4
Kiyurhiŋ Ibrahiima taamboh ŋ kosi a kos
1 Ɓoo kooɗaat misaal ŋ caac ɓoo Ibrahiima. Ɓoo na hee ye woye nga ɗe ? A raak ye ŋ tumohaaɗ ciŋ ɗe ?
2 Nik ne Ibrahiima ambuuɗ ɓo' yurhiɗ sagu tumohaaɗ ciŋ ɗe ɗah, a raakiɗ ndamkaah. Waaye ŋ fiki Kooh wa kaɗohɗi ɗaa ;
3 ŋ ineem Fiis ci woo ye nga ? Ca woo ne : « Ibrahiima kossa Kooh, tahha po Kooh ammba ɗe ɓo' yurhiɗ. »
4 Ɓoyi na pangke, wirndiŋ ɗe na ambseeɗi findi onohi a baahohu, wa ini joy nik.
5 Kooh na one on ɓi sang ɗe kiyurah. Kon, ɓoyi pangukɗi, maanaam, yi tumɗi nakoh ciŋ waasi, te a kos Kooh, Kooh hey marke ŋ kosiŋ ɗe, a amb ɗe findi yurhiɗ.
6 Ŋ ini kaɗ ŋ ineem, Dawuuda namiɗ woo neɓiɗiŋ yi Kooh amb findi yurhiɗ te wa gaƴukɗi ŋ tumohaaɗ ciŋ ɗe. An :
7 « Ɓa neɓɗiɗ,
ɓi fu inah ne ɓa ɗaasuuɗ moɗaaɗiiciŋ ɓa
te bakaaɗ ciŋ ɓa moosuuɗ !
8 A neɓɗiɗ,
ɓoyi Heɗi ambiɗɗi bakaaɗ ciŋ ɗe ! »
9 Neɓɗeem wa wuu nguɗkiɗ ci dong wala nguɗkaaɗiici ɓaah nga ? Ɓoo na woye ne kosi Ibrahiima kos, weɗ tah po Kooh ammba ɗe ɓo' yurhiɗ.
10 A ambu ɓo' yurhiɗ kiɗa ? Ŋ finho nguɗkaŋ ɗe wala bala a nguɗkan ɗah ? Wa raak ɗe nguɗukɗi paaɗ, waam, a nikee nguɗkaaɗi.
11 Kon a rahas mandargaaniŋ nguɗki findi ini teeɓoh kiyurhi a raake. Kiyurheem, a raaka sagu kosi a kosee bala a nguɗkan. Ŋ ineem a miniɗ nik caaciŋ kosiɗ ci nguɗukɗi jen, ne ɓa nam ambu findi ɓo' yurhiɗ.
12 A namiɗ nik caaciŋ nguɗkiɗ ci, nik ne nguɗkiŋ ɓa nguɗuk dong haa, waaye wa hun na taambiɗ kot ciŋ caac ɓoo Ibrahiima ŋ kosi a kose, kot ci a tiindee wa a nguɗukɗi paaɗ.
Gapohi Kooh eɗohan sagu kos
13 Taambiɗ waas tahɗi po Kooh gappa Ibrahiima na ɓi rimkoh nga ɗe ne ɓeɗ raakan Adina, a kiyurhi puloh ŋ kos tah.
14 Nik ne ɓi na taambɗe nakoh ciŋ waasi, ɓeɗ rahsan ini Kooh gapoh ɗah, teemb ndeem, kos na raakisseeɗi njiriñ, gapohi jaar nik ɓarang ɓarang.
15 Waasi, wa ɓay ayrukiŋ Kooh, te ɗiski waas raakɗi, ɗal waas namɗi raak nga.
16 Weɗ tah ɓi na rahse gapohi, ɓa na rahsee wa taamboh ŋ kos, ne wa nik baahoh dong, ne gapohi min nik in wooriɗ wuu ɓi rimkoh ŋ Ibrahiima jen. Gapoheem topɗi ŋ ɓi rahas waasi, waaye wa nam nik wuu ɓi kos findi Ibrahiima, yi caaciŋ ɓoo jen,
17 findi wa fiisohu an : « Ŋ tumiɗ ɗa caaciŋ ɓi cuuɓ laayiɗ. » Te weɗ a nik ŋ fiki Kooh yi a kos, yi na pesɗe kaaniɗ ci te a ɓeeɗkee ini nikɗi, jaar wa nik.
18 Ɗiski ɓo' foogɗi yaakaar, Ibrahiima raakka yaakaar nga, a kossa ini Kooh gapee ɗe, a nikka caaciŋ ɓi cuuɓ laayiɗ, findi a woyohsee wa an : « Ɓi rimkohan nga ɗa hendan ɗaa. »
19 A hoteen ne faaniŋ ɗe kaaniɗ po ƴutiɗ, waam raak ɗe raakiɗ ini reɓ kiis teemet - te a hotta ne rookiŋ Saarata kaaneen ŋ raak kuɓu, waaye ineem tahɗi po kosiŋ ɗe haawsukka.
20 Wa yahrohɗi in ŋ kosiŋ ɗe po a kee raaka liiɓ kanak ŋ gapohiŋ Kooh, waaye kay, a ɓaat ɓaat raak hatil ŋ kosi a kos, a yakiɗta Kooh.
21 A inheen hooliɗ ne Kooh raakiɗ hatili a tumohan ini a gapoh.
22-23 Kon a ineem weɗ tah a ammba ɗe findi ɓo' yurhiɗ, te wa fiisuusa. Waaye a yi dong tah po wa fiisuusa haa.
24 E ɓoo nam tah, ɓoo ɓi Kooh na hee ambe findi ɓo' yurhiɗ, ɓoo ɓi kos Kooh yi hultiɗ Yeesu Heɗ ɓoo.
25 Yeesu yeem eɗohuuɗ ne a kaan wuu bakaaɗ ciŋ ɓoo, a hultiɗuusa ne ɓoo rahas kiyurah.