84
Hali Mu̱handu̱ wa Bahi̱i̱mi̱. Zabbu̱li̱ gya baana ba Koora.
1 Ai̱ Mukama wa mahe,
nnyu̱mba gyamu kagi̱semeru̱!
2 Mwozo gwange gwegomba kandi guruhiira zi̱gati̱ gya Mukama,
mutima gwange na mubiri gwange bisanyuka ni̱bi̱hi̱i̱mi̱ra Ruhanga mwomi.
3 Ai̱ Mukama wa mahe, nab̯ukyakabba nti, mbaki gyetooleerya nnyu̱mba,
na nsyo nigyebi̱mbi̱ra kizonza ha kyoto kyamu cali gilindira b̯wana,
Mukama kandi Ruhanga wange.
4 Ba mu̱gi̱sa bab̯wo beicala mu nnyu̱mba gyamu,
b̯uli kasu̱mi̱ ni̱bahi̱i̱ma byakukuhaariiza!
5 Bali na mu̱gi̱sa bali na maani garuga muliwe,
ba mitima myab̯u mili na bihika kugyenda ha Lusahu Sayu̱u̱ni̱.
6 B̯ubabba mu kihanga kya Bbaka.
Baakifoora kiikaru kya misu,
ndagali̱ gya mukyanda gi̱ki̱zu̱u̱lya na mwizulo.
7 B̯ubabba nibakugyenda beeyongera maani,
baliwona Ruhanga wa baruhanga ku̱kwo mu Sayu̱u̱ni̱.
8 Ai̱ Mukama Ruhanga wa mahe, weegwa kusaba kwange,
Ai̱ Ruhanga wa Yakobbo, ontegere mapokopo!
9 Ai̱ Ruhanga ha mbabazi̱ mukama, ngab̯u gyetu̱,
woolokya mbabazi̱ hali yogwo gi̱i̱wakomi̱ri̱mwo!
10 Hab̯wakubba kiro ki̱mwei̱ mu nnyu̱mba gyamu,
kikukira b̯urungi biro ru̱ku̱mi̱ mu biikaru bindi.
Hakiri mba mu̱li̱ndi̱ wa mulyangu gwa nnyu̱mba,
gya Ruhanga wange kukira kwicala mu maka ga babiibi.
11 Kubba Mukama Ruhanga abba lyoba kandi ngab̯u,
atuha mu̱gi̱sa na ki̱ti̱i̱ni̱sa,
birungi byensei̱ tabi̱i̱ma
bab̯wo baterekereru̱.
12 Ai̱ Mukama wa mahe,
wa mu̱gi̱sa yogwo akwesiga!