Fiisi Saak kaɓɗoh
Rangsohaani
Raakiɗ ɓo' laayiɗ ɓi teeku Saak ŋ Fiis ciŋ Ambtiɗohi Asi. Yeesu sah raakiɗ Apootar kanak teeku Saak, waaye Saak yi fiis kaɓɗohii nikee taambɗoh ŋ Yeesu.
Yeesu raakeen taambɗoh ƴaar nikiis, Saak na Suseef na Simong na Yuud. Ŋ camba, ɓa koseeɗi Yeesu. Waaye ŋ finho hultiŋ Yeesu, ɓa kossa. Yeesu teeɓkee Saak ŋ finho hultiŋ ɗe. Ŋ in gaawiɗ, Saak nikka ŋ ɓi adgoh Janguuniŋ Yerusalem. Pool woyiɗ tiikiŋ ɗe ŋ kaɓɗohi a fiis ɓi Galaat. Tiik ce namiɗ woyu ŋ fiisi Yuud kaɓɗoh. Yuud yeem namee nik taambɗoh ŋ Yeesu.
Wa miniɗ nik ne Saak fiis kaɓɗohii bala Pool fiisan kaɓɗoh ciŋ ɗe koc te ini uup ŋ kaɓɗohii wa wuu Yawuut ci kosiɗ ci. Teerndii na woye ŋ in laayiɗ wa dokkisse nga ca waas laayiɗ : miskiɗ ci na kafind ci nik ŋ kipes kosiɗ, liiɓohaaɗ moɗiɗ, miskiɗ ciŋ raakiɗ ci na raakaaɗiici na etohi ɓo' etoh keeñ hooliɗ na tumohaaɗ hooliɗ.
Fiisi Saak kaɓɗoh kaɗtiɗoh an :
- Kañɗoh 1:1
- Ɓak naa nu nik woyuuɗ waas yino 1:2-11
- Miskiɗ ci na kafind ci 1:12-18
- Keeñ hooliɗ na tumohaaɗ hooliɗ 1:19-26
- Miskiɗ ciŋ raakiɗ ci na raakaaɗiici 2:1-13
- Keeñ hooliɗ na tumohaaɗ hooliɗ 2:14-26
- Raak liiɓ moɗiɗ ŋ ini yurah ŋ woo 3
- Raak keeñ hoolaaɗi na ɓekke lahtoh na maɗ raak 4
- Kooh hey atte'e raakiɗ ci na torhiɗe ɓooɓi5:1-6
- Nakoh laayiɗ 5:6-20
1
Kañɗohi
1 Mi yi Saak, ñaamiŋ Kooh na Heɗ ɓoo Yeesu Kiristaa, mi yii fiis kaytii ne ŋ woo na ɗu, ɗu ɓi cuuɓ ci ndaŋkiyaah na kanak ci (12) nik ɓooɓiŋ Kooh, te ɗu pasarkohha ŋ adinaani. Ɗu moɗ jam e ?
Kos ndengiɗ
2 Ɓaah ciŋ ngo, miskiɗ nu ɗu min degu ɗah, ambaat ne wa jam yakak nga ɗu ;
3 ɗu inah ne kosi ɗu kos hey markiskasse, na ɓi miskiɗ, te miskiɗ ceem ceɗ na ndengɗee ɗu.
4 Ini ndengɗeem na rimɗee ɗu, joy joy kaɗ po wa ree, nde ɗu nik ɓo' mitiɗ, ali in haawsukuu nga ɗu.
5 Te ɓo' nga ɗu tas raak liiɓohaaɗ moɗiɗ ɗah, a kiimaat Kooh yi na one ɓooɓi jen wa moɗoɗ te a na lahtukeeɗi nga ; a hey ɗe wa one.
6 Waaye a kiimohaata kosohaaɗ mitiɗ, a raakuu hel kanak ŋ Kooh, laam ɓoyi na raake hel kanak ŋ Kooh, a mand na ginaah ciŋ cookmi puuɗsi na meeɓe, faane.
7 Ɓo' mand ɗaa, a kinaat liiɓ ne a hey rahse in ngaŋ Heɗi.
8 Ɓoyeem, a ɓo' siisndiɗohiɗ, a minɗi oolku ŋ ali in ŋ in ci a na haɓɗe.
