25
Aseggʷas n ssebt d useggʷas n usřiwřew
1 Issiweř SIDI ak-d Musa x wedrar n Sina, inna:
2 “Siweř ak-d ayt n Israil uca ini asen: ‘Xmi ɣa tawḍem ɣar temmurt nni d awem ɣa wceɣ, xenni ad tareyyeḥ temmurt, ijj n wareyyeḥ n ssebt i SIDI.
3 Setta n iseggʷusa ad tzarɛed iyyar nnec uca setta n iseggʷusa ad tezbared tizayarin n umarjeɛ nnec uca ad tessmuned řɣiǧet nnes,
4 maca deg useggʷas wiss sebɛa ad tiři ict n arraḥet n ssebt i temmurt, ijj n ssebt i SIDI. War tzarrɛed ca iyyar nnec u war tzebbared ca tizayarin n umarjeɛ nnec.
5 Min dd-iɣemmyen amenni waha, war t mejjarem u aḍiř war t zebbarem zi tzayart nnec i war ittwiḥidin. Ad yiři d ijj n useggʷas n ssebt i temmurt.
6 Ṣṣabet n arraḥet n ssebt n temmurt nnec ad awem tiři d macca, i cek, i yismeɣ nnec, i tayya nnec, i ucewwař nnec uřa i umɛezzeb nnec, inni akidek izeddɣen am yibarraniyyen.
7 Ṣṣabet nnes marra ad tiři d macca i řebhayem u i řmař nni iǧan di temmurt nnec.’ ”
8 “Ad tḥessbem kenniw ɛawed sebɛa n ssimanat n iseggʷusa, sebɛa wwet i-tt di sebɛa n iseggʷusa, maḥend ad awḍen wussan n sebɛa n simanat n iseggʷusa munen ɣar tesɛa u-rebɛin n iseggʷusa.
9 Xenni deg uyur wiss sebɛa, deg wass wiss ɛecra n uyur, ad tejjed asuḍi deg uyicc n icarri ad ittekk x temmurt nwem s wesruddeḥ. Deg Wass n Weṣřaḥ ad tejjem ad ittekk usuḍi deg uyicc n icarri x marra tammurt nwem.
10 Ad tessqeddsem aseggʷas n useggʷas wiss xemsin. Ad tbarrḥem s třelli i marra imezdaɣ di marra tammurt. Ad yiři d ijj n useggʷas n usřiwřew i kenniw uca ad dd-iɛqeb kuř aryaz ɣar wagřa nnes u ɣar raǧ nnes.
11 Aseggʷas n useggʷas wiss xemsin ad awem yiři d ijj n useggʷas n usřiwřew. War tzarrɛem u war tmejjarem min dd-iɣemmyen amenni waha, u war tzebbarem ca zi tzayart war ittwiḥidin,
12 minzi aqa d aseggʷas n usřiwřew! Aqa tzemmarem ad teccem řɣiǧet n yeyyar.
13 Deg useggʷas-a n usřiwřew ad dd-iɛqeb kuř ijjen ɣar wagřa nnes.”
14 “Meřmi cek ɣa tezzenzed ca i jjar nnec niɣ mařa tesɣid ca zeg ufus n jjar nnec, war iɛeddeř uřa d ijjen ad iɣebben wenneɣni.
15 Ɛlaḥsab řqedd n iseggʷusa zeg wami iǧa useggʷas n usřiwřew ad tesɣed tammurt zi jjar nnec u ɛlaḥsab řqedd n iseggʷusa n ṣṣabet ad kik yegg tamenziwt.
16 Ma aqa dinni ɛad aṭṭas n iseggʷusa ɣar zzat, xenni ad tarnid di ttaman n tmesɣiwt nnes u mařa aqa dinni ɛad drus n iseggʷusa ɣar zzat, xenni ad tessneqṣem di ttaman n tmesɣiwt nnes, minzi netta ad ac tt izzenz ɛlaḥsab řqedd n iseggʷusa n ṣṣabet.
17 War ittɣebbi ḥed jjar nnes. Ggʷed AREBBI nnec, minzi aqa Necc d SIDI, AREBBI nwem!”
18 “Ḍfarem tiweṣṣa inu, ḥḍam lfarayiḍ inu uca ggem zzaysent, ad tzedɣem xenni di temmurt di řaman.
