Kitabbu Kya kabiri
42
(Zabbu̱li̱ 42—72)
Hali mu̱handu̱ wa bahi̱i̱mi̱. Masikili kinyakuhandiikwa baana ba Koora.
1 Ai̱ Ruhanga, nka mparaaki kuhyahyanira meezi̱ ga kunywa,
kwokwo na mwozo gwange gukukuhyahyanira.
2 Mwozo gwange gukukuhyahyanira Ruhanga mwomi.
Ndigyenda di̱i̱ mu mei̱so ga Ruhanga?
3 Mali̱ga gange googo geicala bidyo byange,
mwinsi nei̱jolo,
bantu b̯ubabba ni̱baku̱mbu̱u̱lya b̯wi̱re b̯wensei̱,
“Ruhanga waamu ali hanya?”
4 Nki̱zi̱ gindabamwo b̯u̱nyi̱zu̱ka byenyu̱ma,
nka ku̱nyebemberengi̱ bantu banene,
nitukumba kugyenda mu nnyu̱mba gya Ruhanga,
ni̱tu̱kwami̱i̱rya byembu bya kuhaariiza na kusemererwa kunene,
bantu banene ni̱bei̱za kujaguza.
5 Ai̱ mwozo gwange, hab̯waki otu̱ntwi̱ri̱,
kandi hab̯waki otateekeeni̱?
Weesiganga Ruhanga, hab̯wakubba ndimuhaariiza gwakandi,
Mu̱ju̱ni̱ wange kandi Ruhanga wange.
6 Nsali̱i̱rwe nu mu mutima gwange,
bei̱tu̱ ndi̱kwi̱zu̱ka,
nab̯undibba nindi hadei na Yorodaani,
na nsi gya lusahu Hamoni̱ kandi na lwa Mi̱zi̱ra.
7 Nkwegwa ndi̱ha nigyeta gi̱i̱ra gyagyo nka
meezi̱ gakuhuura kugagwa hansi,
gei̱zwi̱ri̱ gaammeeri̱.
8 Mukama yolokyanga ngonzi zaamwe zinene b̯wi̱re b̯wa mwinsi,
kandi kyembu kyamwe kyokyo nyahi̱i̱manga i̱jolo,
ninkusaba Ruhanga yogwo ampa b̯womi.
9 Ndiriira Ruhanga, lubbaali lwange nimuweera,
“Hab̯waki onzebereeri̱? Hab̯waki ncala nimbonawona hab̯wa ku̱wonawonesya kwa banyanzigwa bange?”
10 Banyanzigwa bange beicala nibanjooga nibakobanga yati, “Ruhanga waamu ali hanya?”
Baheeri̱ b̯womi b̯wanga kubba nka muntu ali na kihote kinyamapo.
11 Ai̱ mwozo gwange, hab̯waki otu̱ntwi̱ri̱,
kandi hab̯waki otateekeeni̱?
Weesiganga Ruhanga, hab̯wakubba ndimuhaariiza gwakandi,
Mu̱ju̱ni̱ wange kandi Ruhanga wange.