3
Tiɣarṣa n řeḥna
1 “Mařa tawhibt nnes d taɣarṣt n řehna, ittxeṣṣa, mařa xenni issqarreb-dd amuddar, ad yiři d awtem niɣ d tawtemt n ifunasen d tfunasin, ad dd-issqarreb ijj n umuddar icnan qaɛ zzat i wudem n SIDI.
2 Ad issars afus nnes x uzeǧif n tewhibt nnes uca ad as iɣarṣ qibač i wadaf n Uqiḍun n Umsagar uca arraw n Harun, ikehhanen, ad zeǧɛen idammen nnes x uɛalṭar ɣar marra iɣezdisen nnes.
3 Zi tewhibt n řehna ad iqeddem ict tewhibt n tmessi i SIDI, ixs ad yini tadunt i idřin adan d marra tadunt i iǧan x wadan.
4 Ad ikkes tnayen n tiẓẓař ak-d tadunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař.
5 Arraw n Harun ad ssbexxaren aya x uɛalṭar x tɣarṣt n wecmaḍ i iǧan x ukeccuḍ i din iǧan x tmessi. Aqa-t d tawhibt n tmessi, d ict n řefwaḥet ittfuḥen i SIDI.
6 Mařa tawhibt nnes d taɣarṣt n řehna i SIDI, awtem niɣ d tawtemt n wuǧi, xenni ad dd-issqarreb ijj n umudar icnan qaɛ.
7 Mařa d uḥuři i dd-issqarreb d taɣarṣt, xenni ad t-i-dd issqarreb zzat i wudem n SIDI.
8 Netta ad issars afus nnes x uzeǧif n tewhibt nnes uca ad as iɣarṣ zzat i Uqiḍun n Umsagar, uca arraw n Harun ad zeǧɛen idammen nnes x uɛalṭar ɣar marra iɣezdisen nnes.
9 Ad iqeddem tadunt n tɣarṣt n řehna am yict n tewhibt n tmessi i SIDI: marra tanewwart n tadunt nni yudsen abeɛṣuṣ ad tt ikkes, uřa d tadunt i idřin adan d marra tadunt i iǧan x wadan
10 uca ad ikkes uřa d tnayen n tiẓẓař ak-d tadunt i xasent iǧan ɣar tejɛinna d min yuyřen ɣar tsa u yarsa x tiẓẓař.
11 Akehhan ad issbexxar aya x uɛalṭar. Aqa d macca, ict n tewhibt n tmessi i SIDI.
12 Mařa tawhibt nnes d iɣayḍ, xenni ad t-i-dd-issqarreb zzat i wudem n SIDI.
13 Ad issars afus nnes x uzeǧif nnes uca ad as iɣarṣ zzat i Uqiḍun n Umsagar, uca arraw n Harun ad zeǧɛen cwayt n idammen nnes x uɛalṭar ɣar marra iɣezdisen nnes.
14 Ad zzayes iqeddem tawhibt nnes, ixs ad yini tadunt i idřin adan, u marra tadunt i iǧan x wadan, am tewhibt n tmessi i SIDI
15 uca ad ikkes uřa d tnayen n tiẓẓař ak-d tadunt i xasent iǧan ɣar tejɛinna uřa d min yuyřen ɣar tsa u yarsa x tiẓẓař.
16 Akehhan ad issbexxar aya x uɛalṭar, aqa d macca n tewhibt n tmessi s ict n řefwaḥet ittfuḥen. Marra tadunt ad tiři i SIDI.
17 Ta d tawṣeyyet i řebda i marra jjiřat nwem, mani ma i ɣa tzedɣem: marra tadunt d marra idammen war ten ttᵉttem.”