19
Pool kaɗiɗ Efes
1 Wa Apolos nik ŋ Korenta, raak Pool ŋ ɓaaɓaŋ ɗe ŋ kur caŋ tangooca, ƴutta a kaɗta Efes, a raakka ɓi taalube nga,
2 a meekissa ɓa ne : « Wi ɗu kos, ɗu rahsiɗ Fuuɗsi Hoolohngaani e ? » Ɓa woosa ɗe ne : « Ɓoo moosɗi kerhoh ne Fuuɗis Hoolohngaan raakiɗ. »
3 Pool woosa ɓa ne : « Ɗu ɓoktu winde ɓokit ? » Ɓa loffa ɗe ne : « Ɓoktiŋ Yahya. »
4 A woosa ɓa ne : « Yahya ɓoktee ɓi waaɗee ɓoƴsoh pesohaaɗ. A woyeeɗa ɓooɓa ne ɓa kosaat yi na haye ŋ finhooce, Yeesu ! »
5 Wa ɓa kerah ineem, ɓa ɓoktuusa ŋ tiikiŋ Yeesu Heɗi.
6 Pool degga ɓa yaah ciŋ ɗe, Fuuɗsi Hoolohngaani ruhussa nga ɓa, ɓa cammba jomb ŋ ɓi peɗeem wiiriis, ɓa woyeeɗa woo-woosuuɗ.
7 Ini ree ƴaar ndaŋkiyaah na kanak (12) nikee nga.
8 Ŋ finho ineem, Pool kaɗta sinaagoga, a woyeeɗa na ɓa na ooluk ini ree caɓin kaahay. A woyeeɗa na ɓa ŋ Nguuriŋ-Kooh, a ndengɗukeeɗa nga, ne ɓi a woyee na ɓa min kos.
9 Waaye laayiɗ nga ɓa ndennga haf, ɓa sannga kos, ɓa woyeeɗa woo moɗaaɗi ŋ waasiŋ Heɗi ŋ fiki ɓooɓa cohee ŋ ɗiska.
Ineem tahha po a saɓsukohha na ɓa, a hunnda na taalubeeca, a taalndiɗta a woyeeɗa na ɓa Kooh-nu-wiis ŋ jangohaaraŋ ƴaara woysee Tirannus.
10 Ineem kaɗeeɗa po wa tummba kiis kanak, ɓooɓa genee Asi jen, Yawuut na nikaaɗi Yawuut, kerahha woo kiŋ Heɗi.
Kuɓuuciŋ Sewaa
11 Waam, Kooh tumeeɗa ɓi keemaan feyohiɗ taamboh ŋ Pool.
12 Kaɗta po ɓooɓa meeɗta ɓay seeket ca wala kulɓaaca laalee faaniŋ ɗe, ɓa degeeɗa ca kosaayiɗ ca, ɓeem wireeɗa, jiiniica puleeɗa nga ɓa.
13 Wa raakeen Yawuut ca meeɗ wil, aañeeɗa jiiniici, ɓa jeemeeɗa aañoh jiiniica ambee ɓooɓa tiikiŋ Yeesu Heɗi an : « Ŋ tiikiŋ Yeesu yi Pool na yegɗohe, mi yii woo ɗu ne pulaat ! »
14 Ɓooɓa tumee ineem nikee kuɓuuci ƴaar ci yasna-kanak ciŋ ƴaara woysee Sewaa, a ɓaahee ŋ seeƴkiɗoh ca yakak caŋ Yawuut ca.
15 Waaye jiinnda loffa ɓa ne : « Ŋ inhiɗ Yeesu te ŋ inhiɗ ya ɓa a yi Pool, waaye ɗu, e ɗu ɓa ? »
16 Ŋ ineem ƴaara jiinndeem ambee faɗsukka ɓa, a uupiɗta ɓa hatil, a tumeeɗa ɓa miskiɗ po ɓa jen ɓa pulla kahna na mbup, tas ɓarang, gaañsukohiɗ.
17 Ɓooɓa genee Efes, Yawuut na nikaaɗi Yawuut kerahhaa ; ɓa jen ɓa tiitta, ɓa eɗta tiikiŋ Yeesu Heɗi cir.
18 Laayiɗ ŋ ɓa hanee kos hayya, ɓa woyeeɗa bakaaɗ ciŋ ɓa, ɓa teeɓoheeɗa ŋ fiki ɓooɓa in ca moɗaaɗiica ɓa meeɗ tum.
19 Laayiɗ ŋ ɓa meeɗ luhus hayeeɗa na kayit ca ɓa meeɗ jangoh luhus, ɓa doheeɗa ca ŋ fiki ɓooɓa jen. Candoomaŋ kayit ca kinduusa, wa nikka darakma junni-ndaŋkiyaah-yatuus (50.000) ŋ koporaŋ ɓa.
