26
Irmiya di Zzawect Tameqqrant - Aneqqi n unabi Uriya
1 Deg umezwaru n tgelda n Yahuyaqim, mmis n Yuciya, ajeǧid n Yahuda, yusa-dd wawař-a zi SIDI, inna:
2 “Ammu i iqqar SIDI: ‘Bedd di řemraḥ n zzat n Taddart n SIDI uca ini marra awařen-a nni zi cek weṣṣiɣ maḥend ad zzaysen tessiwřed i imezdaɣ n marra tineddam n Yahuda nni dd-yusin maḥend ad bendqen di Taddart n SIDI. War ttejji uřa d ijj n wawař war t teqqared.
3 Ad taɣ ad sřen, ad dd-dewřen, kuř ijj zeg webrid aɛeffan nnes, uca ad nedmeɣ x řɣar nni nwiɣ ad daysen t ggeɣ zi ssibbet n tuɛeffna n tmegga nsen.
4 Ini asen: ‘Ammu i iqqar SIDI: Mařa kenniw war tᵉttexsem ad ɣari tesřem maḥend ad tuyurem ɛlaḥsab Ccariɛa inu nni d awem ggiɣ deg ufus,
5 u maḥend ad tesřem ɣar wawařen n imsexxaren inu, inabiyyen nni d awem dd-ssekkeɣ zeg umezwaru, waxxa kenniw war d asen tesřim,
6 xenni ad ggeɣ ak-d Taddart-a am ggiɣ ak-d Cilu, uca ad arreɣ tandint d nneɛřet i marra řegnus di temmurt.’ ”
7 Ikehhanen d inabiyyen d marra řgens sřin mammec issiweř Irmiya awařen-a di Taddart n SIDI.
8 Umi ikemmeř Irmiya awař x marra min tuɣa i d as iweṣṣa SIDI maḥend ad t inna i marra řgens, ṭṭfen t ikehhanen d inabiyyen d marra řgens uca nnan: “Ittxeṣṣa ad temmted!
9 Mayemmi tnebbid s Yisem n SIDI, tennid: ‘Taddart-a ad tedweř am Cilu u tandint-a ad tᵉttwareddeǧ ařami war dayes izeddeɣ uřa d ijjen?’ ” Marra řgens imun x Irmiya di Taddart n SIDI.
10 Umi sřin řḥukkam n Yahuda awařen-a, ffɣen-dd zi taddart n ujeǧid geɛɛden ɣar Taddart n SIDI, qqimen ɣar wadaf n tewwart n jdid n Taddart n SIDI.
11 Xenni ssiwřen ikehhanen d inabiyyen ak-d řḥukkam u ak-d marra řgens, nnan: “Aryaz-a isdaheǧ řmewt, am mammec tt tesřam s imezzuɣen nwem.”
12 Xenni issiweř Irmiya ak-d marra řḥukkam u ak-d marra řgens, inna: “SIDI issekk ayi-dd ḥima ad nebbiɣ marra awařen i tesřim ḍidd i Taddart-a u ḍidd i tendint-a.
13 Xenni řexxu, ɛedřem ibriden nwem d tmegga nwem uca ṣřem i tmijja n SIDI, AREBBI nwem, xenni ad indem SIDI zi marra řɣar i xawem inna.
14 Maca necc, xzar, aqa ayi deg ufus nwem, ggem zzayi mammec i d awem ittɣiř d lemliḥ d nican di tiṭṭawin nwem.
15 Snem maca nican, mařa kenniw tenɣim ayi, ad dd-tawyem idammen imezdagen x yixef nwem u x tendint-a u x imezdaɣ nnes, minzi s tidett, SIDI issekk ayi-dd ɣarwem maḥend ad awem iniɣ marra awařen-a deg imezzuɣen nwem.”
16 Řḥukkam d marra řgens nnan i ikehhanen u i inabiyyen: “Aryaz-a war issdiḥeǧ řmewt, maɣar netta issawař akidneɣ s Yisem n SIDI, AREBBI nneɣ.”
17 Ca n iryazen zeg imɣaren n temmurt kkaren, bedden. Nitni ssiwřen ɣar marra agraw n řgens, nnan:
18 “Mixa zi Muracit tuɣa ittnabba deg wussan n Ḥizqiya, ajeǧid n Yahuda, uca issiweř ɣar marra řgens n Yahuda, inna: ‘Ammu i iqqar SIDI n řɛeskarat: Ṣihyun ad tᵉttwacarz am yijj n yeyyar u tandint n Urcalim ad tedweř d řxarbet u adrar n Taddart-a ad idweř d řegɛudi mani ɣa wehhben tiwhibin deg wezɣar.’
19 Ma inɣa i-t Ḥizqiya, ajeǧid n Yahuda, d marra Yahuda? Ma war iggʷid netta SIDI u iksi s řmeɛruf řebda i SIDI ařami indem SIDI x řɣar i xasen iqqar? Neccin ad negg ijj n řɛib d ameqqran i yixef nneɣ.”
20 Tuɣa din ɛad ijj n weryaz nneɣni wenni tuɣa ittnebban s Yisem n SIDI, Uriya, mmis n Camɛiya, zi Qaryat-Yaɛarim. Netta inebba ḍidd i tendint-a u ḍidd i temmurt-a ɛlaḥsab marra awařen nni inna Irmiya.
21 Xmi isřa ujeǧid Yahuyaqim jmiɛ ak-d marra řḥukkam awařen nnes, ixs ujeǧid ad t ineɣ. Isřa Uriya aya, iggʷed, yarweř u yiweḍ ɣar Miṣra.
22 Ajeǧid Yahuyaqim maca issekk iryazen ɣar Miṣra: Il-Natan, mmis n Ɛakbur ak-d ca n iryazen. Issekk i-ten ɣar Miṣra.
23 Nitni iwyen-dd Uriya zi Miṣra uca nedhen t ɣar ujeǧid Yahuyaqim u wanita inɣa i-t s ssif. Netta inḍar řxecbet nnes deg imeḍřan n tarwa n řgens.
24 Maca afus n Axiqam, mmis n Cafan, tuɣa-t ak-d Irmiya maḥend war t tticen deg ifassen n řgens maḥend ad t nɣen.