106
1 Mu̱haari̱i̱ze Mukama!
Mu̱si̱i̱me Mukama, kubba abba murungi,
kubba ngonzi zaamwe zinene za biro na biro!
2 Tihalohoona akusobora kumuhaariiza kikumala,
ku̱si̱gi̱ki̱ra ha bintu byamaani byakora.
3 Bali na mu̱gi̱sa bab̯wo balibatira mu b̯u̱terekereru̱,
nibakora birungi b̯wi̱re b̯wensei̱.
4 Ai̱ Mukama, onzi̱zu̱ke waakakwatirwanga mbabazi̱ bantu baamu,
mu b̯wi̱re b̯wa kubajuna, wei̱zanga nonjuna,
5 aleke nsobore kuwonaho bakome baamu nibakutunga mi̱gi̱sa,
kwokwo njaguze mu kusemererwa kweihanga lyamu,
kandi nkuhe ki̱ti̱i̱ni̱sa hamwei̱ na bantu baamu.
6 Twakoori̱ kibii nka bahaaha beetu̱,
twakora bintu bitakusemeera.
7 B̯ubaali Mi̱si̱ri̱, batakateho mutima,
ha byamahanu bi̱wabakoleeri̱,
rundi kwi̱zu̱ka ha b̯unene b̯wa ngonzi zaamu zinene,
bei̱tu̱ baajeemera ha mutanda gwa Itaka Lyengu̱.
8 Ki̱kyo naab̯ukyabberi̱ho, yaabaju̱ni̱ri̱ hab̯wa mananu gei̱bara lyamwe,
aleke bantu beege b̯u̱sobozi̱ b̯wa maani gaamwe.
9 Yaacoomeeri̱ Itaka Lyengu̱ lyebagaania,
yaabambu̱la ndi̱ha nka bakulibatira heitehe lyomu.
10 Kwokwo yatyo yaabaju̱ni̱ri̱ kuruga mu bantu banyakubba babanobi̱ri̱,
yaabacungura kuruga mu banyanzigwa baab̯u.
11 Meezi̱ gaabbu̱u̱ti̱i̱rye banyanzigwa baab̯u,
hatakabbeho noomwei̱ munyakusigalaho.
12 Hei̱nyu̱ma mwomwo bei̱ki̱ri̱i̱ze miragu myamwe,
kasi baahi̱i̱ma nibamuhaariiza.
13 Bei̱tu̱ beebereeri̱ b̯wangu b̯wangu bintu bi̱yabakoleeri̱,
batakamu̱li̱ndi̱i̱re abahab̯ure.
14 B̯ubaali mwirungu beegombi̱ri̱ bidyo bi̱baadyengi̱ mu nsi gya Mi̱si̱ri̱,
baamali̱ri̱i̱ri̱ nibakulenga Ruhanga.
15 Yaabaheeri̱ b̯uli kyensei̱ ki̱bendyengi̱,
bei̱tu̱ hei̱nyu̱ma yaabahwerekereerya na b̯u̱seeri̱ b̯wa kabii.
16 B̯uli muntu mwihamba, yaakwati̱i̱rwe i̱hali̱ hab̯wa Mu̱sa,
hamwei̱ nʼAlooni̱ mutongoole wa Mukama.
17 Nsi gyeku̱ngu̱u̱ri̱ gyamera Dasani,
kandi gyabbu̱tu̱ki̱ra kitebe kya Abbi̱raamu̱.
18 Mworo gwabbu̱tu̱ki̱ri̱ mu ki̱kyo kitebe,
gwahwerekereerya bantu babiibi benseenya.
19 Ha lusahu Holebbu̱ beekoleeri̱ ki̱si̱sani̱ kya nte,
baaramya ki̱si̱sani̱ kya kyoma.
20 Baahi̱ngi̱si̱i̱rye ki̱ti̱i̱ni̱sa kya Ruhanga,
baaki̱ha nte gidya isubi.
21 Beebeera Ruhanga Mu̱ju̱ni̱ waab̯u,
munyakubakoora byamaani munsi gya Mi̱si̱ri̱.
22 Bintu byamahanu mu nsi gya Haamu,
kandi bikuhuniriza hʼItaka Lyengu̱.
