4
Řḥukkam imeqqranen n Suliman d řwulat nnes
1 Tuɣa ajeǧid Suliman d ajeǧid x marra Israil.
2 Ina tuɣa d řḥukkam nnes imeqqranen:
Ɛazarya, mmis n Ṣaduq, tuɣa-t d akehhan d amezwaru.
3 Iliḥuraf d Axiya, iḥenjiren n Cica, tuɣa aten d imariren.
Yaḥucafaṭ, mmis n Axilud, tuɣa-t d amarir amezwaru.
4 Banaya, mmis n Yahuyadaɛ, tuɣa-t x řɛeskar.
Ṣaduq d Abyatar tuɣa aten d ikehhanen.
5 Ɛazarya, mmis n Natan, tuɣa-t x řwulat.
Zabud, mmis n Natan, tuɣa-t d akehhan d ameddukkeř n ujeǧid.
6 Axicar tuɣa-t x tzeddiɣt n ujeǧid.
Aduniram, mmis n Abda tuɣa-t x ljizya.
7 Suliman ɣares tenɛac n řwulat x marra Israil, inni ibedden x řeɛweč n ujeǧid d taddart nnes. X kuř ijj s uyur nnes deg useggʷas, tuɣa xas ad t iksi.
8 Ina d ismawen nsen:
Mmis n Ḥur x idurar n Ifrayim.
9 Mmis n Daqar di Maqas u di Caɛalubbim, Bayt-Cams d Ilun-Bayt-Ḥanan.
10 Mmis n Ḥasad di Arubut. Netta tuɣa ɣares Suku d marra tammurt n Ḥafir.
11 Mmis n Abinadab ɣares marra tiwririn n Dur. Tafat, yeǧis n Suliman, tuɣa-tt ɣares d tamɣart.
12 Baɛna, mmis n Axilud, ɣares Taɛnak, Majiddu d marra Bayt-Can i iǧan ɣar Ṣurtan, swadday n Yazraɛil, zi Bayt-Can ař Abal-Maḥula, ař uɣezdis nneɣni n Yuqmaɛam.
13 Mmis n Jabar tuɣa di Ramut-Jilɛad. Netta ɣares dcurat n Ya’ir, mmis n Manassa, tinni iǧan di Jilɛad. Tuɣa ɣares uřa d jjihet n Arjub, tenni di Bacan, settin n tineddam mɣarent s řḥiḍ u s weɛmud n nnḥas.
14 Axinadab, mmis n Ɛiddu, ɣares Maḥanayim.
15 Aximaɛaṣ tuɣa-t d lwali di Naftali. Netta yiwi uřa Basimat, yeǧis n Suliman, d tamɣart nnes.
16 Baɛna, mmis n Hucai, tuɣa-t d lwali di Acir u di Baɛalut.
17 Yahucafaṭ, mmis n Faruḥ, tuɣa-t d lwali di Issakar.
18 Cimɛi, mmis n Iyla, tuɣa-t d lwali di Binyamin.
19 Jabar, mmis n Uri, tuɣa-t d lwali di temmurt n Jilɛad, tammurt n Siḥun, ajeǧid n Imuriyyen, u n Ɛuj, ajeǧid n Bacan. Netta tuɣa d ayenni n lwali di temmurt nni.
20 Tuɣa řgens n Yahuda d Israil s waṭṭas am yijdi ɣar tma n řebḥar, ammu aṭṭas. Nitni ccin, swin u farḥen.