37
Gya Dau̱di̱.
1 Leka kwetuntuza hab̯wa babiibi
rundi okakwatirwa i̱hali̱ bakukora kubii,
2 Bakwi̱za ku̱syeraho nkeisubi kulyoma,
bakwe nka bimera bi̱hotoku̱.
3 Weesiga Mukama kandi okore birungi,
mwomwo oicale munsi kurungi.
4 Semererwa mu Mukama,
kandi alikuha bya mutima gwamu gu̱kwendya.
5 Ngesu zaamu zoolokye Mukama,
mumwesige yooyo akwi̱za kukoora.
6 Aliha b̯urungi b̯wamu kwaka nka kyererezi̱,
b̯winganiza b̯wamu b̯umuluke nka lyoba lya mwinsi.
7 Gumisiriza kandi wesige Mukama,
Leka kutuntuura babiibi hab̯wa ku̱gu̱du̱hara,
na ku̱si̱ngu̱ra mu ntegeka zaab̯u zibiibi.
8 Weehala ki̱ni̱ga kandi oleke b̯u̱kabbu̱ru̱.
Leka kutuntura, kileeta kibii.
9 Kubba babiibi bakwi̱za kuhwerekeera,
bei̱tu̱ balindiira Mukama baligweterwa nsi.
10 Mu kasu̱mi̱ katali ka hadei, mubiibi talizookaho,
nab̯wolilingiira ha kiikaru kyamwe nab̯wegyendereza talibbaho
11 Bei̱tu̱ banaku baligweterwa nsi nibeicala na b̯u̱si̱nge b̯unene.
12 Babiibi bahi̱gani̱za barungi,
nibabanenera na magegu,
13 Mukama abaseka b̯u̱seki̱,
kubba awona kabii ni̱kaku̱bei̱zi̱ra.
14 Babiibi basomolayo mpirima nibareega b̯uta,
mwaku̱hwerekereerya banaku na bali mu b̯wetaagu,
na kusala balibatira mu mihanda mi̱terekereru̱.
15 Bei̱tu̱ byogi byab̯u bi̱kwi̱za kubeteemuura mitima,
b̯uta b̯wab̯u b̯ubinyeke.
16 Hakiri oicala nooli murungi kandi munaku,
kukira kubba mubiibi kandi mu̱gu̱u̱da,
17 kubba mikono mya babiibi mi̱kwi̱za kubinyeka,
bei̱tu̱ Mukama asagika barungi.
18 Mukama yeegi̱ri̱ biro bya bab̯wo batagira kakuu,
kandi b̯ugwetwa b̯wab̯u b̯ulibbaho biro na biro.
19 Mu b̯wi̱re b̯wa kabii tibalitalibana,
balibba na binene mu b̯wi̱re b̯wa nzala.
20 Bei̱tu̱ babiibi bakwi̱za kuhwerekeera,
banyanzigwa ba Mukama beisana nka ki̱ti̱i̱ni̱sa kyeisubi
bakwi̱za ku̱tu̱u̱ka nka mwi̱ca, batu̱u̱ke bamalikeho.
21 Mubiibi yeehora tasasula ibanza,
bei̱tu̱ murungi abba mwenda eicala naagaba,
22 kubba ba Mukama aheeri̱ mu̱gi̱sa bakwi̱za kugweterwa nsi,
bei̱tu̱ baakyeni̱ri̱ baalimalikaho.
23 Mukama yooyo yoolokya muntu muhanda gwa akusemeera kukweta,
kandi alinda bab̯wo bamusemeza,
24 nab̯walikibbala, tali̱gwa,
kubba Mukama amukwatiira na mukono gwamwe.
25 Nyaali muto hataati̱ mpandi̱ri̱,
tinkawonanga muntu murungi wa Mukama ahemu̱ki̱i̱ri̱,
rundi kuwona baana baamwe ni̱baku̱sabi̱ri̱i̱rya bidyo.
26 Beicala benda kandi bahora bataku̱bali̱ri̱i̱rya,
baana baab̯u baliheeb̯wa mu̱gi̱sa.
27 Leka bibiibi okore birungi,
mwomwo oliicala mu nsi biro na biro.
28 Kubba Mukama yendya b̯winganiza,
kandi talilekeera beesigwa be.
Bakwi̱za kulindwa biro na biro,
bei̱tu̱ beizukulu ba babiibi bakwi̱za kuhwerekeera,
29 Bamananu baligweterwa nsi,
kandi beicalemwo biro byensei̱.
30 Kanwa ka wa mananu kaatula magezi̱,
kalimi kaamwe kabaza bya b̯winganiza.
31 Mutima gwamwe gwi̱zwi̱ri̱ biragiro bya Mukama,
magulu gaamwe tigasoba.
32 Babiibi beicala bali̱ndi̱ri̱i̱ri̱ bamananu,
ni̱batoolereerya kumalaho b̯womi b̯wab̯u,
33 bei̱tu̱ Mukama talibaleka kubba mu mikono myab̯u,
rundi akabaleka babacwere musangu nibali babaju̱neeni̱.
34 Lindiira Mukama
weekwate mihanda myamwe,
akwi̱za ku̱ku̱byokya ogweterwe nsi,
babiibi b̯ubalimalwaho, okwi̱za kukyewonira.
35 Mbweni̱ muntu mubiibi kandi atagira kisa,
naakunyengetera nka musaali guli heitehe lirungi,
36 bei̱tu̱ b̯wangu b̯wangu naasyeraho atakei̱re kuzookaho,
nab̯u̱nyalwani̱si̱i̱rye ku̱mu̱toolya gwakabiri atakazookeho.
37 Lingiira bantu bamananu kandi barungi,
muntu b̯wa b̯u̱si̱nge abba na beizukulu.
38 Bei̱tu̱ babiibi bensei̱ balihwerekeera,
bya mu̱mei̱so bya babiibi byensei̱ bilihwerekeera.
39 Kujunwa kwa bamananu kuruga hali Mukama
yooyo b̯wi̱ru̱ki̱ro b̯wab̯u mu b̯wi̱re b̯wa kabii.
40 Mukama abajuna naabacungura
kuruga mu mikono mya babiibi,
naabajuna, kubba bei̱ru̱ki̱ra muli yooyo.