2
Awařen ineggura n Dawud i Suliman
1 Umi dd-udsen wussan n Dawud ad immet, iɛřem netta i mmis Suliman, inna:
2 “Necc ad uyureɣ abrid n marra tammurt. Iři tmeḥḍed u iři d aryaz!
3 Ḥḍa awekkeř n SIDI, AREBBI nnec, ḥima ad tuyured di tebridin nnes, maḥend ad tᵉṭṭfed di tweṣṣa nnes d řumurat nnes d lfarayiḍ nnes d cchadat nnes am mammec t yura di Ccariɛa n Musa, ḥima ad tegged s řeɛqeř di marra min ɣa tegged d mani ma i ɣa traḥed,
4 ḥima ad ikemmeř SIDI awař nnes i xafi issiweř, umi inna: ‘Mařa iḥenjiren nnec ad ḥḍan abrid nsen s wuř nsen marra u s řeɛmar nsen marra, ḥima ad uyuren s řaman zzat i wudem inu, xenni war cek ittxeṣṣi weryaz x řɛarc n Israil.
5 Cek tessned ɛawed min i d ayi igga Yuwab, mmis n Ṣaruya, min igga netta i tnayen n ikumandaren n řɛeskarat n Israil, i Abnir, mmis n Nir, u i Ɛamasa, mmis n Yatir. Netta inɣa i-ten. Di řweqt n řehna issizzeř idammen am di řweqt n umenɣi uca am di řweqt n umenɣi igga idammen ɣar webyas nnes i ɣares ɣar tejɛinna nnes uřa ɣar sandaliyat nnes nni x iḍaren nnes.
6 Egg ɛlaḥsab tiɣit nnec u war ttejji acuwwaf nnes icaben ad ihwa ɣar řaxart di řehna.
7 Scen tamexsiwt icewwaren i ayt n Barzillay zi Jilɛad. Nitni ad iřin jar inni i ɣa iccen zi ṭṭabřa nnec, maɣar ammu i dd-yusin ɣari umi arewřeɣ zzat i wudem n umac Abcalum.
8 Xzar Cimɛi, mmis n Jira, zeg ayt nn Binyamin, zi Baxurim. uřa d netta akidek. Netta inɛeř ayi s ict n nneɛřet iqesḥen deg wass umi necc arewřeɣ ɣar Maḥanayim, maca immseřqa akidi ɣar L’Urdun u necc jjuǧeɣ as ɣar SIDI, nniɣ: ‘Ɣari mařa ad cek nɣeɣ s ssif!’
9 Xenni řexxu, war t ḥeṣṣeb d amezdag, maɣar cek d ijj n weryaz d amiɣis u tessned min d as ɣa tegged, ḥima acuwwaf nnes icaben ad ihwa ɣar řaxart s idammen.”
10 Dawud igga ad yareyyeḥ jar řejdud nnes. Netta ittwanḍeř di tendint n Dawud.
11 Ussan i di tuɣa iḥekkem Dawud x Israil, tuɣa aten arebɛin n iseggʷusa. Sebɛa n iseggʷusa iḥkem di Ḥabrun u di Urcalim iḥkem třata u-třatin n iseggʷusa.
Timegga timezwura n ujeǧid Suliman
12 Suliman iqqim x řɛarc n babas Dawud u tagelda nnes tedweř tarenni di řemten aṭṭas.
13 Xenni Aduniya, mmis n Hajjit, yusa-dd ɣar Bat-Cabaɛ, yemmas n Suliman. Nettat tenna: “Ma tawasit nnec s řehna?” Netta inna: “Řehna!”
14 Netta inna: “Necc ɣari kim ijj n wawař.” Nettat tenna as: “Siweř!”
15 Inna netta: “Cem tessned, aqa tageldit tusa ayi-dd u marra Israil igga dayi tiṭṭawin, ḥima ad dewřeɣ d ajeǧid. Maca tagelda tenneqřeb uca tedweř i uma, minzi tusa as-dd zi SIDI.
16 Řexxu maca xseɣ ad ɣarem ttareɣ ict n řḥajjet waha. War d ayi tagi!” Nettat tenna: as: “Siweř!”
