1 “War tteggem i yixef nwem l’aṣnam, war sbeddam řexyař ineqcen uřa d umayḍu iqeddsen, war ssrusam řexyař n weẓru di temmurt nwem, ḥima ad as tbendqem, minzi Necc d SIDI, AREBBI nwem! ◘

2 Ad teḥḍam ussan n ssebt inu uca ad awem iqarr ijj n uweqqar yuǧɣen i Zzawect inu Iqeddsen, aqa Necc d SIDI!” ◘

3 “Mařa ad tuyurem di tweṣṣa inu uca ad tᵉṭṭfem di tweṣṣa inu uca ad zzaysent teggem, ◘ 4 xenni Necc ad awem wceɣ anẓar di řweqt nnes, uca tammurt ad dd-tawi ṣṣabet nnes, uca ticejjura n yeyyar ad wcent řɣiǧet nsent. 5 Ad yiři usarwet ař ařqaḍ n uḍiř uca ařqaḍ n uḍiř ad yiři ař řweqt n uzarreɛ uca ad teccem ař ɣa tejjiwnem uca ad tzedɣem di řaman di temmurt nwem. ◘ 6 Necc ad ggeɣ řehna di temmurt. Mařa tᵉṭṭṣem, war ittiři wi kenniw i ɣa issiggʷden. Necc ad mḥiɣ řewḥuc iwɛaren zi temmurt uca ssif war dd-iẓekkʷi x temmurt nwem. ◘ 7 Ad teḍfarem řɛedyan nwem uca nitni ad wḍan s ssif nwem zzat i tiṭṭawin nwem. 8 Xemsa n yeryazen zzaywem ad ḍfaren mya uca mya zzaywem ad ḍfaren ɛecra-ařaf uca řɛedyan nwem ad wḍan s řeqḍeɛ n ssif zzat i tiṭṭawin nwem. ◼  ◘ 9 Minzi Necc ad ɣarwem dd-dewřeɣ uca ad awem dd-jjeɣ řɣiǧet uca ad kenniw arniɣ uca ad ssmetneɣ Řɛahd inu akidwem. 10 Am i ɣa teccem ɛad zi zzad nni txeznem, ad tekksem deɣya zzad aqdim, maḥend ad tejjem amcan i jdid. 11 Necc ad ggeɣ Tazeddiɣt inu di řwest nwem uca řeɛmar inu war zzaywem ittɛiffi ca ɛad. ◘ 12 Ad uyureɣ jar awem, Necc ad iřiɣ d AREBBI nwem uca kenniw ad ayi tiřim d řgens inu. 13 Necc d SIDI, AREBBI nwem, wenni kenniw dd-issuffɣen zi temmurt n Miṣra, ḥima war tᵉttiřim ɛad d isemɣan nsen. Necc arẓiɣ imqeǧaḍen n uzayřu nwem uca nedheɣ kenniw s wudem yuři.”

14 “Maca mařa war d ayi tesřim niɣ war tᵉtteggim marra min zi kenniw weṣṣiɣ, ◘ 15 uca mařa tesseḥqarem tiweṣṣa inu u řeɛmar nwem ad iɛiff zi lfarayiḍ inu, ař ɣa tawḍem war tᵉtteggem ɛad marra tiweṣṣa inu, uca ammu i ɣa tarẓem Řɛahd inu, 16 xenni Necc ad awem ggeɣ aya: ad xawem dd-ssehwiɣ arjef d bu-deǧis d tmessi n arwaḥ nni i ɣa iteḥḥan tiṭṭawin uca ad ɛeddben řeɛmar. Ad tzarɛem zzariɛet nwem baṭeř, minzi řɛedyan nwem ad tt ccen. 17 Ad ggeɣ udem inu ḍidd nwem ařami i ɣa ttwassexsarem zzat i wudem n řɛedyan nwem uca inni kenniw icarrhen ad xawem ṣellṭen uca kenniw ad tarewřem břa ad yiři wi kenniw iraran.” ◘

18 “U mařa awarni man aya ɛad war ɣari tesřim, Necc ad ɣares arniɣ sebɛa n twařawin, maḥend ad kenniw webbxeɣ x ddnub nwem. 19 Necc ad arẓeɣ aɛeffar n jjehd nwem, Necc ad arreɣ ajenna nwem am wuzzař d temmurt nwem am nnḥaṣ. 20 Ad tḍeyyɛem jjehd nwem baṭeř, minzi tammurt nwem war tᵉttic ṣṣabet nnes u ticejjura n temmurt war tticent řɣiǧet. 21 Mařa temɛařam kidi uca war tᵉttexsem ad ayi tesřim, xenni Necc ad xawem dd-ssehwiɣ ɛad sebɛa n jjrayeḥ anect n ddnub nwem. 22 Ad ɣarwem dd-ssekkeɣ řewḥuc n řexřa, maḥend ad awem xeḍfen tarwa nwem, ad sshellken řebhayem nwem, uca ad ssneqṣen lɛadad nwem, ařami ibriden nwem ad dewřen d ddmani.”

