6
Kaan na Yeesu, pes na ɗe
1 Kon, ɓoo woyan na book ? Ɓoo risaat bakaaɗ ne Kooh uup ɓoo baahoh e ?
2 Muk ! Ŋ ini kaɗ ŋ bakaaɗ, ɓoo kaaniɗ, ɓoo min na pesis ŋ bakaaɗ ?
3 Ɓoo ɓi hooƴu ŋ masmiŋ ɓokti, ɓoo nikka yino na Kiristaani Yeesu jen, ɗu inahɗi ne ɓoo ɓoktu ne kakaan kiŋ ɗe nam nik wiŋ ɓoo e ?
4 Ŋ ɓoktuki ŋ kakaan keem, ɓoo namiɗ uumbu na ɗe ne, findi a hultoh taamboh ŋ yaki Baabi yak, ɓoo nam hultoh ɗaa, pesee pesohaaɗ as.
5 Laam nik ne ɓoo ɓaahiɗ na ɗe kakaan ŋ ɓokti ɓoo ɓoktu ɗah, ɓoo hey name hulit na ɗe, ɓoo ɓaah kipes.
6 Ɓoo inhaat inii : Ɓoo nikee ɓo' wiiriis ɗeɓgaan, ɓoyi ɓoo nikee daaƴuuɗ na Yeesu ŋ kurwaa ne ini nikee bakaaɗ ŋ ɗooƴ ɓoo reehɗu po ɓoo nikissuu ñaam bakaaɗ.
7 Laam yi kaan, bakaaɗ yilfisɗi ɗe.
8 Nik ne ɓoo kaaniɗ na Kiristaani ɗah, ɓoo hey name pes na ɗe, ineem weɗ ɓoo kos.
9 Ɓoo inhiɗ ne Kiristaani hultiɗ po a kaanissanɗi, kakaan minɗisɗi ɗe ali in.
10 Ŋ ini kaɗ ŋ kakaan kiŋ ɗe, a kaaniɗ waas yino po faw te a rahsohisɗi ali in na bakaaɗ ; ŋ ini kaɗ ŋ kipes kiŋ ɗe, a na pese wuu Kooh.
11 Wa mand ɗaa nga ɗu, ambaat ne ɗu kaaniɗ ŋ ini kaɗ ŋ bakaaɗ te ɗu ɓii pes wuu Kooh ŋ niki ɗu nik ŋ Kiristaani Yeesu.
12 Mbaa ɗah, bakaaɗ joyɗi yilif faaniŋ ɗu joy kaan, po ɗu kerhiɗee maɗ-maɗ ciŋ wa baahaaɗiici.
13 Kinaat faɗ cir ciŋ faan ciŋ ɗu po bakaaɗ kee ca tuma ganaay tumoha in yurhaaɗi. Waaye eɗaat haf ɗu Kooh findi pesoh ci kaane, te ɗu eɗ Kooh cir ciŋ faan ciŋ ɗu findi ganaay tumoha in yurhiɗ.
14 Bakaaɗ heyɗi ɗu yilfe, laam waasi yilifɗi ɗu, e baahohiŋ Kooh kilifaaniŋ ɗu.
Faɗ bakaaɗ, teyɗuk nik ñaamiŋ kiyurah
15 An ye ? Ini waasi yilifɗi ɓoo, baahohiŋ Kooh nikka kilifaaniŋ ɓoo, ineem joyiɗ tah ɓoo pesee ŋ bakaaɗ e ? Muk !
16 Ɗu inhiɗ ne ɗu eɗ ɓo' haf ɗu ne ɗu nik ñaamiŋ ɗe te ɗu kerhiɗ ɗe ɗah, ɗu ñaamiŋ ɗe. Ali wa nik bakaaɗi, wi na ɓayohe ŋ kakaan wala kerhiɗ Kooh wi na ɓayohe ŋ kiyurah, ɗu ñaamiŋ wi ɗu teyɗukiɗ.
17 Waaye Kooh corkiɗaah, ɗu nikee ñaam ciŋ bakaaɗ, waaye ɗu teyɗukiɗ ŋ keeñ ciŋ ɗu kotii jangɗohi ɗu rahas.
18 Kooh pulɗiɗ ɗu ŋ bakaaɗ, ɗu ñaam ciŋ kiyurah kotii.
19 Mi na woye na ɗu ŋ woyohaaɗ ɓo', sagu ne ɗu yooɓɗi kerah. Findi ɗu eɗohee cir ciŋ faan ciŋ ɗu ne ɗu ñaamuk hoolaaɗi na baahaaɗi, po ca ɓekka ɗu ŋ baahaaɗi, eɗohaat haf ɗu ɗaa, ɗu ñaamuk kiyurah ne wa ɓay ɗu ŋ eɗ haf ɗu Kooh.
20 Wa ɗu nik ñaam ciŋ bakaaɗ, kiyurah raakeeɗi waas nga ɗu.
21 Wa rimiɗ ɗu ye ? In ci kaci'iɗ ɗu woti. In ceem na ɓekohe kakaan !
22 Waaye ɗiski wa nik, bakaaɗ raakisɗi waas nga ɗu, ɗu ñaam ciŋ Kooh, wa rimiɗ ɗu eɗ haf ɗu Kooh te ŋ mirndaana, wa onan ɗu kipes ki heyɗi reehe.
23 Kombot bakaaɗ na wirndohse kakaan ; waaye onohi Kooh na baahohe wa kipes ki heyɗi reehe ŋ niki ɗu nik ŋ Kiristaani Yeesu, Heɗ ɓoo.