86
Kusaba kwa Dau̱di̱.
1 Ai̱ Mukama, ntegera mapokopo onzi̱remwo,
hab̯wakubba ndi munaku kandi museege.
2 Olindenge b̯womi b̯wange, hab̯wakubba nyendya Ruhanga,
juna muheereza waamu akwesiga.
3 Ai̱ Mukama ngiira mbabazi̱,
hab̯wakubba nsiiba ninkuliriira.
4 Ai̱ Mukama i̱zu̱u̱lya mwozo gwa muheereza waamu na kusemererwa,
hab̯wakubba weewe ginguha.
5 Ai̱ Mukama weewe murungi kandi mu̱ganyi̱ri̱,
ogiira ngonzi zinene, bab̯wo baatula ibara lyamu.
6 Ai̱ Mukama, ntegera mapokopo weegwa kusaba kwange,
weegwanga kizabiro kya kwesengereerya kwange.
7 B̯umba mu b̯ujune nkunga weewe,
hab̯wakubba onzi̱ramwo.
8 Ai̱ Mukama, mu baruhanga tihaloho noomwei̱ akukwisana,
rundi munyakukora bintu nka bi̱waakoori̱.
9 Ai̱ Mukama, mahanga gensei̱ gaawahangi̱ri̱, gakwi̱za ku̱ku̱ramya,
kandi gaalihariiza ibara lyamu.
10 Hab̯wakubba oli waki̱ti̱i̱ni̱sa kandi okora bintu byamahanu,
weewe musa oli Ruhanga.
11 Ai̱ Mukama, nzegesya muhanda gwamu,
kwokwo ndibatire mu mananu gaamu,
nzegesya kukuhereza na mutima gwange gwensei̱.
12 Ai̱ Mukama Ruhanga wange, nku̱ku̱si̱i̱ma na mutima gwange gwensei̱,
kandi nyahaariizanga ibara lyamu biro byensei̱.
13 Ngonzi zaamu ka zinene hali gya,
wancu̱ngu̱u̱ri̱ wantoola kuzumu.
14 Ai̱ Ruhanga, bantu baamyepanku bambyokereeri̱,
kitebe kya badulu batemu baku̱toolya ku̱nzi̱ta
kandi we tibakuloho.
15 Ai̱ Mukama, bei̱tu̱ we, weewe Ruhanga
aganyira kandi wa mbabazi̱ otabihiriirwa b̯wangu, kandi wa ngonzi zinene kandi mwesigwa.
16 Mpindukira kandi ongiire mbabazi̱,
muheereza waamu omuhe maani gaamu
kandi ojune mwana wa muzaana waamu.
17 Onzolokye kawoneru ka mbabazi̱ zaamu,
bab̯wo banyakunnoba, bawone kandi basware,
hab̯wakubba weewe Mukama, kandi wanju̱ni̱ri̱ waampu̱mu̱u̱lya.