27
Lwuɛud d ufekki zzaysen
1 Issiweř SIDI ak-d Musa, inna:
2 “Siweř ak-d ayt n Israil uca ini asen, aqa mařa ixs ḥed ad igg ijj n lwaɛd i AREBBI, ad yiři ttaman n ufekki n řeɛmur ittwassqeddsen i SIDI ɛlaḥsab řqimet i tqeddared cek.
3 Mařa řqimet i tqeddared cek aqa d řqedd n ijj n weryaz zi ɛicrin ař settin n iseggʷusa, xenni ad tiři řqimet i tqeddared xemsin ciqlu n nnuqart ɛlaḥsab ciqlu n Zzawect Iqeddsen.
4 Mařa d ict n temɣart, xenni ad tiři řqimet i tqeddared třatin ciqlu.”
5 “Uca mařa d ijj n ubřiɣ zi xemsa ař ɛicrin n iseggʷusa, xenni ad tiři řqimet i tqeddared i yijj n weryaz ɛicrin ciqlu u i yict n temɣart ɛecra ciqlu.”
6 “Mařa d ijj n uḥenjir zeg yijj n uyur ař xemsa n iseggʷusa, xenni ad tiři řqimet i tqeddared i yijj n weryaz xemsa ciqlu n nnuqart u i yict n temɣart třata ciqlu n nnuqart.”
7 “Mařa d ijj n mmis n bnadem zi settin iseggʷusa niɣ sennej, xenni, mařa netta d aryaz, ad tiři řqimet i tqeddared xemmesṭac ciqlu u mařa d tamɣart ad tiři řqimet i tqeddared ɛecra n ciqlu.”
8 “Mařa tuɣa iẓřeḍ aṭṭas u war izemmar ad iwc řqimet i tqeddared cek, xenni ad t ssbedden zzat i wudem n ukehhan uca xenni ad iqeddar ukehhan řqimet nnes. Ad t iqeddar ukehhan ɛlaḥsab min izemmar ad issmun ufus n wenni iwcin awař, ammu i t ɣa iqeddar ukehhan.”
9 “Mařa d řebhayem i zi ɣa qeddmen tawhibt i SIDI, xenni marra min zzaysen ɣa iwc netta i SIDI, ad yiři iqeddes.
10 War ittbeddiř u war ixeǧef amuddar icnan x wenni iqebḥen niɣ amuddar iqebḥen x wenni icnan. Mařa ibeddeř ɛad ict n řebhimet s ict n řebhimet nneɣni, xenni ta d tenni i x tt ibeddeř ad iřint qeddsent.
11 Mařa teǧa d ict n řebhimet texmej, war iɛeddeř ad tt qeddmen d tawhibt i SIDI, xenni ad yarr řebhimet nni ad tbedd zzat i wudem n ukehhan.
12 Akehhan ad iqeddar řqimet nnes jar min icnan d min war iḥřin. Uca am mammec i tt ɣa tqeddared cek, am ukehhan, ammu i ɣa tiři.
13 Mařa netta ixs ɛad ad tt ifdi, ad xas yarni ict n tesɣart n texmusect n řqimet i tqeddared cek.”
14 “Mařa ca n yijjen issqeddes taddart nnes, maḥend ad tiři tqeddes i SIDI, xenni ad iqeddar ukehhan řqimet nnes jar min icnan d min iqebḥen. Am mammec iqeddar ukehhan řqimet nnes, ammu i ɣa tiři.
15 Mařa wenni tt issqeddsen ixs ad ifdi taddart nnes, xenni netta ad xas yarni ict n tesɣart n texmusect n řqimet ittwaggen s nnuqart uca ad tiři nnes ɛawed.”
16 “Mařa ca n yijjen issqeddes i SIDI ca n tesɣart n yeyyar nni ɣares iǧan, xenni ad tqeddared řqimet nnes ɛlaḥsab zzariɛet nnes. Zzariɛet n ijj n uḥumir n imendi ad as ggen xemsin ciqlu.
17 Mařa tuɣa issqeddes iyyar nnes zeg useggʷas n usřiwřew, xenni ad tedweř řqimet n yeyyar tbedd ɛlaḥsab řqimet i tqeddared.
