗali ɓo' yino ɗal waas tah po kakaan wa ɗii nguuruk ŋ Adina. Waaye kiyurhi Kooh baahoh ɓooɓi, weɗ uup yak ini tumohaaɗiŋ Aadama rim. Ineem weɗ tah wa wooriɗ ne ɓooɓi rahas kiyurheem, ɓa hey raake kipes ki heyɗi reehe, te ɓa hey nguurke sagu ini ɓo' yino dong haɓiɗ, a nikka Yeesu Kiristaa.
18 Mbaa, e ɓo' yino dong ɗal waas, jaarra ɓooɓi jen atte'uusa kakaan. Wa mand ɗaa, e ɓo' yino dong nam tum tumohaaɗ yurhiɗ yino, jaarra kiyurhi na onohe kipes reesa ŋ ɓooɓi jen.
19 Findi ɓo' yino sangoh kerhiɗ Kooh, tahha po ɓo' laayiɗ tumuusa bakaaɗoh, ɓo' yino kerhiɗoh Kooh ɗaa, tahha po ɓo' laayiɗ hey tumse ɓo' yurhiɗ.
20 Waasi hayiɗ ne ɗal ci na ɗalse waas ɓaatuk, waaye ɗiski bakaaɗ ci ɓaatkoh, baahohi uup nga ɓaatuk fuuf,
21 ne, findi bakaaɗ nguurkohee ŋ nguuriŋ kakaan, baahoh nguurkoh ɗaa taamboh ŋ kiyurah ne wa ɓay ɓoo ŋ kipes ki heyɗi reehe taamboh ŋ Yeesu Kiristaa Heɗ ɓoo.