21
Pool pulohiɗ Mileet kaɗta Tiir na Seesare
1 Wi ɓoo saɓsukoh na ɓi ɓendee ɓoo, ɓoo aassa bato, ɓoo yurahha Kos. Wa Kooh wiis, ɓoo taalndiɗta Rodes, kooɗohha ndeem, ɓoo kaɗta Patara.
2 Ɓoo raakka bato ndaam na kee Feniis, ɓoo aassa nga, ɓoo cootta.
3 Wa ɓoo kaɗ po ɓoo ƴokeeɗa Siipar, ɓoo faɗtaa ŋ yaah-sing, ɓoo taalndiɗta ŋ ɓak Siri ne ɓoo ruhus ŋ Tiir ŋ ɗiska batoona ruhsiɗan in ca wa ɓaye.
4 Ŋ ndaam, ɓoo waakeeɗa po ɓoo hotta ɓi taalube nga, ɓoo nikka na ɓa neeh yasna-kanak. Fuuɗsi Hoolohngaani hiirra ɓa ne ɓa woyaat Pool ne a kinaat kaɗ Yerusalem.
5 Wi neeh ci yasna-kanak ci reeh, ɓoo kurkissa ne taalndiɗ waasiŋ ɓoo. Ɓa ɓennda ɓoo po ɓoo pulla kur-taaha, ɓeɗ jen na ɓitiɓ ciŋ ɓa na kuɓuuciŋ ɓa. Ŋ ndaam, ɓoo ƴekka ŋ yaah-cookma ne ɓoo kiim Kooh.
6 Ƴutta, ɓoo saɓsukohha na ɓa, ɓoo aassa batoona, ɓa wiirukka.
7 Ɓoo nak, ne ɓoo taalndiɗ ɓaaɓiŋ ɓoo ŋ cookmi, ɓoo puloh Tiir, kaɗta Potolemayis. Ŋ ndaam ɓoo kañiɗta ɓaah caŋ ɓoo kosiɗ ca, ɓoo nikka na ɓa neeh yino.
8 Wa Kooh wiis, ɓoo kurkohha ndaam, kaɗta Seesare, aassa kahan Filip, dalla nga. Filip nikee woyoh Yegɗohiŋ Muci, a ɓaahee ŋ yasna-kanak ca kooɗsee ŋ Yerusalem.
9 A raakeen kuɓu ɓitiɓ nikiis, ɓa nikee cafaƴ. Kooh meeɗ meeɗ woo taamboh nga ɓa.
10 Wi ɓoo raak ɓi neeh nga, woosuuɗ na woyse Agabus puloh Yudee, hayya.
11 A hayya nga ɓoo, a ɓayya seenturiŋ Pool, a tokukka naa, ŋ yaah ci na kot ci, a woosa ne : « Inii weɗ Fuuɗsi Hoolohngaani woo : “ Heɗ seenturii, Yawuut ci tokohan ɗe an ŋ Yerusalem, ɓa deg ɗe ŋ yaah ciŋ ɓi nikɗi Yawuut. ” »
12 Wi ɓoo kerah ineem, ɓoo na kosiɗ ciŋ Seesare kiimeeɗa Pool keeh-keeh ne a kaɗuu Yerusalem.
13 Waaye Pool loffa ɓoo ne : « Ɗu raak ye fuɗaah, ɗu reehɗee keeñiŋ ngo ? Ŋ wooɗi ɗu toki ŋ toksan ŋ Yerusalem dong, waaye mi, ŋ ƴutiɗ ne ŋ kaan sagu tiikiŋ Yeesu Heɗi. »
14 Kaɗta po ɓoo miniɗɗi ɗe in, ɓoo ɗekka, ɓoo woosa ne : « Ini Heɗi waaɗ raakaat. »
15 Wa degga ɓi neeh, ɓoo kooɗukka, ɓoo degukka ŋ waas Yerusalem.
16 Ɓi taalube gen Seesare hunnda na ɓoo, ɓa ɓayya ɓoo kahan ƴaar teeku Manaason ɗiska ɓoo dalan. Manaason pulohee Siipar, a maañiɗ nik taalube.
Pool ŋ Yerusalem
17 Wa ɓoo ree Yerusalem, ɓaah caŋ ɓoo kosiɗ ca taambukka ɓoo na sum.
18 Wa Kooh wiis, Pool hunnda na ɓoo ɗiskaŋ Saak, yakak ca jen nameen hay.
19 Pool kañiɗta ɓa, a naandsukka ɓa yino yino in ci Kooh tum jen taamboh ŋ pangki a pangkiɗ ɗe ngaŋ ɗooƴ ɓi nikɗi Yawuut.
20 Wa ɓa sikɗuk Pool po ƴutta, ɓa yakiɗta Kooh, ɓa woosa Pool ne : « Ɓaah ɓoo, fu hot nga, ɓi Yawuut junni junni kosiɗ Yeesu te ɓa jen ɓa sawariɗ ŋ waasiŋMusaa.
21 Waaye ɓa kerhiɗ ne fu na jangɗe Yawuut ci nik ŋ ɗooƴ cuuɓ ci cinooci ne ɓa faɗaat waasiŋ Musaa, ɓa nguɗissuu komaakciŋ ɓa, te ɓa taambɗissuu mbaah ci.