18 Mařa tuɣa issqeddes iyyar nnes awarni i useggʷas n usřiwřew, xenni akehhan ad as ihṣeb řqimet s nnuqart n iseggʷusa iqqimen ař aseggʷas n usřiwřew i dd ɣa yasen u xenni ad tiři řqimet qell x řqimet tmun i tuɣa tqeddared cek.
19 Mařa wenni issqeddsen iyyar, ixs ad t ifdi nican, xenni ad yarni ict n tesɣart n texmusect di nnuqart x řqimet i tqeddared cek uca xenni ad as yiři ɛawed.”
20 “Mařa war ixs ad ifdi iyyar nni niɣ mařa izzenz iyyar i yijj n weryaz nneɣni, xenni war izemmar ad ittwafdi ɛad yeyyar.
21 Awarni řami dd-iffeɣ deg useggʷas n usřiwřew, ad yiři iyyar iqeddes i SIDI am yijj n yeyyar ittwaḥarrmen qaɛ. Ad yiři d agřa n ukehhan.”
22 “Mařa ca n yijjen issqeddes ijj n yeyyar nni isɣa i SIDI, maca war iǧi yeyyar n wagřa nnes,
23 xenni akehhan ad as iḥseb ttaman n řqimet i tqeddared cek ař aseggʷas n usřiwřew uca netta ad ixeǧeṣ řqimet i tqeddared deg wass nni d ijj am ict n tmesřact tqeddes i SIDI.
24 Deg useggʷas n usřiwřew ad dd-iɛqeb yeyyar ɛawed i wenni x t isɣa, i wenni tuɣa ɣar teǧa temmurt d agřa.
25 Aqeddar ad yiři ɛlaḥsab ciqlu n Zzawect Iqeddsen. Ad yiři ciqlu ɛicrin jira.”
26 “Maca amenzu, wenni ifarzen i SIDI zi řebhayem am umenzu, war iɛeddeř ad t issqeddes uřa d ijjen, niɣ d afunas i iǧa niɣ d ijjen zeg wuǧi, aqa-t i SIDI.
27 Maca mařa tuɣa-t zeg ict n řebhimet ixemjen, izemmar ad tt ifdi ɛlaḥṣab řqimet i tqeddared cek uca ad xas yarni ict n tesɣart n texmusect. Mařa war tᵉttwafeddi, xenni ad temmenz ɛlaḥsab řqedd i tqeddared cek.”
28 “Maca uřa d ict n řḥajjet nni ittwaḥarrmen zeg ijj n weryaz i SIDI zi marra min ɣares iǧan n iwdan d řebhayem d iyyaren, war iɛeddeř ad temmenz niɣ ad tᵉttwafdi. Marra min ittwaḥarrmen, ad yiři d amqeddas qaɛ i SIDI.
29 Marra min ittwaḥarrmen qaɛ i uteḥḥi, min ittwaḥarrmen zeg iwdan, war iɛeddeř ad ittwafdi, maca ittxeṣṣa ad ittwaneɣ nican.”
30 “Marra tiɛcuray n temmurt, zi zzariɛet n temmurt u zi řɣiǧet n tcejjura, ad iřint i SIDI, aqa atent qeddsent i SIDI.
31 Mařa ca n yijjen ixs ad ifdi ca zi řeɛcur nnes, xenni ad xas yarni ict n tesɣart di xemsa.
32 X marra tiɛcuray zeg ifunasen d tfunasin d wuǧi, zi marra min ikkin sadu uzeǧaḍ n umeksaw, ad yiři umuddar wiss ɛecra iqeddes i SIDI.
33 War iɛeddeř ad yarzu mammec tecna niɣ mammec war teḥři i teǧa, uřa war t ittbeddiř ca, maca mařa ibeddeř i-t, xenni amuddar nni d wenni zi t i ɣa ibeddeř ad iřin qeddsen. War iɛeddeř ad ittwafdi.”
34 Aqa tina d tiweṣṣa nni i zi iweṣṣa SIDI i Musa u i ayt n Israil deg wedrar n Sina.