2
Jangɗohoh ci leyoh ci
1 Ɗeɓgaan, ɓi woosuuɗ leyoh nikeen ŋ ɗooƴ cuuɓiŋ Israayel ; wa nam mand ɗaa, ɓi jangɗohoh leyoh hey name nik ŋ harmban ɗu. Jangɗohoh ceem hey ɓeke, ŋ ɗooƴ jangɗoh ciŋ ɓa, liiɓohaaɗ ci na ɓaye ɓo' ŋ muuƴ ; ɓa hey kee po ɓa taas Heɗi tos ɓa. Ŋ ineem, ɓa ɓek haf ɓa ŋ muuƴi gaawan ɓa sooƴiɗ.
2 Laayiɗ hey ɓa taambɗe ŋ tumohaaɗ ciŋ ɓa sepƴiɗ ci. Ɓa hey tahe po waasiŋ keeh ki ɓasu.
3 Waaɗi ɓa waaɗ kopor hey tahe po ɓa feree lee, ɓa ñaañohee ɗu na ca. Atte'uukiŋ ɓa cambiɗ maañ, te sooƴɗuukiŋ ɓa tufkiɗ.
4 Laam Kooh faɗɗi sah malaakaaci bakaaɗe, a njaf ca ŋ nunga topaaɗiina, a tokka ca na ceen ŋ ñuus tuɗ po ŋ mbaɗnaŋ atteena.
5 A faɗɗi sah adinaana ɗeɓgaan, waaye ŋ jamanoona a ruhsiɗoh masma laayɗa ŋ adinaani riifee na sangiɗ ciŋ ɗe, a mucɗiɗ Noohin na ɓo' yasna-kanak wiiriis, Noohin yi woyee ɓooɓa ne ɓa yurhaat.
6 Kooh atte'iɗ kur-taah ci kanak ci Sodom na Gomor, a hoomiɗta ca, po ca nikka misaal ŋ sangiɗ ciŋ ɗe na haye.
7 Waaye a mucɗiɗ Loot yurhiɗi, yi raakee ini misik ɗe lool ŋ cakaaya ɓooɓa yurhaaɗiicaam nikohe.
8 Loot genee ŋ ɗooƴ ɓa, a yi a nikee ɓo' yurhiɗ. A meeɗta raak miskiɗ noh na wek sagu tumohaaɗ caŋ ɓa moɗaaɗiica a hotee, a kerheeɗa ca.
9 Mbaa Heɗi inhiɗ findi a mucɗohan ɓi ŋoɗ nga ɗe po ɓa pul ŋ miskiɗ ci, te a ambiɗ yurhaaɗiici, ɓa na sekɗohse mbehaŋ atteena ne ɓa mbugalu.
10 A uupan mbugal ɓi na taambɗe kiñin ciŋ ɓa ŋ waaɗ-waaɗ usɓiɗ, ɓa heeffa kikilifaakiŋ ɗe. Jangɗohoh ci leyoh ceem, ɓa ɓo' yegiɗ haf ɓa, te ɓa yaksiɗukka, ɓa nupɗi sah ɓas yakɗuuɗ ci.
11 Te ŋ hot malaakaaci sah na yambeeɗi yakɗuuɗ ceem na woo ɓaseeh ŋ fiki Heɗi, te moona malaakaaci ceɗ uupiɗ yakɗuuɗ ceem doole na hatil.
12 Waaye ɓeɗ, ɓa mand na ɗoopaat ci raakɗi hel, ci na taambɗe yeg-yeg ciŋ ca, ca rimu ne ca ambu, ca apu ; ɓa na ɓase in ci ɓa inahɗi. Ɓa hey name sooƴ,
13 wa nik wirndiŋ yurhaaɗiikiŋ ɓa.
Mbalay na noh cong, weɗ ini neɓ ɓa. Ɓa cohha na ɗu ne ɗu ɓaah kañam ɗah, ɓa na kaci'ɗohe kaci'ɗoh, ɓa sepeƴnukaah, ɓa na raake neɓiɗ ngaŋ lee ciŋ ɓa.
14 Has ciŋ ɓa na gene waak ɓitɓi ɓa njaaloo'an na ɗe, te ɓa minɗi doyiɗ bakaaɗ, ɓa na ñaañohe ɓooɓi kos ciŋ ɓa ndengɗi. Ɓa mokɗiɗ waaɗ kopor ; ɓa alku'iɗ.
15 Ɓa faɗiɗ waasi yurhiɗi, ɓa muuƴiɗ, ŋ taambɗi ɓa taambiɗ waasiŋ Balaam, kuɓkiŋ Bosor, yi waaɗee eɗu kopor po a tummba yurhaaɗi.
16 Waaye a ngasuusa ŋ ɗali a ɗal waasi : A mbaam, yi minɗi woo, a yi woo findi ɓo', a faɗɗukohha woosuuɗeem naandohaaɗi a waaɗee tum.
17 Jangɗohoh ci leyoh ceem, ɓa cul raakaaɗi masuɓ, suti puuɗsi na coottohe, Kooh kooɗkiɗiɗ ɓa ɗisik ñuusiɗ tuɗ.
18 Ɓa na ñaañohe ɓi ɓa na muuƴɗe na woo ciŋ ɓa yaksiɗkohaaci, woo ci ɓo' minɗi kooɗoh in. Na woo ceem, ɓa nookee ɓi han puloh ŋ mboolndiŋ muuƴiɗ ci, ɓa ɓekee ɓa ŋ cakaay.
19 Ɓa gapee ɓa raak haf ɓa, te ɓeɗ ŋ haf ɓa ɓa ñaam ciŋ waaɗ-waaɗ ci na yahrohee ɓa, laam in nu min ɗa ɗah, fu ñaamiŋ wa.
20 Nik ne ɓa inheen Yeesu Kiristaa, Heɗi na Mucɗohi, po ɓa pulla ŋ hoolaaɗiiciŋ Adina, po ƴutta, ɓa longissa ŋ hoolaaɗiiceem, ca minnda ɓa ɗah, mirndohaaɗiŋ ɓa uupan moɗaaɗi cambohaana.
21 Ɓa inah waasi yurhiɗi po ƴut, ɓa suungɗuk nakoh ci hooliɗ ci ɓa rahas ɗah, e inhaaɗi wa ngisohee nga ɓa.
22 Woyohaaɗii keeh nga ɓa : Ɓuu fi dokkissiɗ ŋ in ca a huke. Na wii : Mbaam-huk, ali fu ɓook ɗe ɓook, a walañkis ŋ ndapalaaƴ mi.