12
Muñ ngaŋ koɗ
1 Ŋ ineem, ɓoo hotiɗ ne, ɓa seede laayoh na laayoh ɓeɗ wil ɓoo, kon ɓoo kocukohaat na nup kocukohi ɓoo degu te ɓoo muñ po ɓoo ree. Tahha po ɓoo kaambsukaat raanoo raan, weɗ ne ɓoo saɓsukoh na bakaaɗ nu nik, laam bakaaɗ na longɗohe yooɓoh na yooɓoh.
2 Ɓoo nupee ɗah, ɓoo markaat ŋ Yeesu yi tufkiɗ kosi te a mitiɗtaa. A hotee neɓɗi a degɗassee ne a heya rahse, weɗ tah ɗe muñ ŋ kurwaana te a marakɗi ŋ kaciika. A ɓoofiɗ kotii ŋ ñaahmaŋ ɓoofohaanaŋ Kooh.
3 Markaat ŋ yi muñee sangi bakaaɗoh ci sangee hun na ɗe, ne ɗu yaaɓuu po ɗu kee goya.
4 Leberiŋ ɗu na bakaaɗ, ñif miŋ ɗu aamukɗi nga paaɗ.
5 Ɗu alkoh alkoh deng ci ɗu dengse po haa kuɓu e ? Findi Fiis ci woyoh ne :
« Kuɓu, kina heef koɗiŋ Heɗi,
te a woytohee ɗa ɗah, kina faɗsuk.
6 Laam, Heɗi na koɗe ɓoyi a waaɗ,
te ɓi a teyɗuk findi kuɓu jen, ɓeɗ a na laɓe leraw. »
7 Muñaat miskiɗ ci Kooh na degee ɗu, a na degee ɗu ca ne a koɗ ɗu. Laam a amb ɗu findi kuɓuuciŋ ɗe. A yinde kuɓu a yi baabiŋ ɗe na koɗeeɗi ?
8 Koɗi ɓooɓi jen na koɗse, nik ne wa ɗaliɗ ɗu ɗah, ɗu kuɓu keeh-keeh haa, ɗu kuɓu lewaaɗi.
9 Ɓoo jen baab ci rim ɓoo na koɗe ɓoo koɗ te ɓoo kerhiɗiɗ ɓa ; ŋ woyisɗi ɗa Kooh, Baabiŋ ɓoo ; ɓoo kerhiɗaat ɗe, ɓoo min pes.
10 Baab ciŋ ɓoo na koɗe ɓoo ɓi kiis rek, ŋ findi ɓa hotoh ; Kooh nak, koɗi a na koɗe ɓoo, wa ini baah nga ɓoo ne a ɓaahndoh ɓoo ŋ hool kiŋ ɗe.
11 Wa keeh ne ɓo' koɗsee ɗah, wa na nikeeɗi in neɓiɗ nga ɗe, wa in miskiɗ ; waaye wa na mirndohe rimiɗ ɓi teyɗuk taamb nga kipes yurhiɗ huniɗ na jam.
12 Weɗ tah, poɗsaat yaah ciŋ ɗu neeɓohiɗ ci
na ƴii ciŋ ɗu sangiɗ ci.
13 Haɓɗiɗaat kot ciŋ ɗu waas yurhiɗ,
ne wi na yiiɓe nga ca ɗiindkohuu,
waaye wa kooɗoh wir nga.
14 Waakaat jam na ɓooɓi jen, ɗu waak hool kiŋ ɓo'-Kooh. Ɗal hool keem ɗah, ali ɓo' hotanɗi Heɗ ɓoo.
15 Wortukaat po ali ɓo' tasuu finho ŋ ini kaɗ ŋ baahohi Kooh na baahohe. Wortukaat po ali ɓo' nga ɗu kinaat mand na niir baahaaɗi, wi kifis na in moɗaaɗi po wa kee kaɓa ɓo' laayiɗ ŋ aay kiŋ wa.
16 Wortukaat po ali ɓo' kinaat nik njaalo'oh wala a heef in ciŋ Kooh, findi Esaaw yi lofkohee waɗi a joyee rahas findi saaw sagu noɗ yino dong.
17 Ɗu inhiɗ ne ŋ mirndaani, wa a waaɗ lam barkeeniŋ baab ɓa, a teyɗukɗuuɗi. Inwaaso ammba ɗe nga po a fuɗeeɗa, waaye ŋ ɓarang ɓarang.
Tangooci kanak ci : Sinaay na Siyong
18 Ɗu nak, ɗu reɓ ŋ tangoori min laalu haa. Tangooriŋ Sinaay caac caŋ ɗu reɓee, wi riifee na yongkaah na puuɗis, wa ñuussa tuɗ,
19 wa ɗiiɗɗeeɗa sagu kuluɓ roofiɗ, na hooso feyohiɗ po ɓa kerhee nga kiimeeɗa ne, ɓa waaɗisɗi kerah hoosooreem.
20 Ɓa kaañeeɗi kaañeeɗi nakohii : « Ali ɗoopaat sah laal tangoori, a hey tapsohse atoh po a kaan. »
21 Ina ɓa hotee tiitɗoheen po Musaa woosa ne : « Ŋ tiitiɗ po mi yii saakɗoheeɗa. »
22 Waaye ɗu, ɗu reɓ tangooriŋ Siyong, kur kiŋ Koohi na pese. Weɗ Yerusalemaŋ Eel ca, mbuumbaaya ɓi junni junni malaaka cohoh.
23 Ɗiski ɗu reɓ, ɗu reɓ ŋ cohiŋ saaw ci, ɓeɗ ɓi tiik ciŋ ɓa fiisu ŋ Eel ci. Ɗu reɓ ŋ Kooh yi na atte'e ɓooɓi jen. Ɗu reɓ ŋ ruuh ciŋ ɓooɓi yurhiɗ ci te ɓa mitɗuusa.
24 Ɗu reɓ ŋ Yeesu yi nik ŋ harmban ɓoo na Kooh ŋ Ambtiɗohi Asi ; ɗu reɓ ŋ ñif miŋ ɗe lisu te ini ñif meem woo, wa uuppa baah ini ñif miŋ Abel woye.
25 Wortukaat ! Kinaat ɗikɗuk Yi na woye na ɗu. Ɓi sangee sikɗuk yi woyee na ɓa ŋ kehƴi, ɓa fuseeɗi ŋ mbugal. Ɓoo nak, Kooh na woyohe na ɓoo ŋ Eel ci, kon ɓoo suungɗuk ɗe ɗah, wa wooriɗ ne ɓoo hey mbugalse.
26 Waam hoosooriŋ ɗe yoondɗee kehƴi, waaye wii a gapkiɗ ŋ Fiis ci Hooliɗ ci an : « Tasiɗ waas yino, mi, ŋ hey yoondɗisse kehƴi, wa nikan weɗ dong haa, waaye na Eel ci. »
27 Ŋ woo ki a woo an "tasiɗ waas yino", ineem weɗ teeɓoh ne in ci min yoondɗu, ci hotkang, hey coote, ci minɗi yoondɗu ris.
28 Ini kaɗ nga ɓoo, ɓoo rahas Nguuri minɗi yoondɗu, ɓoo genaat corkiɗ Kooh, weɗ na tahe ɓoo min ɗe ñaamuk ñaamki neɓ ɗe, wa hun na eɗ ɗe cir na nup ɗe.
29 Laam Koohiŋ ɓoo nam nik yongkaahi na hoomɗe.