39
Hali mu̱handu̱ wa bahi̱i̱mi̱. Hali Jedu̱sani̱. Zabbu̱li̱ gya Dau̱di̱.
1 Nyaakobi̱ri̱, “Nkwi̱za kwegyendereza ntakora kibii mu bintu bimbaza,
nyaakoba tindizootera kintu kyensei̱,
babiibi nibaloho baatanzegwa.”
2 Nyaali nka kibbubbu ntakubaza,
kitakangasire,
hab̯wakubba kyateereerye b̯u̱teerya kuwonawona kwange.
3 Mutima gwasali̱ki̱ri̱,
b̯u̱nyatekeri̱i̱ze hoi̱ gwahyengi̱ nka mworo,
mwomwo nyabazi̱ri̱ na kalimi kange nti,
4 “Ai̱ Mukama, leka nyeetegereze nkangu gyange,
na ndengu gya biro byange,
ommanyi̱sye b̯womi b̯wange nka kub̯uli mu kumalikaho.”
5 Biro byange waabi̱fori̱ri̱ nka ntambu b̯utambu,
b̯womi b̯wange ob̯uwona nka kitali kintu.
B̯womi b̯wa b̯uli muntu b̯wicala rwoya lusa.
6 Mananakwo muntu ali nka mu̱tu̱ntu̱lu̱ eicala nalibatalibata,
atalibanira b̯usa,
asoroza itungu ateegi̱ri̱ akulitwala,
7 “Hataati̱ Mukama kyani ki̱nku̱toolya?
Ku̱ni̱hi̱ra kwange kuli muli weewe.
8 Njuna byakuhenara byange byensei̱,
ntafooka kyakusungwa badoma.
9 Nyaali nyetekereeri̱, ntakub̯uula mu̱nwa,
kubba weewe waaki̱koori̱.
10 Tokulekaho kunfubira,
njwahi̱ri̱ kukuutwa kwa mukono gwamu.
11 Owonawonesya bantu hab̯wa bibii byab̯u,
itungu lyab̯u olidya nka nnyenze,
mananu b̯uli muntu abba rwoya lusa!
12 “Ai̱ Mukama, weegwa kusaba kwange
otegere mapokopo kizabiro kyange onkonyere,
kubba ndi mu̱genyi̱,
mu̱goonyi̱ nka bahaaha bensei̱ kubaali.
13 Leka kumbihiriirwa kwokwo nsemererweho,
ntakabbeeri̱ ku̱kwa nkei̱ra kintu kwankei.”