23 “Mařa s man aya kenniw war ɣari dd-ttesřim, maca teqqimem tᵉttemɛařam akidi, 24 xenni uřa d Necc ad qqimeɣ ttemɛařaɣ akidwem uca ad xawem dd-ssehwiɣ ɛad sebɛa n jjrayeḥ x ddnub nwem. ◘ 25 Ad xawem ssekkeɣ ijj n ssif nni i ɣa issekkaren antaqem n Řɛahd inu ař ɣa tᵉttwassmunem di tneddam nwem. Xenni Necc ad ssekkeɣ ṭṭaɛun di řwesṭ nwem uca kenniw ad tᵉttwasellmem deg ufus n řeɛdu nwem. 26 Xmi ɣa arẓeɣ řeɛweč n weɣrum nwem, xenni ɛecra n temɣarin ad ssenggʷent aɣrum nwem di tefqunt d ict, uca awarni i ɣa weznent aɣrum ad t i-dd-arrent uca kenniw ad t teccem, maca war tᵉttjiwinem. ◼ 27 Mařa ɛad s man aya war ɣari dd-tᵉttesřim, maca ad teqqimem ad temɛařam akidi, 28 xenni Necc ad xawem sɛareɣ u ad kenniw arebbiɣ, wah sebɛa n imuren Necc ad kenniw arebbiɣ di ssibbet n ddnub nwem. 29 Ad teccem aysum n iḥenjiren nwem uřa d aysum n tḥenjirin nwem ad t teccem. ◘ 30 Ad areddǧeɣ řegɛudi mani tᵉttwehhabem ddbayeḥ nwem, ad nḍareɣ ipilaren nwem n arebbi n tfuct, ad arreɣ řxecbat nwem x řxecbat n imeyḍa n l’aṣnam nwem uca řeɛmar inu ad zzaywem iɛiff. ◘ 31 Ad arreɣ tineddam nwem d řxarbet uca ad areddǧeɣ tizawiyyin iqeddsen nwem uca war ttexseɣ ad cemmeɣ ɛad řefwaḥet ittfuḥen nwem. 32 Wah, Necc ad areddǧeɣ tammurt uca řɛedyan nwem, inni dayes izeddɣen, ad zzayes nnxeřɛen.”

33 “Ad kenniw zuzzareɣ jar řegnus uca ad kseɣ ssif awarni awem uca tammurt nwem ad tedweř d řexřa uca tineddam nwem ad iřint d řxarbet. 34 Xenni tammurt ad xas arḍan wussan n ssebt nnes, marra ussan n wareddeǧ n temmurt, umi i ɣa tiřim di temmurt n řɛedyan nwem. Xenni ad tareyyeḥ temmurt u ad tegg tcuni x wussan n ssebt nnes. ◘ 35 Mařa ussan n wareddeǧ ad ɣares yiři wareyyeḥ, minzi tammurt war tareyyiḥ ca deg wussan n ssebt nwem řami tuɣa kenniw tzeddɣem dinni.”

36 “Ad ggeɣ tiggʷudi deg wuřawen n yinni zzaywem i ɣa iqqimen di temmura n řɛedyan nsen, ařami řḥess n ict n tfarect i yiwi usemmiḍ ad xasen yaẓẓeř u ad ten yarr ad arewřen am mammec ittarekkwař bnadem zi ssif. Nitni ad wḍan, waxxa war xasen ittiẓẓeř ḥed. 37 Ad nqarḍen ijjen deg wenneɣni am xmi ẓrin řeqdeɛ n yijj n ssif, waxxa war xawem ittiẓẓeř ḥed. Kenniw war tzemmaren ad teqqimem tbeddem zzat i tiṭṭawin n řɛedyan nwem, 38 maca kenniw ad tᵉttwahellkem jar řegnus uca tammurt n řɛedyan nwem ad kenniw tecc.”

39 “Inni zzaywem i ɣa iqqimen ad isřawen di temmura n řɛedyan nwem di ssibbet n řmuɛṣiyyet nsen. Uřa di ssibbet n řmuɛṣiyyet n řejdud nsen ad sřawen nitni jmiɛ akidsen.

40 Maca mařa neɛmen x řmuɛṣiyyet nsen d řmuɛṣiyyet n ibabaten nsen zi ssibbet n řeɣdar nsen i zi d ayi ɣdaren uca ɛawed mmɛařan akidi 41 - uca xenni uřa d Necc mmɛařiɣ akidsen u iwyeɣ ten ɣar temmurt n řɛedyan nsen, maḥend ad taɣ uř nsen war ixtinen ad yaḍar uca ad qebřen řexřaṣ i řmuɛṣiyyet nsen - 42 xenni Necc ad xarrṣeɣ ɛawed di Řɛahd inu ak-d Yaɛqub uca ɛawed di Řɛahd inu ak-d Isḥaq uca ad xarrṣeɣ di Řɛahd inu ak-d Ibrahim uca ad xarrṣeɣ ɛawed di temmurt. 43 Tammurt ad tᵉttwajj zzaysen uca ad xas arḍan wussan n ssebt nnes umi ɣa teqqim d ict n řxarbet xmi war dayes zeddɣen ɛad, uca nitni ad řemden ad qebřen lɛiqab n řmuɛṣiyyet nsen, minzi nḍaren lfarayiḍ inu u minzi řeɛmar nsen iɛiff zi tweṣṣa inu.”

44 “Sennej i uya, aqa d man aya: mařa aqa aten di temmurt n řeɛdyan nsen, Necc war ten neṭṭareɣ ca u war ten ttɛiffiɣ ař ten ɣa teḥḥiɣ u ad mḥiɣ Řɛahd inu akidsen minzi Necc d SIDI, AREBBI nsen! ◘ 45 Maca di ṭṭweɛ nsen ad ɛeqřeɣ x Řɛahd inu ak-d imezwura, inni nedheɣ zi temmurt n Miṣra zzat i tiṭṭawin n řegnus, maḥend ad iřiɣ d AREBBI i nitni, Necc d SIDI!”

46 Tina d tiweṣṣa d lfarayiḍ d izerfan nni igga SIDI jar as d jar ayt n Israil deg wedrar n Sina s tsexxart n Musa.