17 Netta inna: “Siweř ak-d ujeǧid Suliman - maɣar netta war cem ittarri - ḥima netta ad ayi iwc Abicaj, Tasunamit, d tamɣart.”
18 Bat-Cabaɛ tenna: “Mliḥ, necc ad ssiwřeɣ ak-d ujeǧid di ṭṭweɛ nnec.”
19 Xenni tusa-dd Bat-Cabaɛ ɣar ujeǧid Suliman, ḥima akides tessiweř x Aduniya. Ajeǧid ikkar i umsagar akides, yuḍar zzates. Awarni man aya iqqim x řɛarc, ijja ad din ssarsen ijj n řkursi i yemmas n ujeǧid u nettat teqqim ɣar ufus afusi nnes.
20 Xenni tenna as nettat: “Necc xseɣ ad ac ttareɣ ict n řḥajjet waha. War d ayi tagi!” Inna as ujeǧid: “Seqsa, yemma, necc war cem ttarriɣ ca.”
21 Nettat tenna as: “Ttzawgeɣ cek ḥima ad temmewc Abicaj, Tasunamit, i umac Aduniya d tamɣart.”
22 Ajeǧid Suliman yarra-dd xas, inna i yemmas: “Mayemmi tᵉttared cem i Aduniya Abicaj, Tasunamit? Ttar xenni uřa d tagelda, maɣar netta d uma wenni d ameqqran xafi, wah ttar i-tt i netta u i ukehhan Abyatar d Yuwab, mmis n Ṣaruya.”
23 Ajeǧid Suliman ijjuǧ ɣar SIDI, inna: “Ad ayi igg AREBBI ta d ta u ɛad ktar zi man aya, maɣar Aduniya issiweř awař-a ḍidd i tudart nnes!
24 Xenni řexxu, s tidett am iddar SIDI, wenni d ayi issemtnen u wenni d ayi issɣiman x řɛarc n tgeldit n baba Dawud u wenni d ayi iggin ict n taddart am mammec tuɣa inna qbeř i baba Dawud, s tidett, Aduniya ad ittwaneɣ ass-a!”
25 Xas uca issekk ujeǧid Suliman řumur-a s ufus n Banaya, mmis n Yahuyadaɛ. Wanita iwta i-t uca immut Aduniya.
26 Inna ujeǧid i ukehhan Abyatar: “Uyur ɣar Ɛanatut, ɣar temmurt nnec, maɣar cek d ijj n weryaz isdaḥeǧ řmewt. Ass-a maca war cek neqqeɣ ca, minzi cek tarbud Ttabut n Sidi inu, SIDI, zzat i wudem n baba Dawud, u minzi cek tweddbed uřa s marra i zi iweddeb baba.”
27 Suliman yuẓẓeř x Abyatar ařami netta war tuɣi ɛad d akehhan i SIDI, ḥima ad ittwakemmeř wawař n SIDI i tuɣa issiweř zi jjihet n taddart n Ɛali di Cilu.
28 Umi yiweḍ řexbar ɣar Yuwab - aqa Yuwab iffeɣ, iḍfar Aduniya, waxxa netta war dd-iffiɣ ca, ḥima ad iḍfar Abcalum - yarweř Yuwab ɣar Uqiḍun n SIDI uca iṭṭef accawen n uɛalṭar.
29 Xebbaren ajeǧid Suliman aqa Yuwab yarweř ɣar Uqiḍun n SIDI. U xzar, ibedd din ɣar uɛalṭar. Suliman issekk ɣares Banaya, mmis n Yahuyadaɛ, inna: “Ruḥ din, neɣ i-t!”
30 Banaya yusa-dd ɣar Uqiḍun n SIDI uca inna as: “Ammu i iqqar ujeǧid: ‘Ffeɣ-dd ɣar barra!’ ” Netta inna: “Lla, necc xseɣ ad mmteɣ da!” Banaya issiweḍ tamwarrit ɣar ujeǧid, inna: “Ammu i issiweř Yuwab u ammu xafi dd-yarra.”