9 Ɓo' nu ɓaah nga ɓoo, te yaahiŋ ɗe rahsiɗɗi finhooriŋ ɗe ɗah, a neɓsaat ŋ meeɓi Kooh meeɓ ɗe.
10 Te ɓoyi raak, a neɓsaat ŋ ruhsiɗi Kooh ruhsiɗ ɗe. A inhaat ne a hey seeye findi pos paangi na seeyohe.
11 Nohi dammba ɗah, paangfi na suye suy, pos ci yaɗ, moɗ kiŋ ca coot. Wa mand ɗaa, ɓoyi raak na yaɗohe ɗaa ŋ tiindɗohaaɗ ciŋ ɗe, a coot.
12 Ɓoyi gen ndengɗukee ŋ miskiɗ, a neɓɗiɗ ! A hey pule nga na ndam, a rahas raayaani, weɗ kipes ki Kooh gap ɓi waaɗ ɗe.
13 Ɓo' nu waaɗ-waaɗiŋ ɗe ɓek po a waaɗ tum in moɗaaɗi ɗah, a kinaat woo ne a Kooh na tumɗukohee ɗe wa. In moɗaaɗi minɗi ɓek Kooh ŋ in te Kooh ŋ haf ce na ɓekeeɗi ali ɓo' ŋ in moɗaaɗi.
14 Waaye yaa nu nga ɗah, a kiñin kiŋ ɗa na nookee ɗa, wa yurhiɗ ɗa ŋ ini fu waaɗ.
15 Waaɗ-waaɗi baahaaɗiineem weɗ na nike rook, wa ɓasil bakaaɗ ; bakaaɗeem weɗ na kaɗe po wa yak, wa eɗoh kakaan.
16 Ɗu ɓi ɓaah ciŋ ngo ŋ keeñkoh, kinaat ɗal ŋ inii :
17 in baahiɗ nu ɗu rahas na in mitiɗ nu ɗu eɗu ɗah, wa puloh ɗafki. Wa ruhsoh ŋ Baabi leer ci puloh nga ɗe, yi na leerɗeeɗi woti, kim a ñuusiɗ ; a na ɓoƴsukoheeɗi.
18 Ŋ waaɗ-waaɗiŋ ɗe, taambohha ŋ woo ki keeh ki, a tumiɗ ɓoo kuɓuuciŋ ɗe, ne ɓoo nik waɗiŋ ɗe koc ŋ in ci a fer jen.
Sikɗuk woo kiŋ Kooh te fu pesoha
19 Ɗu ɓi ɓaah ciŋ ngo ŋ keeñkoh, inhaat inii : Ɓo' nu nik ndengɗukaat, a sikɗuke, a gaawuu woo te a yooɓuu ayruk.
20 Laam, ɓo' ayrukiɗ na tumeeɗi in yurhiɗ ŋ fiki Kooh.
21 Weɗ tah, wolaat in ci hoolaaɗiici nik nga ɗu jen na añaand ki laayɗi. Te na eɗef, ɗu teyɗuk woo ki ɓeku nga ɗu, weɗ min ɗu muciɗ.
22 Kinaat top ŋ sikɗukiŋ Woo ki dong, ineem, wa ñaañoh haf fu ; waaye pesohaata.
23 Ɓoyi na sikɗuke Woo ki te a pesohuu wa, a mand na ɓoyi na seetnduke ;
24 a marak haf ce ŋ seetu po ƴutta, a pulla, a jaarra alkoh findi a mand.
25 Waaye ɓoyi na marke ŋ waasi mit te wa faɗsee ambuuɗ ci, a ŋoɗ nga, a sikɗukuu wa ne a alkoha, waaye a pesohee wa, ɓoyeem hey barke'ɗasse ŋ in ci a na haɓɗe jen.
26 Ɓo' nu liiɓ ne a yi ŋ waas-Kooh, raak ɗe ambɗi nguɓiŋ ɗe ɗah, a na ñaañohe haf ce, te waas-Koohiŋ ɗe ɓarang ɓarang.
27 Waas-Koohi hool te wa raakɗi riiɓ ŋ fiki Kooh, yi Baabi, weɗ ne fu taambkohee yaɗuuci na ɓitiɓ ci ƴaar ciŋ ɓa kaan ŋ miskiɗ ciŋ ɓa, te fu namee penduk in ci hoolaaɗiiciŋ Adina.