4
Aneqqi n Ic-Bucat
1 Umi isřa mmis n Cawul, aqa Abnir immut di Ḥabrun, dewřen ifassen nnes ḍeɛfen u marra Israil innexřeɛ.
2 Mmis n Cawul tuɣa ɣares tnayen n yeryazen jar imsexxaren nnes, inni iǧan d řqebṭanat n bandiyyat. Ijjen qqaren as Baɛna u wenneɣni Rakab, tuɣa aten d iḥenjiren n Rimmun, Abi’ruti, zeg ayt n Binyamin, maɣar uřa d Biɛrut ittwaḥseb-dd ɣar Binyamin.
3 Ibiɛrutiyyen arewřen ɣar Jattayim uca qqimen zeddɣen dinni ař ass-a am ibarraniyyen.
4 Yunatan, mmis n Cawul, tuɣa ɣares ijj n mmis nni tuɣa iqarrmen zi tnayen n iḍaren. Netta tuɣa ɣares xemsa n iseggʷusa umi dd-yusa řexbar x Cawul d Yunatan zi Yazraɛil. Tenni t isseymen tuɣa tᵉṭṭef i-t uca tarweř. Aqa deg uqeǧeq n tarewřa, imsar, netta iwḍa, idweř iqarrem. Qqaren as Mafibucat.
5 Rakab d Baɛna, iḥenjiren n Rimmun, Abiɛruti, ṭṭfen abrid uca usin-dd di ṭṭḥa n uziř ɣar taddart n Ic-Bucat. Netta tuɣa izzeř di qama di tmeddit.
6 Xzar, nitni udfen ɣar daxeř di taddart axmi tuɣa nwan ad ksin irden, uca ssnuqqben t deg uɛeddis. Rakab d umas Baɛna xtuttřen.
7 Nitni udfen ɣar taddart umi t tuɣa izzeř di qama nnes deg wexxam n yiḍeṣ nnes, uca ssnuqben t, nɣin t uca qessen as azeǧif. Xenni ksin azeǧif nnes akidsen uca uyuren ǧiřet tmun, kkin abrid n Řewḍa.
8 Nitni iwyen azeǧif n Ic-Bucat ɣar Dawud ɣar Ḥabrun, nnan i ujeǧid: “Xzar, azeǧif n Ic-Bucat, mmis n Cawul, řeɛdu nnec, wenni tuɣa yarezzun buḥbeř nnec. Aqa ass-a SIDI ixřef i sidi inu ajeǧid zi Cawul d zzariɛet nnes.”
9 Maca Dawud yarra-dd x Rakab d umas Baɛna, iḥenjiren n Rimmun, Abiɛruti, inna asen: “S tidett am iddar SIDI, wenni ifekken řeɛmar inu zi marra řeḥṣaret!
10 Aqa wenni d ayi dd-yiwyen řexbar uca inna: ‘Xẓar, Cawul immut!’, tuɣa ittɣiř as di tiṭṭawin nnes aqa netta am yijjen i dd-yiwyen řexbar aṣebḥan, maca necc ṭṭfeɣ t uca nɣiɣ t di Ṣiqlaɣ, waxxa netta tuɣa iraja ad as wceɣ řmunet i řexbar aṣebḥan.
11 Mecḥař ɛad řexxu iryazen iɛeffanen inni inɣin ijj n weryaz d amsegged di taddart nnes x qama nnes! Xenni řexxu, ma necc war xeǧfeɣ xenni zzaywem idammen nnes u ad kenniw mḥiɣ zi temmurt?”
12 Xenni yumur Dawud imsexxaren nnes u nitni nɣin ten. Qessen asen ifassen d iḍaren uca uyřen ten ɣar uyeřmam n Ḥabrun. Azeǧif n Ic-Bucat, maca ksin t nitni, neḍřen t deg wenḍeř n Abnir di Ḥabrun.