3
Maañ maañ Heɗi hey hee
1 Ɓaah ciŋ ngo ŋ keeñkoh, wii weɗ fiisi kanakɗoh, wi maa kaɓɗohee ɗu. Ca kanak jen mi na naandsee ɗu in ci ɗu jangɗasse, ne ŋ yun kiñaañ kiŋ ɗu po ɗu liiɓee hooliɗ.
2 Ŋ waaɗ ne ɗu naandsuk woo ci woosuuɗ ciŋ Kooh woyee ɗeɓgaan, na nakoh ciŋ Heɗi Mucɗohi, ci Apootar ciŋ ɗu woyee ɗu.
3 Bala ali in, inhaat ne ŋ jamanooci mirndoh, wa hey raake ɓi njembtohoh, ɓa na hee taambɗe kiñin ciŋ ɓa.
4 Te ɓa hey woye ne : « A gapohee ne a hey haye haa e ? Wa nikan kiɗa ? Laam ina baab ci kaanoh poyi, in ci jen ris findi ca mandee ŋ cambaŋ feraŋ Adina. »
5 Ɓooɓeem na alkoh alkohɗuke ne ɗeɓgaan, Kooh fereen Eel na keheƴ taamboh ŋ woo kiŋ ɗe, kehƴeem pulohee ŋ masuɓ, wa nikee ŋ leero masuɓ.
6 Te masmeem weɗ riifɗee adinaana ɗeɓgaan, wa ɗummbaa.
7 Te woo keem, weɗ ɗaak Eel ci na kehƴi woti ndii, ca na sekɗohse yongkaahaŋ mbehaŋ atteena, wi sangiɗ ciŋ Kooh ɗumbohsan.
8 Ɓaah ciŋ ngo ŋ keeñkoh, raakiɗ ini ɗu joyɗi alkoh, weɗ ne mbeh yino ŋ Heɗi mand na kiis junni (1000) te kiis junni (1000) mand na mbeh yino nga ɗe.
9 Heɗi raɓuuɗi ŋ ini a gapohee tum, findi ɓum liiɓoha. A na muñɗee ɗu, a waaɗɗi ne ali ɓo' nga ɗu sooƴ, waaye a waaɗ ne ɓooɓi jen ɓoƴsoh pesohaaɗ.
10 Waaye mbehiŋ Heɗi hayan findi rokoh. Ŋ mbeheem, eel ci hey coote na ɗuuɗ tiitɗohiɗ, in ci nik nga doh po ca yahrukoh, kehƴi na in ci haɓɗu nga jen hey atte'se.
11 Nik ne in ci jen yahrukohan ɗaa ɗah, ɗu joyiɗ pes pes hooliɗ wuu Kooh, te ɗu ŋoɗ nga ɗe.
12 Ɗu sekee te ɗu seesuk mbehiŋ Kooh, wi eel ci jaalohan, ca yahrukoh, te in ci nik nga doh po ca naay.
13 Ɓoo nak, ɓoo ɓii sek eel as na keheƴ as, ɗiski yurah gen, findi Kooh gapoha.
14 Ineem weɗ tah, ɓaah ciŋ ngo ŋ keeñkoh, ŋ seki ɗu na seke mbeheem, ndengɗukaat po Kooh raak ɗu raakaaɗi sikka, a raakuu woyaah nga ɗu, ɗu raak jam na ɗe.
15 Te ambaat ne : Sekɗohi Heɗi na sekɗohe, a waaɗ ne ɓooɓi muc, findi Pool, ɓaah ɓoo yi ɓoo keeñkoh namoh ɗu wa woo ŋ fiisi a kaɓɗoh ɗu, ŋ liiɓohaaɗi moɗiɗi Kooh on ɗe.
16 Ineem weɗ a na woye ŋ fiis ci a na kaɓɗohe jen, ci a na woyohe in ceem. Raakiɗ ɓak nga ca, ca yooɓɗi inhu, tahha po inhaaɗiici na ɓi mokiɗɗi baahiɗ waasi na ɓoƴsohe ɓoƴsoh ini ca tokis. Ɓa na name tum ɗaa na Fiis ci cinooci. Ineem na ɓayee ɓa ŋ ɗumbu.
Nakohi na askohi
17 Waaye ɗu, ɓaah ciŋ ngo ŋ keeñkoh, ŋ woyiɗ na ɗu ŋ in ceem. Wortukaat, kinaat faɗ yurhaaɗiici ɓa nookee ɗu na ɗal ciŋ ɓa po ɗu ndengissuu ŋ kosi ɗu kos.
18 Baahohi Heɗ ɓoo Yeesu Kiristaa, Mucɗohiŋ ɓoo baahoh ɗu, na inhi ɗu inah ɗe, ɓaatkaat ɓaatuk. A yi yakɗaah woti po faw ! [Amiin !]