24
Izerfen i řqendiř d weɣrum n wesscan
1 Issiweř SIDI ak-d Musa, inna:
2 “Umur ayt n Israil maḥend ad ac dd-awyen i tfawt zzect iṣfan ttwaddzen tt-i-dd zi zzitun, ḥima ad tejjem tafawt tareqq řebda.
3 Harun ad tt isettef řebda zzat i wudem n SIDI zi ǧiřet ař ṣṣbeḥ zzat n uřeḥḥaf n Cchadet deg Uqiḍun n Umsagar. Aqa-tt d ict n tewṣeyyet i řebda i marra jjiřat nwem.
4 Ittxeṣṣa as ad isettef řebda tiftiřin n tfawin i iǧan x řqendiř izdigen zzat i wudem n SIDI.
5 Ad teksid waren azdad uca ad zzayes tᵉssenggʷed tenɛac n řemsemnat. Ict n temsemmemt ad tiři zi tnayen n teɛcurin n yijj n ifa n waren azdad.
6 Ad tent tegged di tnayen n isettifen, setta deg ijj n usettif x tzewḍa izdigen zzat i wudem n SIDI.
7 Ad tegged x kuř asettif jjawi iṣfan nni ɣa yiři i řidaret ak-d weɣrum. Aqa-tt d ict n tewhibt n tmessi i SIDI.
8 Di kuř ass n ssebt ad isettef aya řebda zzat i wudem n SIDI di ṭṭweɛ n ayt n Israil. Aqa-t d ijj n Řɛahd i řebda.
9 Ad yiři weɣrum i Harun d warraw nnes, inni t ɣa iccen deg wemcan amqeddas, minzi i netta i iǧa uya d amqeddas qaɛ zi tewhibin n tmessi n SIDI. Aqa-tt d ict n tewṣeyyet i řebda.”
Řɛiqab i wenni iceqqfen di SIDI u i wenni iggin tuɛeffna
10 Mmis n ict n temɣart Tisra’ilect teffeɣ ɣar barra. Netta tuɣa-t d mmis n ijj n weryaz d Amiṣri izeddɣen jar ayt n Israil. Mmis n temɣart-a Tisra’ilect u ijj n weryaz Israyili mmenɣen ak-d wayawya di řmargeḥ n řɛeskar.
11 Mmis n temɣart Tisra’ilect iceqqef deg Yisem uca ikkʷar. Xenni iwyen t ɣar Musa. Yemmas, qqaren as Cilumiya, yeǧis n Dibri, zi teqbič n Dan.
12 Ggin ad xas ḥḍan ařami d asen i ɣa immeř min i ɣa ggen zeg uqemmum n SIDI.
13 Uca issiweř SIDI ak-d Musa, inna:
14 “Suffeɣ wenni ineɛřen barra i řmargeḥ n řɛeskar uca ejj marra inni d as isřin ad ssarsen ifassen nsen x uzeǧif nnes. Xenni ad t tarjem tmesmunt am tekmeř.
15 Ad tessiwřed ak-d marra ayt n Israil uca ad asen tinid: ‘Kuř aryaz i ɣa ineɛřen AREBBI, ad yarbu ddenb nnes.
16 Wenni ittceqqafen deg Yisem n SIDI, ad ittwaneɣ nican!’ Marra tamesmunt ad t tarjem. Ad ittwaneɣ ubarrani uřa d wenni dd-ittwaxeřqen di temmurt mařa ittceqqef deg Yisem.”
17 “Mařa ijj n weryaz inɣa řeɛmar n ca n bnadem nneɣni, xenni ad ittwaneɣ nican.
18 Maca wenni inɣin řeɛmar n ict n řebhimet, ad yarr řeɛmar s řeɛmar.
19 Mařa ijj n weryaz issyizem jjar nnes, xenni ad zzayes ggen am mammec igga netta:
20 tareẓẓit s tareẓẓit, tiṭṭ s tiṭṭ, tiɣmest s teɣmest. Anect issyizzem netta ijj n bnadem, ammu i d as ɣa ggen ɛawed.
21 Wenni inɣin ict n řebhimet, ad tt yarr, u wenni inɣin ijj n bnadem, ad ittwaneɣ simant nnes.
22 Ad ɣarwem yiři d ijj n uzerf i ubarrani am i wenni dd-ixeřqen di temmurt, minzi Necc d SIDI, AREBBI nwem!”
23 Xenni inna Musa i ayt n Israil ad ssuffɣen wenni tuɣa ineɛɛřen barra i řmargeḥ n řɛeskar, ḥima ad t arejmen. Uca ayt n Israil ggin am mammec d as yumur SIDI i Musa.