35
Zabbu̱li̱ gya Dau̱di̱.
1 Ai̱ Mukama, kuutangana na bakukuutangana nagya,
Lwana na bandwani̱sya.
2 Kwata kilwalu na ngab̯u gyamu, obyoke onjune!
3 Kwata isumu na mpasa gya b̯ulemu,
lwani̱sya baku̱mpi̱i̱gani̱a!
Weera mwozo gwange,
“Ndi gyagya kujunwa kwamu!”
4 Leka bab̯wo bakwendya ku̱nzi̱ta
basware kandi batabba na ki̱ti̱i̱ni̱sa.
Babinge kandi ohu̱gu̱tani̱e
bab̯wo bensei̱ bendya kumputaaza.
5 Bafoore nka bisusunga mu mpehu,
malayika wa Mukama naalimwo ku̱beru̱kya
6 Leka muhanda gwab̯u gwi̱zwemwo nti̱ti̱ na b̯unterente,
malayika wa Mukama naalimwo ku̱beru̱kya!
7 Kubba bantega batali na kigyendeerwa,
b̯womi b̯wange nibab̯ulimira b̯u̱hya batali na nsonga.
8 Leka azi̱ke atakwega,
mutegu gwabbanga antegi̱ri̱ gumwekwatire,
agu̱gwemwo mpaka ha kuhwerekeera kwamwe!
9 Kasi mwomwo mwozo gwange gulisemererwa mu Mukama,
ni̱gu̱nyu̱mi̱rwa mu kujuna kwamwe.
10 Maku̱ha gange gensei̱ gakwi̱za kukoba yati,
“Ai̱ Mukama, naani akukwisana,
akucungura banaku,
hali akubakira maani,
baseege na bali mu b̯wetaagu hali akubanyaga?”
11 Babiibi babyoka kundumiriza,
ni̱bambu̱u̱lya bintu bi̱nteegi̱ri̱.
12 Mu kiikaru kya birungi, bansasulamwo bibiibi,
nibammalamwo maani.
13 Bei̱tu̱ bo b̯u̱baahi̱mbi̱ri̱, nyaalweri̱ nsensede,
nyeeru̱mya na kusaba na kusiiba,
nyaasabenge ntu̱lu̱ki̱ri̱ mu̱twe.
14 Nyei̱seeni̱ nka akulira munywani wange rundi weetu̱,
nka muntu akulira mmaawe,
nyeetu̱lu̱ki̱ri̱ nindi mu maaru.
15 Bei̱tu̱ gya b̯unyaali mu kabii baasemereerwe beesorooza,
bei̱sorooze ku̱nsekereerya,
ndu̱mbi̱i̱rwe bantu banteegi̱ri̱,
banku̱u̱ti̱ri̱ batakulekeera.
16 Nka bagwagwa bali ha ki̱genyi̱,
bantegeeri̱ meino.
17 Ai̱ Mukama, oli̱doosya di̱i̱ kubalingiira b̯u̱li̱ngi̱i̱ri̱?
Nnjuna bibakumpoora nabyo,
ojune b̯womi b̯wange b̯wa muhendu kuruga mu zizi ntali.
18 Nyaaku̱si̱i̱manga mu lwecooko lwa bantu,
mu bantu banene nyaakuhaariizanga.
19 Banyanzigwa bange baleke kunyeb̯ugira
bannobira b̯usa baleke kwesi̱i̱ma,
20 Tibambaza kurungi,
bei̱tu̱ bacwa makuru bantu batali na kabii,
bab̯wo beicala bei̱tekereeri̱.
21 Bangu̱hi̱ri̱i̱rya kunnyegeera,
nibakoba, “Otyo, Otyo!
Kasita mei̱so gaaki̱weeni̱!”
22 Ai̱ Mukama, oweeni̱ byensei̱ leka kwetekeera,
ai̱ Mukama, otamba hadei.
23 Ruhanga wange kandi Mukama wange, nsagika,
byoka ondwaniire.
24 Ai̱ Mukama, Ruhanga wange,
ntonganiira nka mananu gaamu kugali,
otaleka nibakanyeb̯ugira.
25 Otabaleka kuteekereza nti, “Tu̱tu̱ngi̱ri̱ kitubbanga ni̱tu̱toolya!
Tukugyenda kumudya yemereeri̱!”
26 Bensei̱ beb̯uga hab̯wa b̯uceke b̯wange,
baswaze kandi obasi̱ngu̱re,
beetembya hab̯wange,
obalwalye muswaru.
27 Banzendeerya b̯u̱si̱ngu̱zi̱,
batoke hab̯wa kusemererwa na ngonzi,
babaze yati, “Mukama ahaariizwe,
anyu̱mi̱rwa mu kubba kurungi kwa muheereza waamwe.”
28 Kalimi kange kaabazanga ha b̯winganiza b̯wamu,
kandi nkwi̱za kukuhaariiza biro byensei̱.