104
1 B̯womi b̯wange haariiza Mukama!
Ai̱ Mukama Ruhanga wange oli wamaani mali̱!
Oli mukooto kandi wa ki̱ti̱i̱ni̱sa kwo!
2 Welongoleerwe kyererezi̱ nkʼolweri̱ lu̱goye,
waaregi̱ri̱ iguru nka mu̱bi̱mba heema.
3 Obi̱mba nnyu̱mba gyamu ku meezi̱ nkoku̱gi̱bi̱mba ha lubbaali,
ofoora bikaka kigaali kyamu,
nooli̱bati̱ra hakyendi̱ wa mpehu nka bimpaha.
4 Afoora batumwa baamwe mpehu,
baheereza baamwe ndimi za mworo.
5 Waateeri̱ nsi ha mu̱si̱nge gwagyo,
aleke gi̱tali̱zi̱ngi̱zi̱ka.
6 Waagyelogoleerye na meezi̱,
meezi̱ gaabbumba nsahu.
7 B̯u̱wacomeeri̱ meezi̱ gaasyereeri̱ho,
b̯u̱gegwi̱ri̱ kubbwatuka kwamu gaaborogota.
8 Meezi̱ gaaheteeri̱ kwakyendi̱ wa nsahu,
gabbwomoka mu bihanga.
9 Waagatereeri̱ mubaga aleke gatacwa,
kandi gaatali̱i̱ra ku̱bbu̱tya nsi.
10 Oha misu kubbwoma meezi̱ mu migira,
nigaheetera hakati̱ wa mbamba na bihanga.
11 Hooho bisolo bya mu kisaka binyweera,
nyoota gimalika mu ndogoyi̱ za mwirungu.
12 Mu misaali mi̱hereeri̱ho,
hooho bi̱nyoni̱ bi̱bi̱mbi̱ra bizonza byabyo nibyegonzeramwo.
13 Osi̱ndi̱ka meezi̱ kuruga mwiguru,
nsi nigicuta byana bya mulimo gwamu.
14 Ohandya isubi lya bisolo kudya,
na bilimwa bya bantu kuruga mwitehe.
15 Hooho batungira mwenge gwa mi̱zabbi̱bbu̱ gubaha kusemererwa,
hamwei̱ na maku̱ta gaaku̱nyi̱ri̱i̱rya b̯u̱syo b̯wab̯u,
na bidyo bikubaha maani.
16 Misaali mya Mukama mitunga ndagali̱ ginene,
mi̱vu̱le mya Lebbanooni̱ mi̱yeeli̱mi̱i̱ri̱.
17 Mu misaali mi̱myo, bi̱nyoni̱ hooho bi̱bi̱mbi̱ra bizonza,
manunda nigatungiramwo b̯ulaalu b̯wago.
18 Mparaaki ziicala mu nsahu zilei,
caali hali lubbaali hooho nsengi̱ zeebi̱sa.
19 B̯wateeri̱hoona mweri̱ aleke gwahu̱kani̱enge kasu̱mi̱,
lyoba lyegenge magwere gaalyo.
20 Oleetaho nti̱ti̱, b̯wi̱re b̯wei̱jolo,
bisolo byensei̱ bya mu kisaka nibihulukayo.
21 Ntali zihuruguma nizitoolya zi̱kyagu̱mi̱sya,
aleke Ruhanga azi̱di̱i̱syenge nka b̯uli kiro.
22 Lyoba b̯ulihuluka,
zigyenda nizilaala mu b̯wingira b̯wazo.
23 Kasi bantu nibabyoka nibagyenda kukora milimo myab̯u,
bakora ku̱doosya joojolo.
24 Mukama, byokoori̱ kabinene!
Byensei̱ waabi̱koori̱ mu magezi̱ gaamu.
Nsi gyensei̱ gi̱i̱zwi̱ri̱ bihangwa byamu.
25 Haloho itaka likooto kandi ligali,
cali bihangwa bitakubalwa biicala,
bikooto na bi̱dooli̱
26 Itaka li̱lyo, hooho maati̱ garabira,
na bihiri bi̱waahangi̱ri̱ cali bi̱zeenyera.
27 Bi̱byo byensei̱ byekwata weewe,
obi̱di̱isya mu b̯wi̱re b̯wonyi̱ni̱.
28 B̯wobiha bidyo, nibibisorooza,
obiha byakudya nibidya nibiicutira ki̱mwei̱.
29 Woobiima, nibituntura,
woobi̱toolaho rwoya, nibikwa,
bi̱bbola nibiira icuucu.
30 Waabi̱hangi̱ri̱ na mwozo waamu,
waabiha kwomeera byei̱zu̱lya nsi.
31 Leke ki̱ti̱i̱ni̱sa kya Mukama ki̱i̱calengeho biro byensei̱,
Aleke asemereerwe mu milimo myamwe.
32 Alingiira nsi ni̱gi̱tengeeta,
akwata ha nsahu nizitirimuka na mwi̱ca!
33 Ndi̱hi̱i̱mi̱ra Mukama biro bya b̯womi b̯wange b̯wensei̱.
Ndi̱hi̱i̱ma nimpariiza Ruhanga wange nincaali ku nsi.
34 Leka biteekerezu byange byense bimusemezenge
kubba nyenyumiriizira muli Mukama
35 Leka babiibi bamalikireho ki̱mwei̱ mu nsi,
nkori̱ za bibii zitalizookeraho ki̱mwei̱.
Ai̱ mutima gwange, haariiza Mukama!
Haari̱i̱ze Mukama!