2
Dawud ittwadhen am ujeǧid x Yahuda
1 Awarni uya imsar, aqa Dawud isseqsa SIDI, inna: “Ma ad geɛɛdeɣ ɣar icten zi tneddam n Yahuda?” SIDI inna as: “Geɛɛed!” Uca Dawud inna: “Mani ɣa geɛɛdeɣ?” Netta inna: “Ɣar Ḥabrun.”
2 Xenni igeɛɛed Dawud ɣar Ḥabrun ak-d tnayen n temɣarin nnes, Axinuɛam zi Yazraɛil, u Abijayil, tamɣart n Nabal zi Karmil.
3 Dawud yarra ad geɛɛden ɛawed iryazen nni tuɣa akides iǧan, kuř aryaz ak-d twacunt nnes, uca nitni uyuren ad zedɣen di tneddam n Ḥabrun.
4 Awarni uya usin-dd yeryazen n Yahuda ɣar Ḥabrun uca dehnen Dawud dinni d ajeǧid x taddart n Yahuda. Xenni usin-dd ḥima ad xebbaren Dawud, nnan: “Iryazen n Yabic di Jilɛad aqa neḍřen Cawul.”
5 Xenni issekk Dawud ireqqasen ɣar yeryazen n Yabic di Jilɛad, inna asen: “Ad kenniw ibarek SIDI, minzi kenniw teggim i Cawul, sidi nwem, s tmexsiwt icewwaren uca tneḍřem t.
6 Ad awem isscen SIDI řexxu tamexsiwt nnes icewwaren d řaman nnes. Uřa d necc ad awem ggeɣ s tcuni, minzi aqa kenniw teggim aya.
7 Xenni řexxu, jjem ad ttwassjehden ifassen nwem u iřim tmeḥḥdem, maɣar Cawul, sidi nwem, immut. Uřa d taddart n Yahuda tedhen ayi d ajeǧid xasen.”
Dawud d Ic-Bucat, mmis n Cawul
8 Abnir, mmis n Nir, akumandar n řɛeskar n Cawul, tuɣa yiwi akides Ic-Bucat, mmis n Cawul, ɣar Maḥanayim.
9 Netta igga i-t d ajeǧid x Jilɛad, x Icuriyyen, x Yazraɛil, x Ifrayim, x Binyamin u x marra Israil.
10 Ic-Bucat, mmis n Cawul, tuɣa ɣares arebɛin n iseggʷusa umi idweř netta d ajeǧid x Israil, u netta iḥkem tnayen n iseggʷusa. Mɣir inni n taddart n Yahuda bedden ak-d Dawud.
11 Řqedd n wussan i tuɣa Dawud iḥkem di Ḥabrun am ujeǧid x taddart n Yahuda, tuɣa sebɛa n iseggʷusa d setta n iyuren.
12 Abnir, mmis n Nir, iffeɣ ak-d imsexxaren n Ic-Bucat, mmis n Cawul, zi Maḥanayim ɣar Jibɛun.
13 Uřa d Yuwab, mmis n Ṣaruya, d imsexxaren n Dawud ffɣen uca nitni mmeřqan ak-d wayawya ɣar uyeřmam n Jibɛun. Dinni qqimen nitni bedden, ijj ɣar uɣezdis-a n uyeřmam u wenneɣni x ujemmaḍ n uyeřmam.
14 Inna Abnir i Yuwab: “Ejj iḥudriyyen ad kkaren ad mmuɣzřen zzatneɣ.” Yuwab inna: “Nitni ad kkaren!”
15 Nitni kkaren, xenni ɛeddun. Aqa ḥesben tenɛac zi Binyamin i Ic-Bucat, mmis n Cawul, u tenɛac zeg imsexxaren n Dawud.
16 Ijj iṭṭef wenneɣni zeg uzeǧif u ijju as s ssif nnes deg uɣezdis n wenneɣni u nitni wḍan s tnayen idsen. S uyenni qqaren as i wemcan nni Ḥalqat-Haṣurim wenni iǧan ɣar Jibɛun.