23 Yaali akobi̱ri̱ abahwerekereerye,
kabbe ataali Mu̱sa mutongoole waamwe kubatonganeera,
ku̱holya ki̱ni̱ga kyamwe kyakubahwerekereerya.
24 Mwomwo baagaya kwingira mu nsi gyakusemererwa,
baalemwa kwikiriza miragu myamwe.
25 Beenghu̱ru̱nghu̱u̱ti̱i̱rye mu heema zaab̯u,
bataketegeerye Mukama kyakubaweera.
26 Nahab̯waki̱kyo yaabyokeerye mikono myamwe naabarahirira nti
ali̱bahwerekereerya mwirungu,
27 Kandi beizukulu baab̯u bakwere mu mahanga,
basasaane mu nsi gyensei̱.
28 Bantu beekonyi̱ri̱ mu kuhaariiza Bbaali mu kicweka kya Peeyoori̱,
baadi̱i̱ri̱ bidyo bi̱bahongerengi̱ baku̱u̱.
29 Baakwati̱si̱i̱rye Mukama ki̱ni̱ga hab̯wa bikorwa byab̯u,
kasi yaabafubira na b̯u̱seeri̱ b̯wa kabii.
30 Fenehansi̱ yaabyoki̱ri̱ yaafubira nkori̱ za bibii,
kasi b̯u̱seeri̱ b̯wahona.
31 Kiki kyamu̱leteeri̱ kweteb̯wanga munanu,
mu b̯uli mu̱hi̱hi̱ gwensei̱.
32 Ha meezi̱ ga Meri̱bba bantu baasali̱i̱ze Mukama
kabii kei̱zi̱ra Mu̱sa hab̯wab̯u,
33 hab̯wakubba baasali̱i̱ze mwozo gwamwe,
yaakwatwa ki̱ni̱ga yaabaza bigambu bibiibi.
34 Batakazi̱kye bantu,
nka Mukama kuyaali abaragi̱i̱ri̱ bakore,
35 bei̱tu̱ beekweti na banyamahanga,
baahondera mirwa myensei̱ minyakukorwangayo.
36 Baaheeri̱i̱ze mbandwa
ki̱nyaku̱bei̱ri̱ra mutegu gwab̯u.
37 Bahara na batabani̱ baab̯u,
baabahongeeri̱ mizumu.
38 Baabbwomi̱ri̱ ibbanga litalohoona musangu,
ibbanga lya baana baab̯u,
libaahongerengi mbandwa za Kanaani̱,
lyahenera nsi gyenseenya.
39 Beeheneeri̱ benkei̱ hab̯wa bikorwa byab̯u bibiibi,
naab̯utesigwa kwa bikorwa byab̯u.
40 Ki̱ni̱ga kya Mukama kyakira hali bantu baamwe,
baamutamira ki̱mwei̱.
41 Yaabaheeri̱yo hali banyamahanga,
aleke bafugwe banyanzigwa baab̯u.
42 Banyanzigwa baab̯u baabaki̱i̱ri rutege,
bei̱ra nka beiru mu mei̱so gaab̯u.
43 Mirundi minene yaabaju̱nengi̱,
bei̱tu̱ bo baamali̱ri̱i̱ri̱ mu̱b̯u̱jeemu̱ hab̯wa bigyendeerwa byab̯u,
bibii byab̯u byabeeri̱ri̱i̱rya hansi.
44 Bei̱tu̱ nab̯wo Ruhanga yaaweeni̱ b̯ujune b̯wab̯u,
yeegwa kusaba kwab̯u.
45 Hab̯wab̯u yei̱zu̱ki̱ri̱ ndagaanu gyamwe,
hab̯wa ngonzi zaamwe zinene yeezi̱ramwo.
46 Yaaheeri̱ bensei̱ banyakubawonawonesya
kwi̱ra kubasaasira.
47 Ai̱ Mukama Ruhanga weetu̱ tu̱ju̱ne,
kandi otucooke kuruga mu mahanga,
tusobore ku̱si̱i̱ma ibara lyamu li̱syanu̱,
kandi tujaguze nitukuhaariiza.
48 Ahaariizwe Mukama, Ruhanga wʼI̱saleeri̱
biro na biro.
B̯uli muntu akobe, “Ami̱i̱na!”
Haari̱i̱ze Mukama!