19 Tammurt ad tewc řɣiǧet nnes u kenniw ad zzayes teccem ař ɣa tejjiwnem uca ad din tzedɣem di řaman.
20 Uca mařa tennim: ‘Min ɣa necc deg useggʷas wiss sebɛa? Xzar, war nzemmar ad nzarreɛ u war nzemmar ad nessmuni ṣṣabet nneɣ!’,
21 xenni deg useggʷas wiss setta Necc ad awem dd-ssekkeɣ lbaraka inu ḥima tammurt ad tewc rɣiǧet i třata n iseggʷusa.
22 Deg useggʷas wiss tmenya ad tzarɛem ɛawed. Uca ad teccem zi ṣṣabet taqdimt ař aseggʷas wiss tesɛa. Ař i ɣa tiři ṣṣabet nnes n jdid, ad teccem ɛad zi ṣṣabet taqdimt.”
23 “Tammurt war tᵉttmenzi i řebda, minzi tammurt aqa-tt Inu uca kenniw xenni d ibarraniyyen d imeɛzab ɣari.
24 S uya ittxeṣṣa kenniw ad tewcem ttesriḥ maḥend ad ifdi tammurt di marra tammurt i ɣarwem iǧan d wagřa.
25 Mařa umac iẓřeḍ uca izzenz ca zeg wagřa nnes, ad dd-yas umefdi nnes, řaǧ nnes yudsen, maḥend ad ifdi min izzenz umas.
26 Mařa aryaz war ɣares bu umefdi, maca afus nnes izemmar ad yaf min icfan, maḥend ad t ifdi,
27 xenni ad iḥseb iseggʷusa zeg wami tᵉttwammenz temmurt uca ad ixeǧeṣ min iqqimen i weryaz umi tt izzenz uca ad tt-i-dd-yarr ɣar wagřa nnes.
28 Mařa afus nnes war yufi řqedd, ḥima ad as dd-yarr min tuɣa izzenz, xenni min tuɣa izzenz ad iqqim deg ufus n wenni t isɣin ař aseggʷas n usřiwřew. Maca deg useggʷas n usřiwřew ad ittwafekk man aya uca ad t-i-dd-yarr ɣar wagřa nnes.”
29 “Mařa ca n yijjen izzenz taddart nnes deg ict n tendint umi dd-nnḍen s weɣbar xenni iɛeddeř ad yiři ufekki nnes ař d iɛdu ijj n useggʷas am ikmeř zi tmenziwt nnes. Marra ussan nni iɛeddeř ad tt ifdi.
30 Maca mařa war tᵉttwafdi di řmijař n ijj n useggʷas, xenni taddart di tendint nni dd-innḍen s weɣbar, ad tiři řebda i wenni tt isɣin, i marra jjiřat nnes. War tᵉttwafekk deg useggʷas n usřiwřew.
31 Maca tudrin nni n ředcur i umi war dd-inniḍ řeɣbar ad ttwaḥesbent am yijj n yeyyar n temmurt. Danita izemmar ad yiři řḥeqq n ufekki uca ad ittwafekk yeyyar deg useggʷas n usřiwřew.
32 X tneddam n Ilawiyyen, tudrin di tneddam n wagřa nsen, aqa Ilawiyyen ɣarsen řḥeqq i řebda ḥima ad tent fdin.
33 Mařa ca n yijjen ifda i-tt zeg ufus n Ilawiyyen, xenni ad tᵉttwafekk taddart i immenzen i ijjen i war iǧin zeg Ilawiyyen, tenni iǧan di tendint n wagřa nnes, deg useggʷas n usřiwřew, minzi tudrin n tneddam n Ilawiyyen aqa atent d agřa nsen di řwesṭ n ayt n Israil.
34 Iyyar nni iqqnen ɣar tneddam, war ittmenzi, minzi aqa-t d agřa nsen i řebda.”
35 “Mařa umac iẓřeḍ uca ifassen nnes bdan ad arjijen din ɣarek, xenni ittxeṣṣa ad t-i-dd-tsennded maḥend ad ibedd, uřa d abarrani niɣ d amɛezzeb, maḥend ad iqqim ad ɣarek iddar.
