5
Dawud ittwadhen am ujeǧid di Hibrun
1 Marra tiqebbař n Israil usint-i-dd ɣar Dawud ɣar Ḥabrun, ssiwřent, nnant: “Xzar, neccin d iɣussan d weysum nnec.
2 Iḍennaḍ uřa d fariḍennaḍ umi tuɣa Cawul d ajeǧid xaneɣ, tuɣa d cek i dd-issuffɣen Israil ɣar umenɣi u tejjid i-t-i-dd ad idweř. Ɛawed inna ac SIDI: ‘Cek ad tarewsed řgens inu Israil u cek ad tiřid d řḥakem x Israil.’ ”
3 Xenni usin-dd marra imɣaren n Israil ɣar ujeǧid di Ḥabrun u ajeǧid Dawud igga ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil.
4 Tuɣa ɣar Dawud třatin n iseggʷusa umi idweř netta d ajeǧid. Netta iḥkem arebɛin n iseggʷusa.
5 Di Ḥabrun iḥkem x Yahuda sebɛa n iseggʷusa d setta n iyuren u di Urcalim iḥkem třata u-třatin n iseggʷusa x marra Israil d Yahuda.
Aṭṭefu n Urcalim
6 Ajeǧid iffeɣ ak-d yeryazen nnes ɣar Urcalim, ḥima ad immneɣ ak-d ayt n Iyabusiyyen, imezdaɣ n temmurt. Ssiwřen ak-d Dawud, nnan: “Cek war tᵉttidfed ca da, maɣar idarɣařen d iqiḍaren ad cek ḥṣaren, ad inin: ‘Dawud war da ittidef ca.’ ”
7 Dawud iḥewwes lburj n Ṣihyun, d wenni d tandint n Dawud.
8 Deg wass nni inna Dawud: “Kur ijj i ɣa iwten ijj n Uyabusi, ejj-i-t ad t immenḍar deg waman issizzřen aṭṭas. Iqidaren d idarɣařen icarreh i-ten řeɛmar n Dawud.” X uya qqaren: “Ijj n udarɣař d ijj n uqidar war dd-ttidfen ɣar taddart.”
9 Dawud iqqim izdeɣ di lqelɛa uca igga as: ‘Tandint n Dawud’. Ibna Dawud deg wenneḍ n lburj uřa ɣar daxeř nnes.
10 Dawud idweř yarenni di řemɣaret, maɣar SIDI, AREBBI n řɛeskarat, tuɣa-t akides.
11 Ḥiram, ajeǧid n Ṣur, issekk ireqqasen ɣar Dawud ak-d akeccuḍ n tcejjart n tengelt d ineqqacen n ukeccuḍ d ineqqacen n weẓru n řḥiḍ. Nitni ssbedden ict n taddart i Dawud.
12 Dawud issen, aqa SIDI tuɣa igga i-t d ajeǧid x Israil u tuɣa issgeɛɛed tageldit nnes di ṭṭweɛ n řgens nnes Israil.
13 Awarni twasit nnes zi Ḥabrun tuɣa Dawud yarenni tiyya d temɣarin i yixef nnes zi Urcalim u ttwarwen as-dd i Dawud ɛad iḥenjiren d tḥenjirin.
14 Ina d ismawen n iḥenjiren i d as dd-ittwarwen di Urcalim: Cammuɛ, Cubab, Natan, Suliman,
15 Yibḥar, Ilicuɛ, Nafaj, Yafiɛ,
16 Alicamaɛ, Alyadaɛ d Ilifalaṭ.
Aɣelleb x Ifilisṭiniyyen
17 Umi sřin Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa x man aya u netta ihwa ɣar lqelɛa.
18 Ifilisṭiniyyen usin-dd uca bezzɛen ixef nsen di teɣzurt n Irafawiyyen.
19 Xenni isseqsa Dawud SIDI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” SIDI inna i Dawud: “Geɛɛed, maɣar Necc nican ad ggeɣ Ifilisṭiniyyen deg ufus nnec!”
20 U yiweḍ Dawud ɣar Baɛl-Faraṣim. Dinni iwta Dawud Ifilisṭiniyyen, inna: “SIDI icuq zzat i wudem inu di řɛedyan inu am yict n tareẓẓit n waman.” X uya igga as i wemcan nni Baɛl-Faraṣim.
21 Ifilisṭiniyyen jjin dinni řexyařat n l’aṣnam nsen u Dawud d yeryazen nnes ksin ten akidsen.
22 Geɛɛden Ifilisṭiniyyen ict n twařa nneɣnit u bezzɛen ixef nsen di teɣzurt n Irafawiyyen.
23 Dawud isseqsa SIDI u Netta inna: “War ttgeɛɛid ca ḍidd nsen, maca ekk asen-dd ɣar ḍeffar, ad ɣarsen dd-tased zi jjihet n tcejjura n umetti.
24 Xmi ɣa tesřed i tecři n iṣuraf di tqiccat n tcejjura n umetti, xenni ffeɣ, thejmed, maɣar SIDI ad ac izwar zzat i wudem nnec, ḥima ad iwwet řɛeskar n Ifilisṭiniyyen.”
25 Dawud igga am mammec d as yumur SIDI u netta iwta Ifilisṭiniyyen zi Jibɛa ař mani ɣa tawḍed ɣar Jazar.