103
Zabbu̱li̱ gya Dau̱di̱.
 
Ai̱ mutima gwange, haariiza Mukama,
na byensei̱ bili muli gya
haari̱i̱ze ibara lyamwe li̱syanu̱!
Haariiza Mukama, ai̱ mutima gwange,
kandi oteebeera birungi byakora.
Aganyira b̯ubiibi b̯wamu b̯wensei̱,
naahoni̱a na nseeri̱ zaamu zensei̱.
Munyakucungura b̯womi b̯wamu b̯wensei̱ kuruga mu ki̱i̱na,
akulwalya kondo gya mbabazi̱ na ngonzi zinene,
naakuha birungi,
bi̱kwi̱ryemwo maani ga b̯uto nka ngweri̱.
 
Mukama akora birungi,
aha b̯winganiza hali bab̯wo bamigiriziib̯we.
Yoolokeerye nkora gyamwe hali Mu̱sa,
na milimo myamwe hali Bei̱saleeri̱.
+Mukama eicala wambabazi̱ kandi mu̱ganyi̱ri̱,
tabihirwa wangu, ngonzi zaamwe zinene tizihinduka.
Tali̱lamba njenjeera,
kandi talibba na ki̱ni̱ga b̯wi̱re b̯wensei̱.
10 Tatufubira ku̱si̱gi̱ki̱ra ha bibii byetu̱,
tatubonereza nka b̯ubiibi b̯wetu̱ ku̱b̯u̱semereeri̱.
11 Nkeiguru kulili hakyendi̱ hoi̱ na nsi,
kwokwo ngonzi zaamwe zinene ziicala hali bab̯wo bamu̱ti̱i̱na.
12 B̯uhulukalyoba nka kuheicala hadei na b̯ugwalyoba,
kwokwo yatyo atutoolaho bibii byetu̱.
13 Mu̱li̱ngo bba baana aganyira baana baamwe,
kwokwo na Mukama aganyira bab̯wo bamu̱ti̱i̱na.
14 Kubba yeegi̱ri̱ b̯uhangwa b̯wetu̱,
ei̱zu̱ka nka ku̱twaru̱gi̱ri̱ mwicuucu.
 
15 B̯womi b̯wa muntu b̯uli nkeisubi,
rundi byakyo bya mwirungu bikunkumuka ni̱bi̱syeraho wangu.
16 Mpehu gi̱bi̱ku̱u̱ta nibirugaho
bitakusobora kwi̱raho gwakandi.
17 Bei̱tu̱ ngonzi zinene za Mukama ziicaliraho kuruga kadei na kadei, hali bab̯wo bamu̱ti̱i̱na,
mananu gaamwe gadwereera beizukulu ba bantu,
18 na bab̯wo bei̱zu̱ka ndagaanu gyamwe,
kandi nibakwata biragiro byamwe.
19 Mukama ateeri̱hoona kitebe gya b̯ukama b̯wamwe mwiguru,
kandi akulema b̯uli kintu kyenseenya.
20 Muhaariize Mukama, nywe bamalayika baamwe,
nywe bamaani banyakukwata kigambu kyamwe,
mukab̯undalira iraka lyamwe.
21 Muhaariize Mukama, nywe mahe gaamwe nywensei̱,
nywe baheereza baamwe bakora bi̱yendya!
22 Muhaariize Mukama, nywe bihangwa byensei̱,
mu bikaaru byamwe byensei̱ byalemeramwo.
B̯womi b̯wange, haariiza Mukama!
+ 103:8 Yakobbo 5:11