22 Kon ɓo' tuman na ? Wa wooriɗ ne ɓa hey yege ne fu yii ŋ ndii.
23 Mbaa, tuma ini ɓoo na hee ɗa woye wii : Ƴaar nikiis ɓii ŋ ndii, ɓa giñɗiɗ Kooh in ;
24 ɓayaa ɓa, fu farsuk na ɓa, fu wirndiɗ ɓa in ci ɓa joy tum ŋ farsuk kiŋ ɓa jen, ɓa min nenuk. Ŋ ineem, ɓooɓi jen hey inhe ne ini woyu nga ɗa keeh haa, fu na taambɗe taambiɗ nakoh ciŋ waasiŋ Musaa findiiɓa.
25 Te ini kaɗ ŋ kosiɗ ci nikɗi Yawuut, ɓoo fiisiɗ ɓa kayit, woosa ɓa nga ini ɓoo tufkiɗ wii : Ɓa kinaat ñam kañam ci seeƴkohu wuu kooh nikaaɗi, ɓa kinaat an ñif, ɓa kinaat ñam med, ɓa kinaat njaaloo. »
26 Wa Kooh wiis, Pool ɓayya ƴaaɓa, a farsukka na ɓa. Ƴutta a aassa Kahan Kooh, a woosa mbehi farsukiŋ ɓa reehan, weɗ ne, mbehi yaa nu nga ɓa seeƴkiɗohsan.
Pool ambuuɗ
27 Wa mbeh ca yasna-kanak caŋ ɓoktuka hee mite, Yawuut ca pulohee Asi hotta Pool ŋ ɗooƴ Kahan Kooh, ɓa yoppa mboolnda jen, ɓa ammba ɗe.
28 Ɓa leehkeeɗa ŋ ɗafka ne : « Hayaatoo, Israayel ci, hayaat ! Ƴaari a yi ! A yi na jangɗohe ŋ ɗisik nu nik in moɗaaɗi ŋ ini kaɗ ŋ cuuɓiŋ ɓoo na waasiŋ Musaa na Kahan Kooh wii. A ɓekiɗ sah ƴaaɓi nikaaɗi Yawuut ŋ ɗooƴ Kahan Kooh, ŋ ineem a soɓe'iɗta Ɗiski Hooliɗii. »
29 Ini tahee ɓa woo ineem, ɓa hotee hot Pool ŋ Yerusalem na Torofiim yi puloh Efes, ɓa liiɓpa ne a ɓekiɗ ɗe ŋ Kahan Kooh.
30 Kur ka jen yoonnda, ɓooɓa puloheeɗa ɗisik nu ɗisik. Ɓa ammba Pool, ɓa faseeɗa ɗe po ɓa puliɗta ɗe Kahan Kooh, ɓa jaarra rang buntaaca.
31 Ɓa waaɗta ɗe ap, weɗ kilifaana adgohee soldaar ca kerhoh ne Yerusalem jen yoondiɗ.
32 Ŋ ɗiska ɗiska, a nangɗohha ɓi soldaar, na ɓa adgohee ɓa, a faɗsukka ɓa na mbup. Wa Yawuut ca hot ɗe na soldaar ca hunee na ɗe, ɓa faɗta laɓa ɓa laɓee Pool.
33 Jaarra, kilifaana reɓpa ŋ Pool, a nakohha ne a ambsaat, a ceenu na ceen kanak, a hannda meekis ɓooɓa ne : « Ƴaarii a yi ɓa, a tum ye ? »
34 Waaye ŋ mboolnda, ɓii woyeeɗa an, ɓum woyeeɗa an. Wa a kaɗ po a hotta ne a minɗi raak in wooriɗ nga sagu ɗuuɗaŋ mboolnda, a nakohha ne Pool ɓayu ŋ kahan soldaar ca.
35-36 Ɓooɓa jen nikee ñaakɗeeɗa Pool, ɓa leehkeeɗa ne : « A apaah apu ! » Wa ɓa kaɗ po ɓa reesa eskalyeeca, soldaar ca mirndohha meeɓ Pool sagu diirka mboolnda diirke.
Pool kiimiɗ ne a woo na mboolnda
37 Wa ɓa hee aase kahna, Pool woosa kilifaanaŋ soldaar ca ne : « Ŋ miniɗ ɗa woo in e, ne wa neɓ ɗa ɗah ? » Kilifaana woosa ne : « Fu kerhiɗ gerek e ?
38 Kon a fu ƴaariŋ Misraaci ɓekee ɗuuɗi miskiɗi mbaɗni haa e ? Ƴaari ɓayee apoh ɓo' junni-nikiis (4000) a cootta na ɓa bilaf fa ? »
39 Pool woosa ɗe ne : « Muk, ŋ Yawuut, ŋ ɓo' Tarsa, kur raakiɗ tiik ŋ Silisi. Ŋ kiim ɗa wa kiim, on ndo ŋ woo na ɓooɓii. »
40 Kilifaanaŋ soldaar ca onnda ɗe wa. Pool tufukka ŋ eskalyeeca, a raɗissa mboolnda yaah, ɓooɓa ɗekka teɗ, a woyeeɗa na ɓa ŋ peɗeem Yawuut.