85
Hali mu̱handu̱ wa bahi̱i̱mi̱. Zabbu̱li̱ gya Baana ba Koora.
1 Ai̱ Mukama, oicala na mbabazi̱ na nsi gyamu,
Bei̱saleeri̱ waabaahweseerye gwakandi.
2 Waaganyi̱i̱ri̱ b̯ubiibi b̯wa bantu baamu,
waabatoolaho bibii byab̯u byensei̱.
3 Otakabakwatirwe ki̱ni̱ga,
otakababihiriirwe.
4 Ai̱ Ruhanga wakujunwa kwetu̱, twi̱ryemwo b̯uhyaka,
otatubihirirwa!
5 Olitukwatirwa ki̱ni̱ga biro byensei̱?
B̯usungu b̯wamu b̯ulicalaho biro na biro?
6 Toli̱tu̱byokya gwa kandi,
kwokwo bantu baamu bakusemereerwemwo?
7 Ai̱ Mukama, twolokye ngonzi zaamu zinene,
otuhe kujunwa kwamu.
8 Kanyetegeerye Mukama Ruhanga kiyakoba,
hab̯wakubba akwi̱za kubaliza bantu baamwe bya b̯u̱si̱nge,
aleke batei̱ri̱ra kukora bya b̯udoma.
9 Mananu kwo kujunwa kwamwe kuli heehi̱ na bab̯wo bamutamwo ki̱ti̱i̱ni̱sa,
kandi ki̱ti̱i̱ni̱sa kyeicalanga mu nsi gyetu̱.
10 Ngonzi zinene na b̯wesigwa bi̱li̱romba,
mananu na b̯u̱si̱nge biliramukyangana
11 B̯wesigwa b̯ulirugira hansi,
kandi mananu garuge mwiguru.
12 Mukama alitugabaira birungi,
kandi nsi gyetu̱ gilibba na makesa ganene.
13 B̯winganiza b̯uligyenda mu mei̱so gaMukama
b̯umuteekaniririze muhanda.