34
Zabbu̱li̱ Gya Dau̱di̱, ni̱gi̱kwolokya b̯wi̱re b̯u̱yeefori̱ri̱ mugweraru, Abbi̱mereki̱ akamubinga.
1 Nyasi̱i̱manga Mukama b̯wi̱re b̯wensei̱,
kanwa kange keicalanga nikamuhaariiza.
2 Nyehaariizanga mu Mukama,
leka bab̯u̱ndaaru̱ beegwe kandi basemererwe.
3 Haari̱i̱ze Mukama nagya,
twensei̱ hamwei̱ tutende ibara lyamwe!
4 Nyaatooleerye Mukama yanzi̱ramwo,
yanjuna b̯u̱ti̱i̱ni̱ b̯wensei̱.
5 Bensei̱ bamulingiira beicala basemereerwe,
b̯u̱syo b̯wab̯u tib̯ulibba na nsoni̱.
6 Yogo mudulu munaku yaali̱i̱ri̱, Mukama yaamwegwa,
kandi yaamujuna yaamutoolaho kabii kensei̱.
7 Malayika wa Mukama yeelogooleerya bati̱i̱na Mukama
naabajuna.
8 Mu̱bbi̱leho muwone Mukama nka kwali murungi,
ali na mu̱gi̱sa ei̱ru̱ki̱ra muli yo.
9 Mu̱ti̱i̱ne Mukama nywe bantu ba Ruhanga,
bamu̱ti̱i̱na abagabirira byensei̱ bibetaaga.
10 Ntali zisobora kwegama,
bei̱tu̱ batoolya Mukama tibeetaaga kintu kyensei̱.
11 Mwi̱ze nywe baana bange, mu̱nzegwe,
nkugyenda ku̱beegesya ku̱ti̱i̱na Mukama.
12 Naani ali hahwo akwendya b̯womi,
kandi akwendya biro binene, aleke awone birungi?
13 Otangenge kalimi kaamu kubaza kubiibi,
na mu̱nwa gwamu kuhanuura byab̯u̱gobya.
14 Olekenge kukora bibii, okore birungi,
otoolyenge b̯u̱si̱nge kandi ob̯ulindenge.
15 Mei̱so ga Mukama geicala hali bamananu,
mapokopo gaamwe geetegeerya kukunga kwab̯u.
16 Mukama asuula bakora bibiibi,
ali̱bahwerekereerya bensei̱ ku nsi bantu babeebeere ki̱mwei̱.
17 Bantu baamwe b̯ubaakamweta abajune,
Mukama yeegwa naabajuna bizub̯u byab̯u byensei̱.
18 Mukama ali heehi̱ na ba mitima mi̱b̯u̱ndeeri̱,
kandi ajuna ba myozo mitali na ku̱ni̱hi̱ra.
19 Wamananu abba na bizub̯u binene,
bei̱tu̱ Mukama byensei̱ abimujunambe.
20 Mukama amulinda nab̯wegyendereza,
nagaana kabii kensei̱ kumudwereera.
21 Babiibi baalyeletera kuhwerekeera,
bab̯wo banoba bantu bamananu balijunaanwa.
22 Mukama acungura b̯womi b̯wa bantu baamwe,
tihaloho ei̱ru̱ki̱ra muli yo alijunaanwa.