3
Aḍhar amezwaru n SIDI i Suliman d tutra nnes
1 Suliman idweř d aḍeggʷař n firɛun, ajeǧid n Miṣra. Netta yiwi yeǧis n firɛun uca issidif i-tt ɣar tendint n Dawud, ařami tuɣa isseqfeř řebni n taddart nnes d Taddart n SIDI d řḥiḍ i d as dd-innḍen i Urcalim.
2 Mɣir řgens yarni ittqeddam tiɣarṣa x řegɛudi waha, minzi ař ussan nni war tᵉttwabenni ɛad Taddart i Yisem n SIDI.
3 Suliman tuɣa ittexs SIDI umi yuyur ɛlaḥsab tiweṣṣa n babas Dawud. Iqeddem mɣir tiɣarṣa d řebxur x řegɛudi waha.
4 Ammu i yuyur ujeǧid ict n twařa ɣar Jibɛun, ḥima ad dinni iɣarṣ, maɣar řgeɛɛdet nni tuɣa-tt d tameqqrant qaɛ. Issgeɛɛed Suliman x uɛalṭar nni ařef tiɣarṣa n wecmaḍ.
5 Iban-dd SIDI di Jibɛun s ǧiřet i Suliman deg ict n terjit, uca inna AREBBI: “Ttar! Min i d ac ɣa wceɣ?”
6 Inna Suliman:
“Cek tessecned tamexsiwt icewwaren tameqqrant i umsexxar nnec, baba Dawud, am mammec yuyur netta zzat i wudem nnec s řaman d tsegda d řeṣfayet n wuř ɣarek, u Cek txemmřed as tamexsiwt-a icewwaren tameqqrant u tewcid as ijj n mmis, ḥima ad iqqim x řɛarc nnes, am teǧa ass-a.
7 Xenni řexxu, a SIDI, AREBBI inu, Cek teggid amsexxar nnec d ajeǧid deg wemcan n baba Dawud. Maca necc ǧiɣ ɛad d aḥenjir ameẓyan. Necc war ssineɣ mammec ɣa ffɣeɣ u mammec ɣa ɛeqbeɣ.
8 Amsexxar nnec aqa-t di řwesṭ n řgens nnec nni tixḍared Cek, ijj n řgens imɣar ařami war izemmar ad ittwaqedd niɣ ad ittwaḥesseb zeg ubarru nnes ameqqran.
9 Ewc xenni i umsexxar nnec ijj n wuř iften ḥima ad taf izemmar ad iḥkem di řgens u ḥima ad ifarz s řeɛqeř jar min iǧan icna d min iǧan d aɛeffan, minzi man wen izemmaren ad iḥkem x řgens-a ameqqran nnec?”
10 Awař-a tuɣa d lemliḥ di tiṭṭawin n Sidi, řami zeɛma Suliman ittar man aya.
11 Inna as AREBBI:
“Minzi cek tᵉttared aya u war tᵉttared ca tudart tazirart i yixef nnec, u war tᵉttared agřa i yixef nnec u war tᵉttared ca tudart n řɛedyan nnec, maca tᵉttared i yixef nnec řeɛqeř, ḥima ad tesřed mliḥ ddeɛwat di řmeḥkama,
12 aqa s uya Necc ggiɣ ɛlaḥṣab awařen nnec. Xzar, Necc wciɣ ac ijj n wuř d amiɣis d afehham, am mammec war tuɣi qbeř i cek u war ittiři awarni ac.
13 Uřa d min war tᵉttared, ad ac t wceɣ, am wagřa am uɛuǧi, ařami marra ussan n tudart nnec war din ittiři weryaz am cek jar ijeǧiden.
14 Mařa cek tuyured x tebridin inu ařami ɣa teḥḍid tiweṣṣa inu d řumurat inu, am mammec yuyur babac Dawud, xenni Necc ad sszuggareɣ řqedd n wussan n tudart nnec.”
15 Ifaq-dd Suliman, u xzar, tuɣa-tt d ict n terjit. Netta yusa-dd ɣar Urcalim uca ibedd zzat i Ttabut n Řɛahd n Sidi u issgeɛɛed tiɣarṣa n wecmaḍ u igga tiwhibin n řehna u issewjed ɛawed ict n zzardet i marra imsexxaren nnes.
Řeḥkam amiɣis n Suliman
16 Xenni usint-i-dd tnayen n temɣarin ɣar ujeǧid. Tuɣa-tent d timɣarin n farq-ccɣeř, beddent zzat i wudem nnes.
17 Ict n temɣart tenna: “Mařa texsed, a sidi inu, necc zeddɣeɣ ak-d temɣart-a di taddart d ict, u necc urweɣ umi d ayi tuɣa ɣares di taddart.
18 Deg wass wiss třata awarni řami dd-urweɣ, imsar, aqa uřa d tamɣart-a turuw-dd ijj n uḥenjir. Neccin tuɣa nmun, war tuɣi ɣarneɣ uřa d ijj n ubarrani di taddart, mɣir neccin s tnayen di taddart.
19 Aḥenjir n temɣart-a immut di ǧiřet umi tezzeř xas deg iḍeṣ.
20 Nettat tekkar ɣar wezyen n ǧiřet, tekkes ayi aḥenjir inu, umi tayya nnec tᵉṭṭeṣ, u tessars i-t deg weḥsin nnes uca mmis immuten tessars i-t deg weḥsin inu.
21 Umi kkareɣ ɣar tuffut, ḥima ad ssuṭṭuḍeɣ aḥenjir inu, xzar, netta immut. Di ṣṣbeḥ tuɣa ayi xezzareɣ mliḥ, ẓriɣ tuɣa-t war iǧi ca d aḥenjir inu nni dd-urweɣ.”
22 Xas uca tenna temɣart nneɣnit: “Lla, wenni iddaren d aḥenjir inu u wenni immuten d aḥenjir nnem!” Tenneɣnit tenna: “Lla, wenni immuten d aḥenjir nnem u wenni iddaren d aḥenjir inu!” Ammu i ssiwřent zzat i wudem n ujeǧid.
23 Inna ujeǧid: “Tanita teqqar: ‘Wenni iddaren d aḥenjir inu u wenni immuten d aḥenjir nnem!’, uca wenneɣni teqqar: ‘Lla, wenni immuten d aḥenjir nnem u wenni iddaren d aḥenjir inu.’ ”
24 Xenni inna ujeǧid: “Awyem ayi-dd ijj n ssif!” Nitni iwyen ijj n ssif ɣar ujeǧid.
25 Ajeǧid inna: “Qessem aḥenjir iddaren x tnayen uca wcem ijj n wezyen i yicten zzaysent u wcem i tᵉnneɣnit ijj n wezyen nneɣni.”
26 Maca řami tuɣa tacit nnes i uḥenjir nnes imɣar, tessiweř temɣart tenni ɣar iǧa uḥenjir iddar, ak-d ujeǧid, tenna: “A, sidi inu, wcet as aḥenjir nni iddaren mařa texsed, war t neqqet!” Tanita maca tenna: “War ittiři inu uřa nnem. Qesset t di řwesṭ!”
27 Xenni yarra-dd ujeǧid, inna: “Wcem as aḥenjir iddaren! War t neqqem. Nettat d yemmas.”
28 Marra Israil isřa x řeḥkam i zi iḥkem ujeǧid u nitni ggʷeden zzat i wudem n ujeǧid, minzi nitni ẓrin belli tiɣit n AREBBI dayes ḥima ad yaɣ tasɣart.