41
Hali mu̱handu̱ wa bahi̱i̱mi̱. Zabbu̱li̱ gya Dau̱di̱.
1 Ali na mu̱gi̱sa abba mwenda hali baseege,
Mukama amujuna mu b̯wi̱re b̯wa bizub̯u.
2 Mukama alimulinda kandi amwi̱caalye naali mwomi,
Mukama alimuha mu̱gi̱sa mu nsi kandi talimuleka akakwatwa kwetaaga kwa banyanzigwa baamwe.
3 Mukama alimukwatiira ha ntabbu gyamwe
amu̱honi̱e nseeri̱ zaamwe
4 Nyakobi̱ri̱ yati, “Ai̱ Mukama, ngiira mbabazi̱,
mponi̱a, kubba nkoori̱ kibii mu mei̱so gaamu.”
5 Banyanzigwa bambazaho nei̱hali̱ nibakoba yati,
“Ali̱kwa di, yogwo ibara lyamwe ni̱li̱kasyeraho?”
6 Bab̯wo bambungira nka banywani,
bei̱tu̱ nibasorooza rugambu,
b̯ubabba nibakwemuka, nibalurarangya hensei̱.
7 Banyanzigwa bange bensei̱ bahwehwetira hamwei̱ nibakumbazaho,
banzendeerya bibiibi bisa.
8 Baakobenge “Akwati̱i̱rwe nseeri̱ gibiibi,
tasobora kubyoka ha aleeri̱.”
9 Na munywani wange gi̱i̱nyesi̱gengi̱,
adyanga hamwei̱ nagya,
yoodede anfookeeri̱ munyanzigwa.
10 Ai̱ Mukama, ngiira mbabazi̱,
mbyokya, aleke mbahoore.
11 Nkyegi̱ri̱ nka kwoku̱nzendya,
kubba oleki̱ri̱ kwahi banyanzigwa ku̱nsi̱ngu̱ra.
12 Wankwati̱ri̱i̱ri̱ hab̯wa mananu gange,
wanzi̱cya mu̱mei̱so gaamu biro na biro.
13 Mukama ahaariizwe, Ruhanga wʼI̱saleeri̱,
biro na biro.
Ami̱i̱na kandi Ami̱i̱na.