36 War zzayes tkessid arriba uřa d arbeḥ, maca ad teggʷded AREBBI nnec, ḥima umac i din ɣarek ad iqqim iddar.
37 War d as ttic tmenyat n nnuqart s arriba u war d as ttic macca s warbeḥ.
38 Aqa Necc d SIDI, AREBBI nwem, wenni kenniw dd-issuffɣen zi temmurt n Miṣra, ḥima ad awem wceɣ tammurt n Kenɛan u ḥima ad iřiɣ d AREBBI i kenniw.”
39 “Mařa umac iẓřeḍ am kik iǧa uca immenz ac i cek, war t tᵉttarrid ad ixdem am yismeɣ.
40 Ad kik izdeɣ amecnaw acewwař, amecnaw ijj n umɛezzeb, uca ad ɣarek ixdem ař aseggʷas n usřiwřew.
41 Xenni ad xak iffeɣ, netta simant nnes ak-d tarwa nnes, uca ad idweř ɣar řaǧ nnes u ad idweř ɣar wagřa n řejdud nnes.
42 Minzi aqa aten d imsexarren inu inni ssuffɣeɣ Necc zi temmurt n Miṣra. War ttmenzin am mammec ittmenza ijj n ismeɣ.
43 War xas ttṣeǧeḍ s řeqsaḥet, maca ad teggʷded AREBBI nnec.
44 X ismeɣ nnec niɣ x tayya nnec, inni ɣarek ɣa yiřin, ad iřin zi řegnus i d ac dd-innḍen. Zzaysen ad tesɣed isemɣan d teyyawin.
45 Tzemmarem ad ten tesɣem zeg iḥenjiren n imeɛzab nni izeddɣen jar awem am yibarraniyyen u zi řaǧat nsen, inni akidwem iǧan, inni ten dd-ijjin di temmurt nwem. Nitni ad dewřen d agřa nwem.
46 Uca ad ten tejjed d řwart i iḥenjiren nwem awarni awem. Tzemmarem ad ten tarrem ad awem sexxaren řebda, maca x aytmatwem, ayt n Israil, war ttṣellṭem kuř ijj x wenneɣni s řeqsaḥet.”
47 “Mařa yiweḍ ufus n ijj n ubarrani niɣ n ijj n umɛezzeb i izeddɣen jar awem, uca umac i ɣares izeddɣen idweř iẓřeḍ uca ad izzenz ixef nnes i ubarrani nni izeddɣen ɣarek niɣ i yijjen zi jjadira n řaǧ n ubarrani nni,
48 xenni iɛeddeř, awarni ma izzenz ixef nnes, ad ittwafdi. Ijjen zeg aytmas ad t ifdi.
49 Iɛeddeř i ɛemmis niɣ i mmis n ɛemmis ad t ifdi niɣ ijjen zi raǧ nnes i-t-i-dd-yudsen, zi řwacun nnes, ad t ifdi, niɣ mařa ɣares s min zi, xenni iɛeddeř ad ifdi ixef nnes.
50 Ad igg řeḥsab ak-d wenni t isɣin zeg useggʷas min di izzenz ixef nnes ař aseggʷas n usřiwřew u ttaman n tmenziwt s nnuqart ad yiři ɛlaḥsab řqedd n iseggʷusa, inni i ɣa ittwaḥesben am wussan n ijj n ucewwař ixeddmen akides.
51 Mařa aqa din ɛad aṭṭas n iseggʷusa ɣar zzat, ad ixeǧeṣ maḥend ad ittwafdi anect n tesɣart n ttaman s tmenyat n nnuqart i zi ittwaseɣ.
52 Mařa ɛad drus i iqqimen n iseggʷusa ař aseggʷas n usřiwřew, xenni ad igg i yixef nnes ijj n řeḥsab uca ad ixeǧeṣ ttaman n ufekki nnes ɛlaḥsab iseggʷusa i din iqqimen.
53 Am yijj n ucewwař ad ɣares iqqim zeg useggʷas ař aseggʷas. War iɛeddeř ad xas ṣellṭen s řeqsaḥet zzat i tiṭṭawin nnec.
54 Mařa war ittwafdi s marra aya, xenni ad ifekk deg useggʷas n usřiwřew, netta d tarwa nnes akides.
55 Minzi ayt n Israil aqa aten d imsexxaren inu, inni ssuffɣeɣ zi temmurt n Miṣra. Aqa Necc d SIDI, AREBBI nwem.”