2
Tiɣarṣa n řɣiǧet
1 “Mařa iqeddem ḥed tawhibt n řɣiǧet ɣar SIDI, ad tiři tewhibt nnes n waren azdad uca ad xas iseyyeb zzect uca ad xas issars jjawi.
2 Ad tt yawi ɣar warraw n Harun, ikehhanen, uca ad zzayes iksi ukehhan ijj n wuru iccur zeg waren azdad nni u zi zzect nni ak-d marra jjawi, uca akehhan ad issbexxar aya x uɛalṭar i řidaret i tewhibt nni, aqa d ict n tewhibt n tmessi d ict n řefwaḥet ittfuḥen i SIDI.
3 Min iqqimen n tewhibt n řɣiǧet ad yiři i Harun u i warraw nnes. Aqa d amqeddas qaɛ zi marra tiwhibin n tmessi n SIDI.
4 Mařa tqeddmed tawhibt i iǧan d tawhibt n řɣiǧet darḥen tt di tefqunt, xenni ad tiři d řemsemnat břa antun, ixeǧḍen s zzect, uřa d tiřfaf břa antun ttwadehnent s zzect, marra zeg waren azdad.
5 Mařa tawhibt nnec d tawhibt n řɣiǧet ggʷin tt x wexdim, ad tiři n waren azdad ixeǧḍen s zzect, wardayes bu wentun.
6 Ad ten tarẓed d ifetwiten uca ad xas tseyybed zzect. Aqa-tt d ict n tewhibt n řɣiǧet.
7 Mařa tawhibt nnec d tawhibt n řɣiǧet ggʷin tt di ṭṭajjin, ad tiři tewjed s waren azdad ak-d zzect.
8 Tawhibt n řɣiǧet i zzaysen iwejden, ad tt tawyed ɣar SIDI. Bnadem ad zzayes dd-iqarreb ɣar ukehhan uca wanita ad tt yawi ɣar uɛalṭar.
9 Ad iksi ukehhan zi tewhibt n řɣiǧet ict n řidaret uca ad tt issbexxar x uɛalṭar, aqa d tawhibt n tmessi, d řefwaḥet ittfuḥen i SIDI.
10 Min iqqimen n tewhibt n řɣiǧet ad yiři i Harun u i warraw nnes. Aqa-t d amqeddas qaɛ zi tewhibin n tmessi n SIDI.
11 War iɛeddeř i uřa d ict n tewhibt n řɣiǧet i ɣa tqeddmem i SIDI ad tiři tewjed s wentun. Maɣar zi min ma n wentun d zi min ma tamment war zzayes tessbexxaram ca uřa d ict n tewhibt n tmessi i SIDI.
12 Ad tiwyem tawhibt n usuffeɣ amezwaru n ṣṣabet ɣar SIDI, maca nitni war zemmaren ad ssbexxaren tawhibt-a x uɛalṭar am řefwaḥet ittfuḥen i SIDI.
13 Kuř tawhibt n tewhibt n řɣiǧet nnec ad tiři tmeǧḥed s tmeǧaḥṭ. Tameǧaḥt n Řɛahd n AREBBI nnec war tzemmar ad tenqeṣ ɣar tewhibt n řɣiǧet nnec. Ad tqeddmed tameǧaḥt ɣar kuř tawhibt nnec.
14 Mařa tiwyed ict n tewhibt n řɣiǧet n tmenzut, ad tiwyed tidrin yiwḍen, tinni ittwafaren x tmessi, ak-d řḥebb aziza ibaryen am tewhibt n řɣiǧet zi tmenzut nnec.
15 Ad xas tseyybed zzect u ad xas tessarsed jjawi, aqa d tawhibt n řɣiǧet.
16 Xenni ad issbexxar ukehhan ijj n wezyen zi řḥebb ibaryen u zi zzect nnes ak-d marra jjawi nnes i xas iǧan am tewhibt n řidaret di man aya. Aqa d tawhibt n tmessi i SIDI.”