3
Amenɣi jar aytbab n taddart n Cawul d Dawud
1 Idweř ij n umenɣi jar taddart n Cawul d taddart n Dawud i ikkin aṭṭas. Dawud idweř yarenni di jjhed u inni n taddart n Cawul gguren arexxun.
2 Di Ḥabrun ttwarwen-dd i Dawud iḥenjiren. Amenzu nnes Amnun, n Axinuɛam Tayazraɛilit.
3 Wiss tnayen nnes Kil’ab, n Abijayil, tamɣart n Nabal, Akarmali, wiss třata Abcalum, mmis n Maɛka, yeǧis n Talmay, ajeǧid n Jacur,
4 wiss arebɛa Aduniya, mmis n Hajjit, wiss xemsa Cafaṭya, mmis n Abiṭal,
5 u wiss setta Yitraɛam, n Ɛajla, tamɣart n Dawud. Ina ttwarwen-dd ɣar Dawud di Ḥabrun.
6 Min ikka umenɣi jar taddart n Cawul d taddart n Dawud, imsar, aqa Abnir issemɣar tizemmar nnes di taddart n Cawul.
7 Cawul tuɣa ɣares ict n tayya, ttřaɣan as Riṣfa. Nettat tuɣa-tt d yeǧis n Ayya. Uca inna Ic-Bucat i Abnir: “Mayemmi tudfed ɣar tayya n baba?”
8 Abnir iffugem x wawařen n Ic-Bucat, inna: “Ma necc d ijj n uzeǧif n weqzin i iqqnen ɣar Yahuda? Ma war iǧi d necc d wenni isscanen ɛad ař ass-a tamexsiwt inu icewwaren i taddart n Cawul, babac, u i yaytmas u i imeddukkař nnes, ma war iǧi d necc d wenni war cek ijjin ad tewḍid deg ifassen n Dawud? Ma texsed xenni ad xafi tɛeyyared ass-a x řmuɛṣiyyet ak-d ict n temɣart?
9 Ejj AREBBI ad igg ta d ta ak-d Abnir u ad dayes yarni ɛad! Am mammec ijjuǧ SIDI i Dawud ammu i zzayes ɣa ggeɣ,
10 umi ɣa sseɛduɣ tageldit n taddart n Cawul uca ad ssmetneɣ řɛarc n Dawud x Israil u x Yahuda, zi Dan ař Bi’r-Sebɛa.”
11 Uca netta war izemmar x temwarrit i Abnir, maɣar netta tuɣa iggʷed zzayes.
12 Xenni issekk Abnir ireqqasen di ṭṭweɛ n yixef nnes ɣar Dawud, inna: “Wi yiřan tammurt?” Inna ɛawed: “Egg akidi řɛahd nnec, xzar, ad ac wceɣ afus ḥima marra Israil ad ɣarek dd-inneqřeb.”
13 U netta inna: “Mliḥ, necc ad ggeɣ ijj n řɛahd akidek, maca mɣir ict n tmesřact ad ac tt ttareɣ. Ad ac iniɣ: ‘Cek war tẓarred udem inu, mɣir mařa cek ad tawyed da d amezwaru Mixal, yeǧis n Cawul, xmi dd ɣa tased ḥima ad tẓared udem inu.’ ”
14 Xenni issekk Dawud ireqqasen ɣar Ic-Bucat, mmis n Cawul, inna: “Ewc ayi-dd tamɣart inu Mixal, tenni i dd-iwyeɣ s mya n řeɛdařeyyat n Ifilisṭiniyyen s wexḍab n tesřit!”
15 Ic-Bucat issekk ireqqasen uca ikkes i-tt x weryaz nnes, x Falṭiyil, mmis n Layic.
16 Aryaz nnes yuyur akides ař Baxurim, yuyur ittru awarni as. Xenni inna as Abnir: “Uyur, ɛqeb!” Uca iɛqeb netta.
17 Tuɣa issiweř Abnir x imɣaren n Israil, inna: “Aṭṭas zeg wami kenniw texsem Dawud ad yiři d ajeǧid xawem.
18 Řexxu ggem t, maɣar SIDI issiweř ak-d Dawud, inna: ‘S ufus n Dawud, amsexxar inu, ad fekkeɣ řgens inu Israil zeg ufus n Ifilisṭiniyyen u zeg ufus n marra řɛedyan nsen.’ ”
19 Issiweř Abnir uřa deg imezzuɣen n ayt n Binyamin. Xenni yuyur Abnir ɣar Ḥabrun, ḥima ad issiweř deg imezzuɣen n Dawud x marra min iǧan d lemliḥ di tiṭṭawin n Israil u di tiṭṭawin n taddart n Binyamin.
20 Uca yusa-dd Abnir ɣar Dawud di Ḥabrun. Tuɣa ɛicrin n yeryazen akides. Dawud igga ict n zzardet i Abnir d yeryazen i kides iǧan.
21 Xenni inna Abnir i Dawud: “Necc ad kkareɣ ad ṭṭfeɣ abrid maḥend ad yarweɣ marra Israil ɣar sidi inu, ajeǧid, ḥima nitni ad ggen akidek ijj n řɛahd u cek ad tiřid d ajeǧid x marra min immeẓri řeɛmar nnec.” S uya ijja Dawud Abnir ad yuyur di řehna.
