46
Awařen x řegnus
1 Awař n SIDI nni dd-yusin ɣar unabi Irmiya x řegnus.
2 X Miṣra
Ḍidd n řɛeskar n firɛun Naxu, ajeǧid n Miṣra, wenni din ɣar yeɣzar n Lfuraṭ, ɣar Karkamic, wenni yarna Nabuxadraṣṣar, ajeǧid n Babil, deg useggʷas wiss arebɛa n Yahuyaqim, mmis n Yuciya, ajeǧid n Yahuda.
3 “Swejdem taseddart n uɛeskari d tseddart nnes tameqqrant uca sgeɛɛdem ɣar umenɣi!
4 Ḥezzmen i iysan, nyem xasem, a imnayen n yeysan! Sbeddem ixef nwem s lkaskat x izeǧifen nwem. Sqeḍɛem fřitcat uca ḥezzmem s warruḍ n wuzzař!
5 Mayemmi ttwařiɣ Necc aqa nitni nnxeřɛen ařami dewřen ɣar ḍeffar? Ɛad ayt n bu-teɣruḍt nsen ttwarẓen, menɛen di tarewřa uca war i-dd-nnqeřben ɣar ḍeffar. Aqa din asnexřiɛ di marra iɣezdisen, ammu i iqqar SIDI.
6 Ejj wenni ifsusen s iḍaren war ittarekkwař uřa d bu-teɣruḍt war inejjem: nnqarḍen, wḍan di ccamal, ɣar tma n iɣzar n Lfuraṭ.”
7 “Man wen i din dd-igeɛɛden am waman n Miṣra, aman nnes zehharen am yiɣezran?
8 Miṣra tgeɛɛed-dd am waman, aman nnes zehharen am yiɣezran, teqqar: ‘Necc ad geɛɛdeɣ, ad dřeɣ tammurt, ad qḍiɣ x tendint d yinni dayes izeddɣen.
9 Geɛɛdem, a iysan, muzzarem, kenniw, a ikarruten n umenɣi! Jjem ayt n bu-teɣruḍt ad ffɣen: ayt n Kuc, ayt n Fuṭ inni yarebbun taseddart n uɛeskari d ayt n Lud inni itteṭṭfen řqews uca meḥḥḍen t.
10 Ass-a d ijj n wass i Sidi inu, SIDI n řɛeskarat, ijj n wass n wexřaf maḥend ad ixřef i yixef nnes zeg iɣrimen nnes. Ad yecc ssif, ad ijjawen uca ad iscar s idammen nsen, maɣar aqa din ict n tɣarṣt i Sidi inu, SIDI n řɛeskarat, di temmurt n ccamal ɣar yeɣzar n Lfuraṭ.
11 Geɛɛdem ɣar Jilɛad, awyem-d balsam, a cem taɛzarect, iǧis n Miṣra!. Baṭeř tarennid di ddwawat aṭṭas, maɣar war ɣarem bu ddawat ḥima ad tent tegged x uyezzim.
12 Sřin řegnus x řefḍiḥet nnem uca teccur temmurt zeg iɣuyyan n řeḥřiq nnem, maɣar bu-teɣruḍt imqarqeb ak-d bu-teɣruḍṭ nneɣni, munen wḍan s tnayen.”
13 Awař nni issiweř SIDI ɣar unabi Irmiya x twasit n Nabuxadraṣṣar, ajeǧid n Babil, ḥima ad iwwet tammurt n Miṣra.
14 “Barrḥem t di Miṣra u jjem ad as sřen di Majdal, jjem ad as sřen di Nuf d Taḥfanḥis. Inim: ‘Bedd abeddi, wjed!’, maɣar ssif icca marra iɣezdisen i d ac dd-innḍen.
15 Mayemmi ttwamḥan ayt n bu-ṣṣulṭa nnec? War izemmar netta ad iqqim ibedd, minzi SIDI iɛarren i-t.
16 Netta yarra aṭṭas ad nqarḍen, wah, aryaz iwḍa x wenneɣni, uca nitni nnan: ‘Kkarem, jjem aneɣ ad nedweř ɣar řgens nneɣ u ɣar temmurt mani nexřeq zi ssibbet n ssif iwɛaren.’
17 Din i řaɣan nitni: ‘Aqa firɛun, ajeǧid n Miṣra, ittwareddeǧ, aqa ijja řweqt ittwaggen ad teɛdu.’ ”
18 “S tidett am ddareɣ Necc, ammu i iqqar Ujeǧid, SIDI n řɛeskarat d Isem nnes: ‘Netta ad dd-yas, am wedrar n Tabur jar idurar u am wedrar n Karmil ɣar řebḥar!
19 Smun řeḥwayej nnem i lmenfa, a cem tamezduɣt, iǧis n Miṣra, maɣar tammurt n Nuf ad tedweř d ict n řqecɛet n unexřiɛ uca ad tᵉttwareddeǧ, ařami war din iqqim uřa d ijj izeddeɣ.
20 Tammurt n Miṣra d ict n taɛejmit tecna, maca ad ɣares dd-yas ijj n yarezzi d adarɣař, ad dd-yas zi ccamal.
21 Uřa d icewwařen nnes di řwesṭ nnes ggin am yiɛejmiyyen iṣeḥḥen, maca uřa d nitni ɛeqben-dd, nitni arewřen jmiɛ, war qqimen bedden, maɣar ass n uḍeyyeɛ nsen ad xasen dd-yas, tasaɛɛet n wexřaf nsen.
22 Tmijja nnes tegga am řḥess n ufiɣar iḥrarran, maɣar ad din uyuren ak-d ijj n řɛeskar u ad ɣares dd-asen s ccwaqar am yinezdamen n ukeccuḍ.
23 Nitni ad qessen azɣar nnes, ammu i iqqar SIDI, maɣar řɛeskar war izemmar ad ittwaḥseb, minzi nitni aqa aten deg waṭṭas x iburexsen, war zemmaren ad ttwaḥesben.
24 Tseḍḥa yeǧis n Miṣra, aqa tᵉttwagg deg ufus n ijj n řgens zi ccamal.’ ”
25 “SIDI n řɛeskarat, AREBBI n Israil, inna: ‘Xzar, Necc ad ɛaqbeɣ Amun zi temmurt n Nu, d firɛun d Miṣra, irebbiten nnes d ijeǧiden nnes, wah, firɛun d yinni xas ittcařen.
26 Necc ad ten wceɣ deg ufus n yinni yarezzun tudart nsen řa deg ufus n Nabuxadraṣṣar, ajeǧid n Babil, uřa deg ufus n imsexxaren nnes. Awarni i uya ad tedweř temmurt s imezdaɣ ɛawed am deg wussan n zic, ammu i iqqar SIDI.’ ”
27 “War teggʷed, a cek amsexxar inu Yaɛqub, war tefciř ca, a Israil, maɣar xzar, Necc ad cek ssnejmeɣ zi timmura iggʷejen uřa d zzariɛet nnec zi tmeḥbast nsen. Ad yareggʷeḥ Yaɛqub, ad ɣares tiři řhudnet, ad iddar di řaman uca uřa d ijj war t issnexřiɛ.
28 War tteggʷed, a cek amsexxar inu Yaɛqub, ammu i iqqar SIDI, maɣar Necc akidek, minzi Necc ad qḍiɣ x marra řegnus nni mani kenniw ssiggʷejeɣ, maca ɛemmarṣ war xak qeṭṭiɣ, maca ad cek webbxeɣ s řeɛbar iseggden u war cek heṣṣbeɣ d amezdag.’ ”