20 Wa taambohha ɗaa, ŋ hatiliŋ Heɗi, woo kiŋ Kooh uupeeɗa nga uup kerhuk te hatiliŋ wa uupeeɗa nga uup hotuk.
Ɗuuɗa raakee ŋ Efes
21 Wa in ceem coot, Fuuɗsi Hoolohngaani hiirra Pool ŋ kaɗ Yerusalem, a waaɗee taamboh ŋ Maseduwaan na Akaay. A woosa ne : « Ŋ ree nga ɗah, ŋ joyiɗ nam kaɗ Rom. »
22 A kooɗta huntoh kanak ŋ huntoh caŋ ɗe, Timoote na Erasta, a tuuƴca ɓa Maseduwaan, waaye a yi ŋ haf ce a tasohaahha ŋ Asi.
23 Wa Pool nik ŋ Asi sekeeɗa, ɗuuɗ yakak raakka ŋ Efes, sagu waasiŋ Heɗi.
24 Raakeen tiɓoh-tokkaah nga na woyse Demetiriyus, a meeɗ tiɓ nataal ƴin. Nataal ceem nikee nataalaŋ kahan koohaŋ ɓa ɓitɓa teeku Artemis, ca nikee haalis. Pangkeem tahha po a yi na tiɓoh caŋ ɗe raakeeɗa wirind baahiɗ.
25 A cohɗohha ɓa na ɓinooɓa pesohee pangkeem jen, a woosa ɓa ne : « Ƴaaɓiŋ ngo, ɗu inhiɗ ne raak-raakiŋ ɓoo gaƴuk ŋ pangkii.
26 Te ɗu hotiɗ, ɗu kerhiɗ, ŋ wooɗi Efes dong waaye ini uup ŋ Asi jen, Pool yeem ɓoƴsohiɗ ɓo' laayiɗ, a kosɗukohha ɓa ne kooh ci haɓɗohu yaah ɓo', ca kooh haa.
27 Ŋ wooɗi yahi wa na hee yahe tiikiŋ pangkiŋ ɓoo, waaye wa hey name yah ciri kahniŋ Artemis eɗu, wa yah yaki Artemis yak, Artemis, koohi ɓitɓi yakki, yi ɓi Asi na adinaani jen na ñaamke ! »
28 Wa ɓooɓa kerah ineem, ɓa ayrukka, ɓa leehkeeɗa an : « Artemis yiŋ ɓi Efes yakiɗ ! »
29 Jaarra kur-taaha jen yoonnda, ɓooɓa jen faɗsukka ɗiska na tiyaatarohse, ɓa ammba Gayus na Aristarka, ƴaaɓaŋ Maseduwaan ca kanak ca ɓendee Pool, ɓa ɓayndohha ɓa.
30 Pool waaɗta kaɗ ŋ fiki ɓooɓa cohee ŋ ɗiska waaye taalubeeca sangohha ɗe wa.
31 A raakeen ɓi nawle kilifa yakak, ɓaah ŋ ɓa adgohee Asi, ɓeem nammba woosoh nga ɗe ne a kanaat kaɗ ŋ ɗiska na tiyaatarohse.
32 Waam raak ɗuuɗa laayiɗ ŋ ɗiska : Ɓii leehkeeɗa an, ɓum leehkeeɗa an ! Ɓi uup laay nga ɓa inheeɗi sah ina tah ɓa kaɗ ndaam.
33 Ɓi ɓo' ŋ mboolnda woosa ƴaar teeku Aleksaandar ini raak, Yawuut ca adgiɗta ɗe ŋ fikiira ne a woo. A meeɓpa yaah ne a woo na mboolnda.
34 Waaye wa ɓa inah ne a Yawuut, ɓa jen ɓa hunnda ɓa leehkeeɗa ini ree wahtu kanak an : « Artemis yiŋ ɓi Efes yakiɗ ! »
35 Ŋ mirndaani, ƴaara adgohee coh caŋ kur-taaha tummba po ɓa yeeɓukka, a woosa ɓa ne : « Ɗu ɓi Efes, a ya ɓa inahɗi ne, a Efes na niiɗe kahniŋ Artemis, koohi yakki, na nataaliŋ ɗe keenoh Eel ci ?
36 Ali ɓo' minɗi taas ineem, weɗ tah ɗu joyiɗ yeeɓuk, ɗu marak baahiɗ bala ɗu tuman in ɗah.
37 Weɗɗi, ɗu ɓayiɗ ƴaaɓii ndii te ɓa ɓasɗi koohiŋ ɓoo, ɓa tumɗi ali in araamiɗ ŋ kahniŋ ɗe.
38 Kon Demetiriyus na pangkoh ci hun na ɗe leer na ɓo' ɗah, ɓa ɓayaat ɗe waas, raakiɗ mbeh ci na atte'ohse na ɓooɓi na atte'e !
39 Te nik ne ɗu na meeksohe in wiiriis ɗah, wa hey markasse ŋ mbehi ɓoo ɓeeɗkohissan coh lakiɗ waas.
40 Ini raak ndii woti, miniɗ tah po ɓoo yambu ne ɓoo na yoonde, laam ali ɓo' minɗi woo ini tah ɗuuɗii. » Wa a ƴut woo, a woosa mboolnda ne ɓa pasarkohaat.