25
Abarreḥ s lmenfa di Babil
1 Awař nni dd-yusin ɣar Irmiya x marra řgens n Yahuda, deg useggʷas wiss arebɛa n Yahuyaqim, mmis n Yuciya, ajeǧid n Yahuda. Tuɣa-t d aseggʷas amezwaru n Nabuxadraṣṣar, ajeǧid n Babil.
2 Inna unabi Irmiya awař-a i marra řgens n Yahuda u i marra imezdaɣ n Urcalim, inna:
3 “Zeg useggʷas wiss třeṭṭac n Yuciya, mmis n Amun, ajeǧid n Yahuda, ař ass-a, aqa i yijj n řmijjař n třata u-ɛicrin n iseggʷusa, yusa-dd ɣari wawař n SIDI u necc tuɣa ssawařeɣ akidwem, wah, zeg umezwaru tuɣa necc ssawařeɣ akidwem, maca kenniw war tesřim ca.
4 SIDI issekk-dd ɛawed marra imsexxaren nnes, inabiyyen, zeg umezwaru issekk i-ten-dd, maca kenniw war tesřim u war tewcim ca amezzuɣ nwem ḥima ad tesřem.
5 Nitni nnan: ‘Dewřem-dd, kuř ijj zeg webrid nnes aɛeffan u zi tuɛeffna n tmegga nwem uca zedɣem di temmurt nni d awem iwca SIDI u i řejdud nwem zi řebda i řebda qaɛ.
6 War ttraddafem irebbiten nneɣni ḥima ad asen tɛebdem u ad asen tbendqem. War d ayi seɛɛarem s tmegga n ifassen nwem, maḥend war d awem tteggeɣ řɣar.’
7 Maca kenniw war ɣari tesřim ca, ammu i iqqar SIDI, ařami d ayi tesɛarem s tmegga n ifassen nwem, i txessart nwem.”
8 “S uya, ammu i iqqar SIDI n řɛeskarat: ‘Minzi kenniw war tesřim ca ɣar wawařen inu,
9 xzar, s uya ad ggeɣ ad awyeɣ marra řaǧat zi ccamal, ammu i iqqar SIDI, uřa d Nabuxadraṣṣar, ajeǧid n Babil, amsexxar inu. Necc ad ten ssiwḍeɣ x temmurt-a u x imezdaɣ nnes u x marra řegnus i d as dd-innḍen uca ad ten ḥarrmeɣ i uteḥḥi. Necc ad ten ggeɣ d ict n řqecɛet n unexřiɛ d tseḍḥact uřa d řxirbat i řebda.
10 Necc ad zzaysen kkseɣ řḥess n řefraḥet d řḥess n warcaq, tmijja n muřay d tmijja n tesřit, ddriz n yeẓra n tsirt uřa d tfawt n řefnar.
11 Tammurt-a marra ad tedweř d řxirbet uřa d ict n řqecɛet n unexřiɛ, u řegnus-a ad sexxaren ajeǧid n Babil, sebɛin n iseggʷusa.
12 Xmi ɣa ɛdun sebɛin n iseggʷusa nni, xenni ad xeřfeɣ zeg ujeǧid n Babil d řgens nni x řmuɛṣiyyet nsen, ammu i iqqar SIDI, uřa x temmurt n Ikaldaniyyen. Necc ad tt arreɣ d ict n temmurt ittwareddǧen i řebda.
13 Necc ad dd-ssehwiɣ x temmurt nni marra awařen inu nni xas nniɣ, marra min yurin deg wedlis ittwannḍen, min inebba Irmiya x marra řegnus.
