47
X Ifilisṭiniyyen
1 Awař n SIDI nni dd-yusin ɣar unabi Irmiya, awař i iwejjhen ḍidd i Ifilisṭiniyyen qbeř ma iwta firɛun Ɣazza.
2 “Ammu i iqqar SIDI: ‘Xzar, aman geɛɛden zi ccamal, ad dewřen d ict n teɣzart tessfay. Ad ḥemřen x temmurt u x marra min dayes iǧan, tandint d imezdaɣ nnes. Ad sɣuyen iwdan u marra imezdaɣ n temmurt ad ceḍnen aṭṭas
3 zi ssibbet n wezbar n tecti n tceḍyin n yeysan ijehden, zi ssibbet n ddriz n ikarruten n umenɣi d uqarqeb n tjarrarin. Ɛad ibabaten war ḥekkaren ca i iḥenjiren nsen maɣar ifassen nsen dewřen arehfen
4 zi ssibbet n wass i dd ɣa yasen ḥima ad ttwateḥḥan marra ayt n Ifilisṭiniyyen, ḥima ad ittwakkes zi Ṣur d Ṣidun kuř bu-twiza i yarewřen, maɣar SIDI ad iteḥḥa Ifilisṭiniyyen, min iqqimen n tegzirt n Kaftur.
5 Tusa-dd tqeccart x Ɣazza, tesseɣd temmurt n Acqalun jmiɛ ak-d min iqqimen n řewḍa n teɣzurt nsen. Ař meřmi ɣa teqqimed ɛad txebbced ixef nnem?
6 Uct xak, a ssif n SIDI, ař meřmi i ɣa teqqimed ɛad nehřa arraḥet? Dweř-dd ɣar furru n weɣřaf nnec, qqim war tenhezza!
7 Mammec i ɣa teqqimed tarsid? Aqa SIDI yumur ssif ḍidd i Acqalun u ḍidd i tma n řebḥar, i manayenni i ittwagg.’ ”