13
Pesohaaɗ moɗiɗ
1 Waaɗtiɗohiŋ ɗu genaat gen. Ɗu jen, e ɗu ɓaah.
2 Kinaat alkoh taambkoh ɓi na haye nga ɗu. Raakiɗ ɓi meeɗa tum po ɓa daliɗta ɓi malaaka te ɓa inheeɗi ne ɓa daliɗ malaaka.
3 Naandsukaat ɓi taƴu, po wa mand haa ne ɗu ɓii na ɓa ŋ kaso.
Naandsukaat ɓi nik ŋ mbugal, po wa mand haa ne e faan ciŋ ɗu na mbugalse.
4 Ɓooɓi jen ambaat sey, ɓa eɗa cir te ƴaar top ŋ ɓitiice, ɓitiɓ top ŋ ƴaar ce ; laam Kooh hey atte'e mbalayoh ci na njaalo'oh ci.
5 Ŋ pesohaaɗiŋ ɗu, kinaat waaɗ kopor lool ; ini ɗu raak doyaat ɗu. Kooh sah woyiɗ ŋ Fiis ci Hooliɗ ci ne : « Ŋ alkohanɗi ɗa te ŋ faɗanɗi ɗa muk. »
6 Weɗ tah ɓoo miniɗ woo wooriɗ woo kii :
« Heɗi a yi ɓaatɗohohiŋ ngo,
ŋ heyɗi neƴƴohe ali in.
Ɓo' min ndo ye tum ? »
7 Naandsukaat ɓi adgohee ɗu, ɓi inhiɗ ɗu woo kiŋ Kooh. Markaat findi ɓa pesohe, na findi kipes kiŋ ɓa reehoh, ɗu altiɗkoh ɓa ŋ kosa ɓa kose.
8 Yeesu Kiristaa ɓoƴsukohɗi ; findi a mandee wotɓa, a mand ɗaa woti te a mandan ɗaa po faw.
9 Kinaat ñaañohu ɗu jangɗasse ɓi jang mbalay ɗalohiɗ na ini ɗu inhiɗasse. Wa moɗiɗ ne baahohiŋ Kooh ɓaat keeñ ciŋ ɗu hatil, waaye, ca joyɗi ɓaatohu hatil na nakoh ci kaɗ kañam. Laam nakoh ceem moosɗi njirñoh ɓooɓa taambɗee ca ali in.
10 Ɓoo raakiɗ ɗisik seeƴkoha wi fu inah ne, seeƴkiɗoh ciŋ Kahan Kooh ŋ Ambtiɗohi Koc joyɗi kooɗoh kañam kiŋ ɓa nga.
11 Findi seeƴkiɗohi yakki meeɗ tum, ne a seeƴkeesa wuu bakaaɗ ci ɗah ; a meeɗ aam ñif miŋ ɗoopaat ci ŋ Ɗiska Hoolohngaana, waaye ca na ñamseeɗi, ca meeɗ meeɗ dohu ŋ bilaf fa.
12 Weɗ tah po miskiɗaŋ Yeesu nammba raakoh ŋ finho kur ka, ne a hooliɗ ɓooɓi na ñif miŋ ɗe, ɓa nik ɓo'-Kooh.
13 Mbaa ɓoo pulaat, ɓoo kaɗ coha na ɗe ŋ bilaf fa, ne ɓoo teyɗuk ɓasu na ɗe.
14 Laam ɓoo raakootɗi ndii kur ki risan po faw, waaye ɓoo na waake wi na haye.
15 Kon ɓoo taambohaat ŋ Yeesu, ɓoo gen ŋ yakiɗ Kooh, wa nik seeƴki wuu Kooh. Weɗ ne ɓoo ƴeekee ƴeek ci na teeɓohe ne ɓoo hun na ɗe.
16 Kinaat aloh tum in baahiɗ na ɓaah ini fu raak na ɓooɓi, in ceem ca findi seeƴuk ci neɓ Kooh.
17 Kerhiɗaat ɓi adgoh ɗu te ɗu teyɗuk ñaak nga ɓa ; laam ɓeɗ na niiɗe ini nik ŋ ɗooƴ keeñ ciŋ ɗu te Kooh meeksan ɓa findi ɓa tumohe. Mbaa ɗah, ini ngisoh nga ɗu weɗ ne, ɗu kerhiɗ ɓa ne ɓa min tum pangkiŋ ɓa na keeñ soosiɗ po ɓa raakuu aay-keeñ nga.
18 Kiimɗaat ɓoo Kooh, wa wooriɗ ɓoo ne nikohaaɗiŋ ɓoo, wa ɗaa. Ɓoo waaɗ haɓiɗ baahiɗ ŋ in ci jen.
19 Mi yii nak ɗu keeh-keeh ne ɗu kiimiɗ to, po ŋ min hayis nga ɗu findi wa uup gaawoh.
Kiimi
20 Kooh yi na onohe jam,
a hultiɗiɗ Heɗ ɓoo Yeesu,
yi fu inah ne, na ñif miŋ ɗe,
a tufkiɗiɗ ambtiɗohi genan gen,
a nikka niiɗohiŋ ɓoo yakki.
21 Kooh onaat ɗu
po ɗu min tum in nu baah ɗah,
ne ɗu haɓiɗ ini a waaɗ.
Te a tumee nga ɓoo ini a teyɗuk,
taamboh ŋ Yeesu Kiristaa
yi yakɗaah po faw.
Amiin.
Askohi
22 Mi yii kiim ɗu ɓaah ciŋ ngo, ne ɗu amb woo ceem ; ñam ñaah ɗu na ca, ŋ woo ɗu ca ŋ fiis rohƴiɗ.
23 Inhaat ne Timoote yi ɓaah na ɓoo ini ɓoo kos, faɗsuuɗ. A teel hay ɗah, ŋ hey hune na ɗe, ŋ hey ɗu marke.
24 Kañɗiɗaat to ɓi adgoh ɗu jen na ɓo'-Kooh ci jen. Ɓi Itaali ɓii kañiɗ ɗu.
25 Baahohiŋ Kooh nikaat na ɗu jen.