Ilawiyyen
1
Tiɣarṣa n wecmaḍ
1 Iřaɣa i Musa uca issiweř SIDI akides zeg Uqiḍun n Umsagar, inna:
2 “Siweř ak-d ayt n Israil uca ini asen:
‘Mařa issqarreb ijj n bnadem zzaywem tawhibt i SIDI, xenni ad dd-tessqarrbem tawhibt nwem zi řebhayem, zeg ifunasen d tfunasin niɣ zeg wuǧi.
3 Mařa tawhibt nnes d taɣarṣt n wecmaḍ zeg ifunasen d tfunasin, xenni ad dd-issqarreb ijj n uwtem icnan qaɛ. Ad t yiwi ɣar wadaf n Uqiḍun n Umsagar, maḥend ad yaf arḍa zzat i wudem n SIDI.
4 Ad yegg afus nnes x uzeǧif n tɣarṣt n wecmaḍ uca ammu i ɣa tᵉttwaqbeř tɣarṣt s arḍa di ṭṭweɛ nnes, maḥend ad yiři i weṣřaḥ nnes.
5 Ad iɣarṣ i umeẓyan n ufunas zzat i wudem n SIDI uca arraw n Harun, ikehhanen, ad dd-iwyen idammen, ad zeǧɛen idammen ɣar marra iɣezdisen x uɛalṭar nni iǧan ɣar wadaf n Uqiḍun n Umsagar.
6 Ad ikkes tiřmect n tɣarṣt n wecmaḍ uca ad ibḍa afunas d iceǧiqen.
7 Arraw n akehhan Harun ad ssarɣen timessi x uɛalṭar uca ad settfen akeccuḍ x tmessi.
8 Arraw n Harun, ikehhanen, ad settfen iceǧiqen d uzeǧif d tadunt x ukeccuḍ nni iǧan x tmessi i iǧan x uɛalṭar.
9 Netta ad issird adan nnes d iḍaren nnes s waman. Akehhan ad issbexxar man aya marra x uɛalṭar, aqa d taɣarṣt n wecmaḍ, d tawhibt n tmessi, d ict n řefwaḥet ittfuḥen i SIDI.
10 Mařa tawhibt nnes d taɣarṣt n wecmaḍ zeg wuǧi, zeg iḥuřiyyen niɣ zeg iɣayḍen, xenni ittxeṣṣa ad dd-issqarreb awtem icnan qaɛ.
11 Ad as iɣarṣ zzat i wudem n SIDI ɣar uɣezdis n ccamal n uɛalṭar uca arraw n Harun, ikehhanen, ad zeǧɛen idammen nnes x uɛalṭar ɣar marra iɣezdisen nnes.
12 Ad t ibḍa d iceǧiqen, ak-d azeǧif nnes d tadunt nnes, uca akehhan ad ten isettef x ukeccuḍ nni iǧan x tmessi i iǧan x uɛalṭar.
13 Ad issird adan nnes d icekraden nnes s waman. Akehhan ad yawi man aya marra u ad t issbexxar x uɛalṭar. Aqa d ict n tɣarṣt n wecmaḍ, ict n tewhibt n tmessi, ict n řefwaḥet ittfuḥen i SIDI.
14 Mařa tawhibt nnes d taɣarṣt n wecmaḍ zeg ijḍaḍ i SIDI, xenni ad yawi tawhibt nnes zi tejlilliḥin niɣ zeg idbiren imeẓyanen.
15 Akehhan ad t yawi ɣar uɛalṭar, ad as ikkes azeǧif uca ad t issbexxar x uɛalṭar. Ad iẓemm idammen nnes x uɣezdis n uɛalṭar
16 uca ad as ikkes aseyru ak-d min dayes iqqimen u ad inḍar aya zzat i uɛalṭar ɣar uɣezdis n ccarq x wemcan n iɣɣeḍ n min iqqimen n tadunt
17 Ad t icarreg ɣar wefriwen, maca war t ibeṭṭi ca qaɛ, uca akehhan ad t issbexxar x uɛalṭar, x ukeccuḍ nni iǧan x tmessi. Aqa d ict n tɣarṣt n wecmaḍ, d ict n tewhibt n tmessi, d ict n řefwaḥet ittfuḥen i SIDI.’ ”