105
1 Mu̱si̱i̱me Mukama mukunge ibara lyamwe,
mwolokye bantu bintu byakora!
2 Mu̱hi̱i̱mi̱re nimumuhariiza,
mubaze ha byamahanu byamwe byensei̱!
3 Mu̱semererwe hab̯wa ibara lyamwe li̱syanu̱,
nywe baramya Mukama mwegonze!
4 Mu̱toolye Mukama hamwei̱ na maani gaamwe,
mu̱mwekwate b̯utalekeera.
5 Mwi̱calenge ni̱mwi̱zu̱ka byamahanu byakora,
na ncwa gya misangu myamwe.
6 Beizukulu bʼI̱bbu̱rahi̱mu̱ muheereza waamwe,
batabani̱ ba Yakobbo gi̱yekoomeeri̱, mwi̱zu̱kenge bya mahanu byakora!
7 Yooyo Mukama Ruhanga weetu̱,
asalira nsi gyensei̱ misangu.
8 Ei̱zu̱ka ndagaanu gyamwe gya biro na biro,
na miragu myamwe ku̱doosya mi̱hi̱hi̱ ru̱ku̱mi̱.
9 Ndagaanu gi̱yaakoori̱ nʼI̱bbu̱rahi̱mu̱,
yaarahi̱i̱ri̱ muragu gwamwe nʼI̱saka
10 Ndagaanu gi̱gyo, Ruhanga yaagi̱kwati̱i̱rye Yakobbo,
yaagiha Bei̱saleeri̱ kumalaho biro byensei̱,
11 yaakoba yati, “Ndikuha nsi gya Kanaani̱,
gubbe mugab̯u gwa b̯ugwetwa b̯wamu.”
12 B̯atakabbeeri̱ kukanya,
baali bagenyi̱ mu nsi gya Kanaani̱.
13 Nibazengeeranga b̯uli ihanga
nibaruga mu b̯ukama b̯u̱mwei̱ nibagyenda mu bantu bandi.
14 Bei̱tu̱ Ruhanga atakeeki̱ri̱zenge muntu noomwei̱ ku̱bawonawonesya,
hab̯wab̯u, yaacoomeerengi bakama
15 naakoba yati, “Mu̱takwatahoona batongoole bange,
baragu̱ri̱ bange mutabakora kubii!”
16 B̯uyaagu̱mi̱ri̱ho nzala mu nsi,
yaakeeyahoona bidyo byab̯u byensei̱,
17 yaatu̱mi̱ri̱ muntu mu̱mei̱so gaab̯u,
mu̱nyaku̱tu̱ndwa nka mwiru, ibara lyamwe Yozefu̱.
18 Baamu̱bbohi̱ri̱ njegere mu magulu,
baamuteera kyoma mwi̱coti̱.
19 Yozefu̱ yei̱ceeri̱ mu nkomo,
Mukama yaamu̱pi̱ma ku̱doosereerya bigambu bi̱yaabazi̱ri̱.
20 Nahaahwo, hooho Mukama wa Mi̱si̱ri̱, yaaragi̱i̱ri̱ bamu̱teesye,
kasi Faraaho mulema ihanga li̱lyo yaamwahuura.
21 Mukama yaamu̱handi̱i̱rye,
yaamukwatya b̯ujunanizib̯wa b̯wensei̱ mu kikaali,
22 kuragira bayolo bensei̱,
na kwegesya balemi̱ byamagezi̱.
23 Hei̱nyu̱ma, I̱saleeri̱ gyagyendi̱ri̱ Mi̱si̱ri̱,
Yakobbo yeicala mu nsi gya Haamu nka munyamahanga.
24 Mukama yaaheeri̱ bantu baamwe kukanya,
yaabaha rutege kukiraho banyanzigwa baab̯u.
25 Yaaheeri̱ Banyami̱si̱ri̱ kubanoba
na kudyamwo rukwe baheereza baamwe.
26 Ruhanga yaatu̱mi̱ri̱ Mu̱sa muheereza waamwe,
hamwei̱ nʼAlooni̱ gi̱yaakomirimwo.
27 Baakoori̱ b̯uboneru b̯wa byamahanu b̯wamwe mu Banyami̱si̱ri̱,
na bikuhuniriza mu nsi gya Haamu.
28 Ruhanga yaabasi̱ndi̱ki̱i̱ri̱ nti̱ti̱ kandi nsi gyeragura,
kubba baajeemeeri̱ biragiro byamwe baalemwa ku̱teesya bantu baamwe kugyenda.
29 Meezi̱ gaab̯u yaagafoori̱ri̱ ibbanga,
nsu̱ zaab̯u zensei̱ zaakwa.
30 Masonsooni̱a gei̱zwi̱ri̱ b̯uli kicweka,
na mu ki̱si̱i̱ka kya ntabbu gya mukama de gaali̱yo.
31 Ruhanga yaaragi̱i̱ri̱ bi̱du̱ndu̱li̱ bya nsohera,
na nsinya byei̱zu̱lya nsi gyab̯u gyensei̱.
32 Mu kiikaru kya ndagali̱, baatu̱ngi̱ri̱ ndagali̱ gya mahi̱ga,
b̯u̱serya hamwei̱ na nkuba mu nsi gyensei̱.
33 Yaahwerekereerye mi̱zabbi̱bbu̱ na mi̱ti̱i̱ni̱ myab̯u,
yaacwacwana misaali mya nsi gyab̯u myensei̱.
34 Yaaragi̱i̱ri̱ nzi̱ge zei̱za,
mu b̯unene zitakubalwa.
35 Zaahwerekereerye bi̱merwa bya munsi gyab̯u gyensei̱,
b̯uli kilimwa kya mwitehe lyab̯u kyadiib̯wa.
36 Kasi yei̱ta b̯uli mu̱zi̱gai̱jo mu gi̱gyo nsi,
na b̯uli kilimwa kyensei̱ kikubanza kuruga mu̱ndi̱mi̱ro zaab̯u.
37 Ruhanga b̯u̱yaatoori̱ Bei̱saleeri̱ kuruga Mi̱si̱ri̱, baatwalageeni̱ feeza na zaabbu,
atakabbeho noomwei̱ mu bo munyakusiitaara.
38 Banyami̱si̱ri̱ baasemereerwe hab̯wa bei̱saaleeri̱ kubarugaho,
kubba baati̱nwengi̱ hoi̱.
39 Yaababbu̱mbi̱ri̱i̱ri̱ na bikaka,
yaabateraho mworo gubamulukirenge mu b̯wi̱re b̯wei̱jolo.
40 Baasabi̱ri̱ bidyo yaabaha maanu,
yaabeecuti̱i̱rye migaati kuruga mwiguru.
41 Ruhanga yaati̱i̱rye lubbaali meezi̱ gaalwa,
gaaheta nka mugira mu nsi gyomu.
42 Hab̯wakubba yei̱zu̱ki̱ri̱ muragu gwamwe gu̱syanu̱,
gu̱yaaragani̱si̱i̱rye muheereza waamwe I̱bbu̱rahi̱mu̱.
43 Baasemereerwe hoi̱ Ruhanga b̯u̱yaabatoori̱ mu nsi gya Mi̱si̱ri̱,
baali̱batengi̱ nibatokera hakyendi̱.
44 Mukama yaabaheeri̱ nsi,
na b̯uli ki̱mwei̱ kya banyamahanga baali bakolereeri̱,
45 aleke bakwate mateeka gaamwe
kandi bahondere biragiro byamwe.
Haari̱i̱ze Mukama!