Abnir ittwaneɣ zi Yu’ab
22 Uca xzar, imsexxaren n Dawud d Yuwab ɛeqben-dd zeg ijj n usafar n ukecceḍ. Nitni iwyen akidsen ict n tkeccaḍt d tameqqrant. Abnir tuɣa war iǧi ɛad ɣar Dawud di Ḥabrun, maɣar Dawud tuɣa ijja i-t ad yuyur di řehna.
23 Řami dd-yiweḍ Yuwab d marra řɛeskar nni ɣares, ɛawden i Yuwab, nnan: “Abnir, mmis n Nir, yusa-dd ɣar ujeǧid u netta ijja i-t ad yuyur uca xenni yuyur Abnir di řehna.”
24 Xenni yuyur Yuwab ɣar ujeǧid, inna as: “Min teggid? Aqa Abnir yusa-dd ɣarek. Mayemmi i t tessekked uca xenni yuyur netta amenni waha?
25 Cek tessned Abnir, mmis n Nir. Netta yusa-dd waha ḥima ad cek icmet u ḥima ad issen x wuffuɣ nnec ɣar umenɣi u x weɛqab nnec u x marra min texsed ad tegged.”
26 Yuwab iffeɣ zi ɣar Dawud uca issekk ireqqasen awarni i Abnir inni t-i-dd-yarrin ad idweř zeg wanu n Sira. Maca Dawud war issin walu x man aya.
27 Umi dd-iɛqeb Abnir ɣar Ḥabrun, indeh i-t Yuwab ɣar uɣezdis di řwesṭ n tewwart n tendint maḥend ad kides issiweř s řhudnet uca xenni ijju t din deg uɛeddis, ařami immut, di ssibbet n wexřaf n idammen n umas Ɛasa’il.
28 Umi isřa Dawud manawenni awarni as, inna: “Necc d tgeldit inu d afurri zzat i SIDI i řebda x idammen n Abnir, mmis n Nir.
29 Ejj i-ten ad iřin x uzeǧif n Yuwab u x marra taddart n babas. Ejj taddart n Yuwab war d as ineqqeṣ ɛemmarṣ ca n ijj ad dayes yiři useyyeř, niɣ wenni di iǧa řbarṣ, niɣ wenni iṭṭfen deg umekkuk n uxeyyaḍ, niɣ wenni iwḍan s ssif, niɣ wenni ittxeṣṣan aɣrum!”
30 Yuwab d umas Abicay nɣin Abnir, minzi netta tuɣa inɣa umatsen Ɛasa’il deg umenɣi ɣar Jibɛun.
31 Maca Dawud inna i Yuwab u i marra řgens nni tuɣa ɣares iǧan: “Carrgem arruḍ nwem, yarḍem arruḍ n wecḍan uca uyurem zzat i řmeḥmeř n Abnir am teccatem agejdur!” Ajeǧid Dawud simant nnes yuyur ɣar ḍeffar n řmeḥmeř.
32 Řami neḍřen Abnir di Ḥabrun, issgeɛɛed ujeǧid tmijja nnes, iru ɣar wenḍeř n Abnir uřa d řgens iru marra.
33 Ajeǧid issgeɛɛed ict n ucetci n imettan i Abnir, inna: “Ma immut Abnir am immut ijj n ubuhaři?
34 Ifassen nnec tuɣa war carfen u iḍaren nnec tuɣa war qeyyden s ssnaseř n nnḥas, maca cek tewḍid am mammec iwḍa bnadem sadu ufus n ayt n řmuɛṣiyyet.” Řexdenni yarni řgens marra ɛad deg imeṭṭawen.
35 Marra řgens yusa-dd ɣar Dawud ḥima ad xas ziyyaren ad icc aɣrum am tuɣa ɛad d aziř. Maca Dawud ijjuǧ, inna: “Ejj AREBBI ad ayi igg ta d ta uca ad dayes yarni ɛad, mařa necc cciɣ ca n weɣrum niɣ ca nneɣni qbeř ma ad teɣři tfuct!”
36 man aya idweř ittwassen ɣar marra řgens uca tuɣa d man aya d lemliḥ di tiṭṭawin nsen, am mammec tuɣa marra min igga ujeǧid d lemliḥ di tiṭṭawin n marra řgens.
37 Marra řgens d marra Israil ssnen deg wass nni, aqa war dd-yekki zeg ujeǧid maḥend ad nɣen Abnir, mmis n Nir.
38 Inna ujeǧid i imsexxaren nnes: “Ma war tessinem kenniw, aqa ass-a iwḍa ijj n řḥakem, wah, ijj n weryaz d ameqqran di Israil?
39 Ass-a ḍeɛfeɣ, waxxa necc ttwadehneɣ d ajeǧid. Iryazen-a, arraw n Ṣaruya, qesḥen xafi. SIDI ad ixeǧeṣ aɛeffan tuɛeffna nnes nni igga.”