40
Hali mu̱handu̱ wa bahi̱i̱mi̱. Zabbu̱li̱ gya Dau̱di̱.
1 Nyaali̱ndi̱ri̱i̱ri̱ Mukama na kugumisiriza
yeetegereza yeegwa kukunga kwange.
2 Yantoori̱ mu ki̱i̱na kilei baku̱u̱ ha bagyenda,
mu bicokodo bya lu̱ku̱u̱,
magulu gange yaagei̱cya ha lubbaali,
yansoboresya kulibata ntanti̱i̱ri̱.
3 Mu kanwa kange yaahangi̱ri̱mwo kyembu kihyaka,
kyembu kya kuhaariiza Ruhanga weetu̱.
Banene b̯ubalibiwona bali̱ti̱i̱na,
kandi ku̱ni̱hi̱ra kwab̯u bakute hali Mukama.
4 Ali na mu̱gi̱sa muntu,
yeesiga Mukama,
ateekwata na bamyehembu,
na kweju̱u̱bya na baramya baruhanga bandi.
5 Onzongeeri̱ binene ai̱ Mukama Ruhanga wange,
gaga gali mahanu gookoori̱.
Bintu bi̱watu̱tegekeeri̱,
tihaloho akusobora kubikubalira,
kadi gya nkakoba kubibaza,
tosobora kubibala okabimalayo.
6 Bihongwa na byonzira tobyendya,
wampeeri̱ mapokopo nkwetegeerye,
bihongwa bya kwokya na bya kuganyira bibii
tobyetaaga.
7 Mwomwo nyaabazi̱ri̱ ninkoba yati, “Wona ndi haha, nzi̱ri̱,
bibampandi̱ki̱ri̱ho mu binyakuhandiikwa bikoba:
8 Nyendya kukora bi̱wendya, ai̱ Ruhanga wange,
biragiro byamu bili mu mutima gwange.”
9 Ntebeerye mananu gaamu mu kitebe kya bantu banene,
okyegi̱ri̱ nka ku̱nteteekeera kubaza,
ai̱ Mukama.
10 Kujuna kwamu ti̱nku̱bi̱si̱ri̱ mu mutima gwange,
ntebeerye b̯wesigwa na kujunwa kwamu,
ngonzi zaamu zinene na b̯unanu mbibbumbiira kwahi
mu kitebe kya bantu banene.
11 Hab̯wamu, ai̱ Mukama, otalemwa kungirira kisa,
ngonzi zaamu zinene na b̯wesigwa b̯wamu bindindenge.
12 Kubba bizub̯u bi̱nyelogoleerye,
bibii byange byakaleseeni̱ tinkusobora kuwona,
binene na kukira ntumbu za ha mu̱twe gwange,
mutima gwicala ni̱gu̱gwa.
13 Ai̱ Mukama, bba na mbabazi̱, oncungure,
ai̱ Mukama, wanguha onjune.
14 Leka bakwatwe nsoni̱ kandi basware, bab̯wo baku̱toolereerya ku̱nzi̱ta,
bakwendya mpwerekeere bemuke na muswaru.
15 Leka beicala nibamponereerya
nibambweranga nti, “Ee, koowonewone,” bemuke na muswaru!
16 Bensei̱ baku̱toolya,
bajaguze kandi basemererwe muli weewe,
leka bab̯wo bendya kujunwa kwamu, beicalenge nibakoba yati,
“Mukama wamaani!”
17 Gya ndi munaku kandi mu b̯wetaagu,
Mukama ancweramwo.
Weewe Mu̱ju̱ni̱ kandi mu̱cu̱ngu̱ri̱ wange,
ai̱ Ruhanga wange, otakereerwa.