20
Pool kaɗiɗ Maseduwaan na Geres na Torowaas
1 Wa ɗuuɗa seem, Pool cohɗohha taalubeeca, a ñaahha ɓa, ƴutta a askohha na ɓa, a kaɗta Maseduwaan.
2 Wa a ree, a wileeɗaa, a woyeeɗa na kosiɗ ca woo laayiɗ, a ñaaheeɗa ɓa, po findi a reyoh Geres.
3 A nikka nga caɓin kaahay. Wa a kaɗ po a heeɗa aase bato ne a kaɗ Siri, a kerahha ne Yawuut ca ɓa ɗaa hotoh ŋ ɗooƴ ɓa ne ɓa ap ɗe, a hotta ne a joy wiiruk Maseduwaan, a lahoh nga.
4 Ɓi hunee na ɗe nikee Sopateer kuɓkiŋ Pirrus ya genee Beree, na Aristarka na Sekundus ɓa genee Tessalonik, na Gayus ya genee Derbe, na Timoote, na Tisikos na Torofiim ɓa genee Asi.
5 Ɓeɗ ɓii, ɓeɗ adgee ɓoo Torowaas, ɓa sekeeɗa ɓoo nga.
6 Ɓoo nak, wi feetiŋ Mbuuruuci raakaaɗi lawiir ci reeh, ɓoo aasohha bato ŋ Filippi, ɓoo tummba neeh yatuus ŋ waas. Ɓoo raakka ɓa ŋ Torowaas, ɓoo nikka nga neeh yasna-kanak.
Pool hultiɗiɗ Etikus ŋ Torowaas
7 Ŋ mbehi na iɗsiɗkohse na niina, ɓoo cohha ne ɓoo hun ñam mbuurndi, Pool woyeeɗa na ɓooɓa nikee ŋ ɗiska. A joyee coot ŋ Kooh-wiisiina, tahha po a taalndiɗta a woyeeɗa po ŋ ndengelnde weka.
8 Ɓoo cohee ŋ tuuƴ ŋ ɗafkaŋ kahna, laampa laayiɗ fuuɗseen nga.
9 Komaaki ƴaar teeku Etikus nikee ɓoofiɗ ŋ palaŋteera, a pani'uusa keeh-keeh, raak Pool taalndiɗiɗ woyeeɗa in maañiɗ. Wi a neeh neeh nooɗiɗ, a eltukohha ndaam, ŋ tuuƴa kaahayɗoh ŋ ɗafkaŋ kahna, a keennda. A meeɓseeɗa, waaye raak ɗe kaaniɗ.
10 Weɗ Pool ruhsoh, a raɗukka nga ɗe, a morgiɗukka ɗe, a woosa ne : « Kinaat jaahiɗ ! A yi pes ! »
11 Ƴutta, Pool rapissa ŋ ɗafka, a poɓtohha mbuurnda, ɓa ñammba. Ŋ finho ineem, a taalndiɗta a woyeeɗa in maañiɗ po findi nohi puloh, a cootta.
12 Ini kaɗ ŋ kuɓka ƴaara, a ɓayu kahan ɓa peseeɗa moɗoɗ, ɓooɓa jen giiffa keeh-keeh.
Pool pulohiɗ Torowaas, a kaɗta Mileet
13 Ɓoo nak, e ɓoo adug coot ne ɓoo aas bato kaɗ Assos, ɗiska ɓoo cohan na Pool, ɓoo ɓay ɗe. A woyee ne a heyɗi taambe ŋ cookmi, a na hee taambe ŋ kehƴi po nga.
14 Wa a raak ɓoo ŋ Assos, ɓoo hunnda na ɗe ŋ bato, ɓoo taalndiɗta Mitileen.
15 Ɓoo kurkohissa ndaam, ɓoo taalndiɗta ŋ cookmi, ŋ Kooh-wiisiina ɓoo teemmba ŋ Kiwo. Kooh wiisissa, ɓoo reesa Samos, wa taambis nga, ɓoo hannda ree Mileet.
16 Pool woyee ne a sereendkan sereenduk Efes, a tufkanɗi nga po a kee maaña ŋ Asi. A seeskee seesuk ne Paantakot min ɗe raak ŋ Yerusalem.
Pool askiɗ yakak caŋ Janguunaŋ Efes
17 Wa ɓoo ree Mileet, Pool woosohha ɓa adgohee Janguunaŋ Efes.
18 Wi ɓa hay, a woosa ɓa ne : « Ɗu inhiɗ findi ŋ nikohee na ɗu ŋ jamanooni ŋ nik na ɗu jen, ina kooɗoh mbehi ŋ kocoh ɓek kot ciŋ ngo ŋ Asi.
