Fiisi Saaŋ koc kaɓɗoh
Rangsohaani
Saaŋ ɓaahee ŋ Apootar ciŋ Yeesu. Saaŋ na Saak na Piyeer ɓeɗ Apootar ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu. Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh "Yegɗohiŋ Muci Saaŋ fiis", na "Fiisi Saaŋ koc kaɓɗoh" wii, na fiis kanak wiiriis ci a kaɓɗoh, na teerndiŋ "Teeɓ ki", wi na woye ŋ in ci na haye ŋ fikiiri.
Saaŋ kaɓɗohɗi fiisii wuu ɓo' yino wala wuu Jangu sangam, wa mand haa a fiisa ne ɓi jangu laayiɗ mina njirñiɗkoh. Wa miniɗ nik ne a koca kaɓɗoh ŋ Janguuci a adgohee, laam a inheen nikohaaɗiŋ ɓa te a ɓaahndoheen haf ce nga. Janguuceem sah, ceɗ Kiristaani fiis kaɓɗoh ŋ teerndiŋ Teeɓ ki 2–3.
Ɓi ɓo' faɗeen Janguuci, laam ɓa koseeɗi yegɗoh ciŋ Apootar ci. Saaŋ fiis wuu ɓi risee nga ne a ñaah ɓa te a ñiinɗiɗ ɓa kiyooh ci etohu keeh-keeh ŋ kos.
Fiisi Saaŋ koc kaɓɗoh kaɗtiɗoh an :
- Rangsohaani : Woo ki na onohe kipes ki 1:1-4
- Pes ŋ siñaar na waaɗoh 1:5–2:17
- Sangiɗiŋ Kiristaani 2:18-27
- Nik kuɓuuciŋ Kooh 2:28–3:24
- Inhisoh Fuuɗsiŋ Kooh na liiɓiŋ sangiɗiŋ Kiristaani 4:1-6
- Waaɗohiŋ Kooh 4:7-21
- Kos seedeeni Kooh seede Yeesu 5:1-15
- Reehɗohaani 5:16-21
1
Woo ki na onohe kipes ki
1 Ini raakee, kooɗoh ŋ camba poyi, ɓoo kerahhaa, hotoottaa na has ciŋ ɓoo, ɓoo marakkaa baahiɗ te ɓoo laallaa na yaah ciŋ ɓoo, weɗ Woo ki na onohe kipes ki.
2 Kipes keem teeɓohkiɗ te ɓoo hotiɗa. Ɓoo na seede'ee wa te ɓoo yegɗee ɗu wa, weɗ kipes ki heyɗi reehe, wi nikee na Baabi te wa teeɓukka ɓoo.
3 Mbaa ini ɓoo hot, ɓoo kerahhaa, ɓoo ɓii nam ɗu wa yegiɗ, ne ɗu nik yino na ɓoo, ɓoo hun nik yino na Baabi na Kuɓkiŋ ɗe Yeesu Kiristaa.
4 Te ɓoo ɓii fiis ɗu in cii ne sumiŋ ɓoo mit.
Pes ŋ ɗooƴ siñaar
5 Yegɗohi ɓoo kerah ŋ Yeesu Kiristaa te ɓoo yegɗee ɗu wa weɗ ne Kooh a siñaar te ali ñuus nikɗi nga ɗe.
6 Ɓoo woo ne ɓoo yino na Kooh, te ɓoo tiindee ŋ ñuus ɗah, ɓoo na leye te ɓoo pesɗi ŋ keeh.
7 Waaye ɓoo nik ŋ siñaar findi Kooh nikoh ŋ siñaar ɗah, ndeem, ɓoo yino ŋ harmban ɓoo te ñif miŋ Kuɓkiŋ ɗe Yeesu wa ɗii hooliɗ ɓoo ŋ bakaaɗ ci jen.
8 Ɓoo woo ne ɓoo raakɗi bakaaɗ ɗah, ɓoo na ñaañohe haf ɓoo, te keeh ki nikɗi nga ɓoo.
9 Ɓoo teyɗuk bakaaɗ ciŋ ɓoo ŋ fiki Kooh ɗah, Kooh cariɗ oolku te a yurhiɗ. A hey ɓoo ɗaase, a hooliɗ ɓoo ŋ yurhaaɗi nu nik.
10 Ɓoo woo ne ɓoo bakaaɗɗi ɗah, ɓoo na woye ne Kooh leyoh, te woo kiŋ ɗe nikɗi nga ɓoo.