38
Zabbu̱li̱ gya Dau̱di̱, naakusaba Ruhanga amwi̱zu̱ke.
1 Ai̱ Mukama, otanfubira nooli na ki̱ni̱ga
rundi kundamba nooli na b̯usungu.
2 Kubba mbasi zaamu zi̱njagareeri̱ mu mubiri,
kandi mukono gwamu gu̱mmi̱gi̱ri̱ hansi.
3 Hab̯wa b̯usungu b̯wamu mpi̱mbi̱ri̱.
Hab̯wa kibii kyange, maku̱ha gange gaceki̱ri̱.
4 Kuhenera kwange ku̱nsagi̱ri̱,
nka mugugu guntakusobora kwetweka.
5 Bihote byange bi̱tamu̱ki̱ri̱ bi̱ku̱nu̱nka,
hab̯wa b̯udoma b̯wange.
6 Nnyeehi̱nyi̱ri̱ ndi hansi,
kiro kyensei̱ nkimalira mu maaru.
7 Mu̱twe gwange gu̱hyohi̱ri̱ hab̯wa mu̱swi̱ja gwamaani,
ndi heehi̱ ku̱kwa.
8 Njwahi̱ri̱ ntematemeerwe ki̱mwei̱,
nkulira hab̯wa nganye za mu mutima gwange.
9 Mukama bi̱nku̱rombya byensei̱,
na kutaaga kwange obyegi̱ri̱.
10 Mutima gulimu kunkuuta, maani gammali̱ki̱ri̱i̱ri̱,
Mei̱so gange gebbu̱mbi̱ri̱.
11 Banywani na banywi̱ bamukagu bali mu kunyehala hab̯wa bihote,
banyaruganda nabo bandahi̱ri̱ho.
12 Bendya ku̱nzi̱ta bantega mitegu,
bampu̱tei̱ze nibandyamwo rukwe lwa ku̱mpwerekereerya.
13 Ndi nka mwi̱jalu̱ mapokopo, atakwegwa,
nka kibbubbu atakubaza,
14 Ndi nka atakwegwa,
wa mu̱nwa gutakusobora kwi̱ramwo.
15 Ai̱ Mukama, nku̱ni̱hi̱ra muli we,
okwi̱za ku̱nzi̱ramwo, ai̱ Mukama Ruhanga wange.
16 Nyaaku̱wereeri̱ nti, “Otabekiriza kunyehaariiziraho,
hab̯wakubba nki̱bbeeri̱.”
17 Hab̯wakubba ndi heehi̱ ku̱gwa,
ncala na b̯u̱ru̱mi̱ b̯wi̱re b̯wensei̱.
18 Nkwatula bibiibi byange,
mb̯i̱hi̱ri̱i̱rwe hab̯wa kuhenera kwange.
19 Banyanzigwa bange banku̱mpi̱gi̱ra b̯usa
bannobi̱ri̱ batali na nsonga bali banene.
20 Bansasula bibiibi hab̯wa birungi binkora,
boobo bampi̱i̱gani̱sya kubba nkwendya kukora birungi.
21 Ai̱ Mukama, otandekeera,
ai̱ Ruhanga wange, otamba hadei.
22 Ranguha onjune,
Ai̱ Mukama Mu̱ju̱ni̱ wange.