17 Deg wass nni idweř umenɣi iqseḥ aṭṭas. Abnir d yeryazen n Israil ttwaɣellben zzat i wudem n imsexxaren n Dawud.
18 Tuɣa din třata n iḥenjiren n Ṣaruya, nitni d Yuwab d Abicay d Ɛasa’il. Ɛasa’il tuɣa ifsus x iḍaren am yijj zeg iɣayḍen n wezɣar deg iyyar.
19 Ɛasa’il iḍfar Abnir. Umi tuɣa iggur, war iḥeyyed ɣar ḍeffar n Abnir, řa ɣar yefus uřa ɣar uzeřmaḍ.
20 Uca inneqřeb Abnir, inna: “Ma d cek, Ɛasa’il?” U netta inna: “D necc!”
21 Abnir inna as: “Farɣ ɣar yefus niɣ ɣar uzeřmaḍ u cebbar deg ijj zeg iḥudriyyen u ksi i yixef nnec arruḍ nnes n řɛeskar!” Ɛasa’il maca war ixs ad xas iḥeyyed zi ḍeffar nnes.
22 Xenni inna Abnir ɛawed i Ɛasa’il: “Ḥeyyed zi ḍeffar inu. Mayemmi cek i ɣa wteɣ ɣar temmurt? Mammec i ɣa ggeɣ xenni ɛad ad xzareɣ i umac Yuwab di tiṭṭawin?”
23 Netta maca yugi ad as iḥeyyed. Xenni ijju as Abnir deg uɛeddis s yixef aneggaru n lansa nnes, ařami dd-issuffeɣ fřitca zi ḍeffar. Netta iwḍa din uca immut deg wemcan nni. Imsar belli marra inni dd-yusin ɣar wemcan mani iwḍa u mani immut Ɛasa’il, qqimen bedden.
24 Yuwab d Abicay ḍfaren Abnir. Řami dd-iwḍen nitni ař tawrirt n Amma, tenni zzat i Jiyaḥ, ɣar webrid n řexřa n Jibɛun, teɣři tfuct.
25 Ayt n Binyamin munen awarni Abnir, dewřen d ict n terbiɛt akides, uca ammu i qqimen nitni bedden x tqiccet n ict n tewrirt.
26 Abnir iřaɣa-dd x Yuwab, inna: “Ma ad icc ssif i řebda? Ma war tessined cek, aqa aya ad indeh ɣar ijj n uqeṭṭu d amerzag? Ař meřmi ɛad war teqqared i řgens nnec, ḥima ad iɛqeb zeg weḍfar n aytmatsen?”
27 Yuwab inna: “S tidett am iddar AREBBI, mařa cek war tessiwřed x ijj n umuɣzeř, xenni ad yiři řgens issbedd zi man aya ɣar ṣṣbeḥ, iři kuř aryaz ad issbedd zeg weḍfar n umas!”
28 Xenni isuḍ Yuwab deg uyicc n icarri u marra řgens issbedd. Nitni war ḍfaren ɛad Israil uca war mmenɣen ɛad ktar.
29 Abnir d yeryazen nnes cuqen ǧiřet nni marra di Řewḍa, ẓwan L’Urdun, kkin x marra taɣzurt uca iwḍen ɣar Maḥanayim.
30 Uřa d Yuwab iɛqeb-dd zeg weḍfar n Abnir u netta issmun marra řgens. Weddaren tseɛṭac n iryazen n Dawud uřa d Ɛasa’il.
31 Imsexxaren n Dawud maca tuɣa wtin aṭṭas n yeryazen zeg ayt n Binyamin u zeg yeryazen n Abnir. Mmuten teřt-mya u-settin n yeryazen.
32 Nitni ssgeɛɛden Ɛasa’il u neḍřen t deg wenḍeř n babas di Bayt-Laḥm. Yuwab d yeryazen nnes uyuren ǧiřet nni marra u řami iwḍen ɣar Ḥabrun, tenqar-dd xasen tfawt.