31 Inna as ujeǧid: “Egg min i d ac inna netta, ɣeḍř i-t uca neḍř i-t, ḥima ad taggʷejed xafi u x taddart n baba idammen i issizzeř Yuwab baṭeř.
32 Ammu i ɣa yarr SIDI idammen i issizzeř netta x uzeǧif nnes, minzi netta issḥeyyed tnayen n yeryazen, inni iseggden u iḥřan xas, uca inɣa i-ten s ssif umi baba Dawud war t issin: Abnir, mmis n Nir, akumandar n řɛeskar n Israil, u Ɛamasa, mmis n Yatir, akumandar n řɛeskar n Yahuda.
33 Ammu i ɣa ɛeqben idammen nsen x uzeǧif n Yuwab u x uzeǧif n tarwa nnes i řebda. Maca Dawud d tarwa nnes d taddart nnes d řɛarc nnes, ad ɣarsen yiři řehna zi SIDI i řebda.”
34 Banaya, mmis n Yahuyadaɛ, igeɛɛed ɣar uɛalṭar, iwta i-t uca inɣa i-t. Netta ittwanḍeř di taddart nnes di řexřa.
35 Ajeǧid igga xenni Banaya, mmis n Yahuyadaɛ, deg wemcan nnes x řɛeskar uca ajeǧid igga Ṣaduq, akehhan, deg wemcan n Abyatar.
36 Xenni ijja ujeǧid ad řaɣan i Cimɛi, inna as: “Bna i yixef nnec ict n taddart di Urcalim uca zdeɣ din, war tteffeɣ ɣar da uřa ɣar diha!
37 Ad imsar deg wass i di i ɣa teffɣed, ad teẓwid tiɣzart n Qidrun, aqa ad tessned nican ad temmted nhřa mma. Idammen nnec ad iřin x uzeǧif nnec.”
38 Cimɛi yarra-dd x ujeǧid: “Awař-a d lemliḥ. Am mammec issiweř sidi inu ajeǧid, ammu i ɣa igg uřa d umsexxar nnec.” U Cimɛi tuɣa izeddeɣ aṭṭas n wussan di Urcalim.
39 Maca awarni i třata n iseggʷusa, imsar, aqa tnayen n imsexxaren n Cimɛi arewřen ɣar Axic, mmis n Maɛka, ajeǧid n Jat. Xebbaren aya i Cimɛi, nnan: “Xzar, imsexxaren nnec aqa aten di Jat.”
40 Xenni ikkar Cimɛi, ibardeɛ i weɣyuř nnes uca yuyur ɣar Axic ɣar Jat, ḥima ad yarzu x imsexxaren nnes. Cimɛi yuyur din u yarra i-ten-dd zi Jat.
41 Xebbaren aya i Suliman aqa Cimɛi iffeɣ zi Urcalim ɣar Jat uca iɛqeb-dd ɛawed.
42 Ajeǧid issekk ad řaɣan i Cimɛi uca inna as: “Ma war cek jjiɣ ad tejjaǧed ɣar SIDI u ɛeřmeɣ ac, nniɣ: ‘Deg wass i di i ɣa teffɣed ɣar da niɣ ɣar diha ad tessned nican, ad temmted nḥřa mma’? U cek tennid ayi: ‘Awař-a i sřiɣ, aqa-t mliḥ.’
43 Mayemmi xenni war teḥḍid ca tajaǧit n SIDI d řumur i d ac ggiɣ?”
44 Inna ujeǧid ɛawed i Cimɛi: “Cek tessned deg wuř nnec marra tuɛeffna i teggid i baba Dawud. S uyenni SIDI ad dd-yarr tuɛeffna nnec x uzeǧif nnec.
45 Maca ad ittwabarek ujeǧid Suliman u řɛarc n Dawud ad ittwassemten i řebda zzat i wudem n SIDI.”
46 Xas uca iḍebbar ujeǧid x Banaya, mmis n Yahuyadaɛ, u wanita yuyur ɣar barra, iwta Cimɛi ařami immut wanita. Ammu i tᵉttwacedd tgeldit deg ufus n Suliman.