14 Maɣar uřa d nitni, wah, nitni, ad ɛebbden i waṭṭas n řegnus d ijeǧiden imeqqranen, uca ammu Necc ad zzaysen xeřfeɣ ɛlaḥsab timegga nsen u ɛlaḥsab řxedmet n ifassen nsen.’ ”
Řkas n weɣḍab n SIDI
15 “Maɣar ammu i d ayi inna SIDI, AREBBI n Israil: ‘Ksi řkas-a n binu n wesɛar zeg ufus inu u ewc i-t i marra řegnus mani cek i ɣa ssekkeɣ, ḥima ad swen,
16 maḥend ad swen, ad meyyřen ssa ɣar da, ad dewřen ttbuhřuyen zi ssibbet n ssif nni dd ɣa ssekkeɣ jar asen.’ ”
17 Awarni uya ksiɣ řkas zeg ufus n SIDI, wciɣ t i marra řegnus, mani i d ayi issekk SIDI:
18 ... i Urcalim d tneddam n Yahuda, i ijeǧiden nnes d řḥukkam nnes, ḥima ad ten arreɣ d řxirbet, d ict n řqecɛet n unexřiɛ d tseḍḥact uřa d nneɛřet, am teǧa ass-a,
19 ... i Fiřɛun, ajeǧid n Miṣra, i umsexxaren nnes, řḥukkam nnes u i marra řgens nnes,
20 ... i ubarru n ɛřam kuř ibarraniyyen
... i ijeǧiden n temmurt n Ɛuṣ
... i marra ijeǧiden n temmurt n Ifilisṭiniyyen, i Acqalun, Ɣazza, Ɛaqrun u i marra min iqqimen zi Acdud,
21 ... i Idum, Mu’ab d ayt n Ɛammun,
22 ... i marra ijeǧiden n Ṣur, i marra ijeǧiden n Ṣidun u i ijeǧiden n tegzirin x ujemmaḍ n řebḥar,
23 ... i Dadan, Tayma, Buz d marra inni ittḥeffan acuwwaf ɣar ṭṭrufa,
24 ... i marra ijeǧiden n temmurt n Weɛraben u i marra ijeǧiden n ɛřam kuř ibarraniyyen nni izeddɣen di řexřa,
25 ... i marra ijeǧiden n Zimri, u i marra ijeǧiden n Ɛilam u i marra ijeǧiden n Maday,
26 ... i marra ijeǧiden n ccamal, inni yudsen d yinni iggʷejen, ijjen awarni i wenneɣni,
... i marra tigeldiwin n ddunect i iǧan x wudem n temmurt,
uca awarni asen marra ad isu ujeǧid n Cicak, ixs ad yini Babil.
27 “Ad asen tinid: ‘Ammu i iqqar SIDI n řɛeskarat, AREBBI n Israil: Swem, scarem, ɛuqqem, wḍam u war tekkarem ɛad zzat i ssif i dd ɣa ssekkeɣ jar awem.’
28 Xmi ɣa agin ad ksin řkas zeg ufus nnec maḥend ad t swen, xenni ini asen: ‘Ammu i iqqar SIDI n řɛeskarat: Ad teswem s uɣiř!
29 Maɣar xzar, di tendint i x ittwabarreḥ s Yisem inu, ad bdiɣ s řɣar. Ma ad daywem ggen am tteggen ak-d imezdagen? Kenniw war ttwaḥesben d imezdagen, maɣar ad řaɣiɣ i ssif ḍidd i marra imezdaɣ n temmurt, ammu i iqqar SIDI n řɛeskarat.’ ”
30 “Ad xasen tnebbid marra awařen-a uca ad d asen tinid: ‘SIDI ad dd-izehhar zi sennej uca Netta ad issgeɛɛed tmijja nnes zi Tzeddiɣt nnes Iqeddsen. Netta ad izehhar x Tzeddiɣt nnes, ad iřaɣa am t tteggen inni yareffsen aḍiř, ḍidd i marra imezdaɣ n ddunect.
31 Ad dd-yas ijj n řḥess issnexřiɛen ař tma n temmurt, minzi SIDI ɣares ict n ddeɛwet ak-d řegnus. Netta ad iḥkem x bnadem am ikmeř, ad iɛarren marra iɛeffanen ɣar ssif, ammu i iqqar SIDI.’
32 Ammu i iqqar SIDI n řɛeskarat: ‘Xzar, ijj n řɣar tessuruf zi řgens ɣar řgens nneɣni, ict n tharyaḍt tewɛar tekkar-dd zi tmuwwa n temmurt.
33 Deg wass nni ad iřin inni ittwassnuqqben s ssif x ict n tma n temmurt ař tma nneɣni. War xasen ttrun, war ten jarrwen u war ten neṭṭřen. Ad dewřen d řeɣbar x wudem n temmurt.
34 Rum, kenniw imeksawen, sɣuyem. Zuzzarem acař x yixef nwem, kenniw inni ɣar iǧa jjehd x tḥimriwin n wuǧi, maɣar yiweḍ-dd řḥař n tɣarṣt nwem, u Necc ad kenniw zuzzareɣ u kenniw ad tefruryem am yijj n uɣarraf iɣřa.
35 War tneffeɛ tarewřa i imeksawen uřa d wenjam n yinni ɣar iǧa jjehd x tḥimriwin n wuǧi.
36 Sḥessem mammec sɣuyyun imeksawen s jjehd, mammec ttrun inni ɣar iǧa jjehd x tḥimriwin n wuǧi, minzi SIDI ittareddeǧ ddmani nsen n tarewsa.
37 Maɣar ddmani n tarewsa ad dewřen ugnun zi ssibbet n řḥaduq n weɣḍab n SIDI.
38 Am weyrad ameẓyan ijja Netta adurri nnes, maɣar tammurt nsen tedweř d ict n řqecɛet n unexřiɛ s řḥaduq n ssif n wenni iḥeṣṣaren, s řḥaduq n weɣḍab nnes.’ ”