19 Ŋ pangkiɗiɗ Heɗi, ŋ ƴissuutiɗta haf fo keeh-keeh, wa hunnda na ɓi muhun, ŋ raakiɗ miskiɗ sagu Yawuut ci hotohee ŋ ɗooƴ ɓa ne ɓa tum mbo in.
20 Ɗu inhiɗ ne ŋ moosɗi ɗu ɗasɗoh ali in, ŋ in ci min ɗu njiriñ. Ŋ yegɗiɗ ɗu woo kiŋ Kooh, ŋ jangiɗta ɗu ŋ fiki ɓooɓi jen na ŋ ɗooƴ kahan ci.
21 Ŋ moosɗi faɗoh woytoh Yawuut ci na ɓi nikɗi Yawuut ne ɓa ɓoƴsohaat tumohaaɗ, ɓa hay ŋ Kooh te ɓa kos Heɗ ɓoo Yeesu.
22 Ɗiski wa nik, mi yii kaɗ Yerusalem, e Fuuɗsi Hoolohngaani hiir ro nga ; ŋ inahɗi ini rahsan ndo ŋ ndaam.
23 Waaye ŋ inhiɗ daal ne ŋ kur-taah nu ŋ aasoh ɗah, Fuuɗsi Hoolohngaani woo so ne kaso na ɓi miskiɗ laayiɗ ca ɗaa sek ko nga.
24 Mi nak, kipes kiŋ ngo ɓitɗi so ; nga so, wa raakɗi njiriñ. Ini nikiɗ to weɗ ne ŋ waaɗ kaɗ po ŋ reehɗohaana, ŋ mitiɗ pangki Yeesu Heɗi dengkoh ho, weɗ ne ŋ woo Yegɗohiŋ Muci na teeɓohe baahohiŋ Kooh.
25 Ɗiski wa nik, ŋ inhiɗ ne ɗu hotissanɗi so, ɗu jen, ɗu ɓi inah ne ŋ lahiɗ nga ɗu, ŋ woyeeɗa ɗu Nguuriŋ-Kooh.
26 Weɗ tah mi yii woo ɗu wa woti : Ŋ hooliɗ nga, ɓo' nu muuƴ nga ɗu ɗah, a ñam haa.
27 Laam ŋ woyiɗ ɗu ini Kooh kooɗuk tum, ŋ ɗasɗohɗi ɗu ali in nga.
28 Tufkaat ŋ haf ɗu, ɗu tufuk gati Fuuɗsi Hoolohngaani dengkoh ɗu, ne ɗu niiɗa. Findi niiɗoh, taambkohaat Janguuniŋ Kooh, Janguuni a raakoot taamboh ŋ ñif miŋ Kuɓkiŋ ɗe.
29 Ŋ inhiɗ ne ŋ eɗee ɗu finho ɗah, ɓi ɓo' haa ngumu saahiɗ hey aase ŋ ɗooƴ ɗu te ɓa faɗanɗi gati.
30 Te ŋ ɗooƴ ɗu ɓi ɓo' hey name kuruk, ɓa woyee woo raakaaɗi ne ɓa ñaakiɗ taalubeeci ŋ finhooɓa.
31 Kon wortukaat te kinaat alkoh ne kiis kaahay, wek na noh, ŋ meeɗ ɗu meeɗ deng, na muhun sah, yaa nu nga ɗah.
32 Ɗiski wa nik, mi yii wik ɗu ŋ yaah Kooh, mi yii wik ɗu ŋ woo kiŋ ɗe na teeɓohe baahohiŋ ɗe, wi min ɗu ɓaatɗoh po ɗu ndeng, te ɗu min lam in ci a ɗaakiɗ hoolɗuuɗ ciŋ ɗe jen.
33 Ŋ moosɗi waaɗɗoh haf fo ali haalis wala urus wala kulɓa ɓo' nga ɗu.
34 Ɗu inhiɗ in nga sah, e yaah ciŋ ngo cii ceɗ eɗ to ini ŋ etohe, mi, na huntoh ciŋ ngo.
35 Ŋ teeɓiɗ ɗu ŋ in ci jen ne ɓo' joy pangkoh ɗaa ne a min ɓaatɗoh ɓi raakɗi hatil. Ɓoo naandsukaat woo kiŋ Yeesu Heɗi a yi ŋ haf ce wi a woo ne : “ Neɓiɗi nik ŋ onoh weɗ uup wi nik ŋ onu. ” »
36 Wi Pool ƴut woo ineem, a ƴekka, a hunnda na ɓa jen ne ɓa kiim Kooh.
37 Ŋ ineem, ɓa jen, ɓa fuɗeeɗa keeh-keeh, ɓa morgiɗukka ɗe ne ɓa foon ɗe.
38 Ini uupee reehiɗ keeñ ciŋ ɓa, weɗ ini a woo ne ɓa hotissanɗi ɗe. Ƴutta ɓa ɓennda ɗe po ŋ batoona.